GIHEVBULO 31
Ginani Mufumo wa Nungungulu?
Mahungu nya litshina nya Bhibhiliya Mufumo wa Nungungulu. Jehovha a na thumisa Mufumo wowu gasi gu vbindrugedza mafu ma khala paradhesi. Ginani Mufumo wa Nungungulu? Ho dziti kharini gu khethu wu phede gu fuma? Ginani wu giridego kala olu? Nigu ginani wu na girago mindru wa tshigu? Ga gihevbulo gegi ni esi nya sivili si landreyago, hi na hlamula siwudziso sesi.
1. Ginani Mufumo wa Nungungulu, nigu khu mani Pfhumu nya Mufumo wowu?
Mufumo wa Nungungulu mufumo wu emisidwego khu Jehovha Nungungulu. Pfhumu yakona khu Jesu Kristo, nigu a gu fuma khu ndzadzini. (Matewu 4:17; Johane 18:36) Bhibhiliya yari khiyo “a na fuma . . . kala gupindruga.” (Luka 1:32, 33) Kha nga Pfhumu nya Mufumo wa Nungungulu, Jesu a na fumeya vathu vatshavbo mafuni.
2. Khu mani a na fumago ni Jesu?
Jesu kha na nga fuma enga. Vathu “nya mahundzu, malimi, mafumbu, ni mayigo yatshavbo . . . va na fuma mafuni.” (Gutuledwa 5:9, 10) Vathu vangani va na fumago ni Kristo? Gukhugeya tepo Jesu a ngata mafuni, vathu nya vangi va di khala vapizane vaye. Ganiolu, i 144 000 basi nya avo va na ya fumago ni Jesu ndzadzini. (Leri Gutuledwa 14:1-4.) Aya mambe Makristo ma na ba mari gipandre ya vathu va Nungungulu omu mafuni. — Ndzimo 37:29.
3. Khu ginani Mufumo wa Nungungulu wu gu wadi ngudzu guvbindra mifumo nya vathu?
Ambari olu mifumo yeyi yi zamago gu gira silo nya sadi, iyo yi mwalo tshivba nyo gire satshavbo va si vbwetago. Nigu khu gu gimbiya nya tepo, dzipfhumu nya mifumo yeyi dzi ngu tshikedzwa khu dzimbe nya gu ne kha dzi khathali khu vathu. Ganiolu, Pfhumu nya Mufumo wa Nungungulu, Jesu, gima kha na nga tshikedzwa khu yimbe pfhumu. Nungungulu ‘emiside wumbe mufumo nya gu gima kha wu na khoziswa khu mambe mafumbu.’ (Dhaniyeli 2:44) Jesu a na fumeya mafu yatshavbo, nigu a na phara vathu vatshavbo khu ndziya nyo fane. Uye na ni lihaladzo, wuwadi nigu lulamide, a na bwe a hevbudza vathu gu phara vambe khu ndziya nya lihaladzo, wuwadi ni gu lulama. — Leri Isaya 11:9.
GIRA WUGEVISISI NYO ETE
Wona gu khuwe khu ginani Mufumo wa Nungungulu wu gu wadi guvbindra mifumo nya vathu.
4. Mufumo wa Nungungulu wu na fumeya mafu yatshavbo
Tshivba eyi Jesu a gu nayo gasi gu fuma yikhongolo ngudzu guvbindra ni wevbi mufumeli a manegidego. Lerini Matewu 28:18, mu vbedza mu bhula khu giwudziso gegi:
-
Khu gwevbini guhambana gu gomogo avba nya tshivba nyo fume ya Jesu ni eyi nya dzimbe dzipfhumu?
Mifumo nya vathu yi ngu oloveya gu vbindrugedzana khu gu gimbiya nya tepo, nigu dzipfhumu dzakona dzo fumeya gipandre nyo khaguri nya mafu basi. Ahati Mufumo wa Nungungulu ke? Lerini Dhaniyeli 7:14, mu vbedza mu bhula khu siwudziso sesi:
-
Khu ginani si tsakisago guti gu khethu Mufumo wa Nungungulu gima “mwalo a na gu wu dzegago” mwendro gu wu fuvisa?
-
Khu ginani si tsakisago guti gu khethu Mufumo wa Nungungulu wu na fumeya mafu yatshavbo?
