Jesu a di khuye Makristo ma yede gu bhabhatiswa. (Leri Matewu 28:19, 20.) Ganiolu, so thula ginani gubhabhatiswa? Nigu ginani egi muthu a yedego gu gira gasi a bhabhatiswa?

1. Ginani gubhabhatiswa?

Lito “gu bhabhatisa” la guta khavba nya lito nya Gigreki li thulago “gu negwa” matini. Tepo Jesu a nga bhabhatiswa, a di negwa matini Tsongoni wa Joridhani, khavbovbo a “duga khu matini.” (Marko 1:9, 10) Gufana ni Jesu, tepo Makristo nya lisine ma bhabhatiswago, mo negwa givili gyatshavbo matini.

2. Ginani egi muthu a yeyedzago tepo a bhabhatiswago?

Tepo muthu a bhabhatiswago, o yeyedza gu khuye hendzeledzide womi waye gasi gu thumeya Jehovha Nungungulu. O si gira kharini isoso? Na si gu bhabhatiswi, o gombeya enga, a embeya Jehovha khuye o vbweta gu mu thumeya kala gupindruga. O tumbisa gu khozeya Jehovha enga ni gu thangisa gugola ga Nungungulu guvbanyani gwaye. O hatha gu ‘dzi diga’ ni gu simama gu landrisa sihevbudzo ni giyeyedzo gya Jesu.” (Matewu 16:24) Tepo muthu a dzi hendzeledzago ni gu bhabhatiswa o tulegedwa khu ndziya nyo manege ni wupari nya wukhongolo ni Jehovha ni Makristo makwawe.

3. Ginani egi muthu a yedego gu gira gasi a bhabhatiswa?

Nu si bhabhatiswi, gu vbwetega u hevbula khu Jehovha u bwe u khodwa gwaye. (Leri Vahebheru 11:6.) Tepo u yago u muti gwadi Jehovha ni gu khodwa gwaye, u na mu haladza ngudzu. Khavbovbo, kha hi kanakani gu khethu u na vbweta gu bhuleya vambe khuye ni milayo yaye. (2 Thimoti 4:2; 1 Johane 5:3) Muthu o ba a “landrisa guhaladza gwa [Jehovha], ni gu mu tsakisa mithumoni yatshavbo,” a nga hunga gu dzi hendzeledza ga Nungungulu a bhabhatiswa. — Vakolosi 1:9, 10. a

 GIRA WUGEVISISI NYO ETE

4. Esi hi si hevbulago avba nya gubhabhatiswa ga Jesu

Lerini Matewu 3:13-17 gasi muti simbe khu gubhabhatiswa ga Jesu. Khavbovbo, bhulani khu siwudziso sesi:

• Ina Jesu a diri gyanana gi ngari velegwa tepo a nga bhabhatiswa?

• Bhabhatisidwe kharini? Ina a di mitegedzedwa simatyna hungoni basi?

Hwane nyo bhabhatiswe, khavbo Jesu a nga pheya thumo nyo hathege a nga ningwa khu Nungungulu. Lerini Luka 3:21-23 ni Johane 6:38, mu vbedza mu bhula khu giwudziso gegi:

• Hwane nyo ba Jesu a bhabhatisidwe, i thumo muni a nga ba a wu ninga ngudzu lisima womini gwaye?

5. Si nga kodzega gu u bhabhatiswa

Tepo u pwago na gu ganedwa khu gu dzi hendzeledza ni gu bhabhatiswa, si nga gira nu thavanyana. Ganiolu, tepo u yago u muti gwadi Jehovha ni gu vbanya khesi u si hevbulago, khu na nga thava gambe gu veta lizambo leli nya lisima. Gasi mu wona vathu nyo khaguri va giridego isoso, sistirini VHIDHYU.

Lerini Johane 17:3 ni Jakobe 1:5, mu vbedza mu bhula khu giwudziso gegi:

• Ginani egi muthu a yedego gu gira gasi a dzi dongiseya gu bhabhatiswa?

1. Ho dzi hendzeledza ga Jehovha tepo hi mu embeyago gu khethu ho vbweta gu mu thumeya kala gupindruga

2. Tepo hi bhabhatiswago, ho yeyedza vathu gu khethu hi dzi hendzeledzide ga Nungungulu

 6. Tepo hi bhabhatiswago, ho gira gipandre nya ndranga ya Jehovha ya mafuni gwatshavbo

Tepo hi bhabhatiswago, ho gira gipandre nya ndranga nyo pwanane ya mafuni gwatshavbo. Ambari olu hi tago khomu nya mayigo ni mitumbunugo nyo hambane, ethu ho khodwa silo sa simweso hi bwe hi engisa milayo ya yimweyo ya Nungungulu. Lerini Ndzimo 25:14 ni 1 Pedro 2:17, mu vbedza mu bhula khu giwudziso gegi:

• Tepo muthu a bhabhatiswago, wupari muni a wu pheyago ni Jehovha gumogo ni vambe va mu khozeyago?

 REZUMO

Jesu hevbudzide gu khuye Makristo gu vbwetega ma bhabhatiswa. Gasi si kodzega isoso, gu vbwetega gu muthu a tiyisa gukhodwa gwaye ga Jehovha, a vbanya khu guya khu milayo yaye, a bwe a hendzeledza womi waye gwaye.

Siwudziso nyo wusedze

• Ginani gubhabhatiswa, nigu khu ginani gu gu gwa lisima?

• Khu gwevbini guyelana gu gomogo avba nya gudzihendzeledze ni gubhabhatiswa?

• Silo muni esi muthu a yedego gu gira na si hendzeledzi womi waye ni gu bhabhatiswa?