5. Mufumo wa Nungungulu wu na tshikedza mifumo nya vathu
Khu ginani Mufumo wa Nungungulu wu vbwetago gu tshikedza mifumo nya vathu? Sistirini VHIDHYU, mu vbedza mu bhula khu giwudziso gi landreyago.
-
Khu yevbini mihandro yi reswago khu mifumo nya vathu?
Lerini Muhevbudzi 8:9, mu vbedza mu bhula khu giwudziso gegi:
-
Wo si wona kharini, ina Mufumo wa Nungungulu wu yede gu tshikedza mifumo yeyi nya vathu? Khu ginani?
6. Mufumo wa Nungungulu wu na ni vafumeli va hi pwisisago gwadi
Pfhumu yathu, Jesu, vbanyide kha nga muthu nya nyama, khu kharato uye a ngu hi pwisisa nigu a ngu “kodza gu hi pwela wusiwana nya sighoho sathu.” (Vahebheru 4:15) Vbavbandze nya isoso, Jehovha hathide 144 000 vama ni vanyamayi nyo tumbege gasi va fuma gumogo ni Jesu, vathu “nya mahundzu, malimi, mafumbu, ni mayigo yatshavbo.” — Gutuledwa 5:9.
-
Wo dzipwa kharini khu guti gu khuwe Jesu ni ava a na fumago navo va ngu si pwisisa sigaradzo hi tshangano naso? Khu ginani?
Jehovha hathide vama ni vanyamayi nya mafumbo yatshavbo gasi gu fuma ni Jesu
7. Mufumo wa Nungungulu wu na ni milayo nya yadi ngudzu guvbindra eyi nya mifumo nya vathu
Mifumo nya vathu yi ngu vega milayo gasi gu phasa ni gu vhikeya vathu. Mufumo wa Nungungulu wu na ni milayo yawo nuwo. Lerini 1 Vakorinto 6:9-11, mu vbedza mu bhula khu siwudziso sesi:
-
Wo si wona kharini, nari khatshi vathu vatshavbo mafuni va ngu engisa milayo ya Nungungulu, litigo na li khade kharini? a
-
Wo si wona kharini, ina si ngu yela gu Jehovha a vbweta gu khuye vathu va fumedwago khu Mufumo waye va engisa milayo yaye? Khu ginani?
-
Ginani gi yeyedzago gu khigyo ava va si engisigo milayo yeyi si nga kodzega gu va vbindrugedza mavbanyelo yawe? — Wona livhesi 11.
Mifumo yi ngu vega milayo gasi gu phasa ni gu vhikeya vathu. Mufumo wa Nungungulu nuwo wu na ni milayo yi phasago ni gu vhikeya vathu, ganiolu milayo yawo khyadi ngudzu
VAMBE VA NGA WUDZISA KHAVO: “Ginani Mufumo wa Nungungulu?”
-
U di hadzi hlamula kharini?
REZUMO
Mufumo wa Nungungulu mufumo nya lisine wu gomogo ndzadzini owu wu na fumeyago mafu yatshavbo.
Siwudziso nyo wusedze
-
Khu vamani vafumeli nya Mufumo wa Nungungulu?
-
Khu ginani Mufumo wa Nungungulu wu gu wadi guvbindra mifumo nya vathu?
-
Ginani egi Jehovha a vbwetago gu khuye vathu va gira gasi va fumedwa khu Mufumo waye?
HEVBULA SIMBE
Wona esi Jesu a hevbudzidego maningano ni omu wu manegago omu Mufumo wowu.
“Ina Mufumo wa Nungungulu gilo gi gomogo monyoni gwathu?” (Ndrima nya jw.org, khu Giputukezi)
Khu ginani Dzifakazi dza Jehovha dzi wonago gu engisa Mufumo wa Nungungulu kha nga gilo nya lisima guvbindra gu engisa mifumo nya vathu?
Wona esi Bhibhiliya yi si ganeyago khava nya 144 000 a va hathidego Jehovha gasi gu fuma ni Jesu.
“Khu mani a hongolago ndzadzini?” (Ndrima nya jw.org, khu Giputukezi)
Ginani gi nga gira nyamayi nyo khaguri a nga ba khotedwe pasoni a khodwa gu khuye Nungungulu khuye enga a gu na ni tshivba nyo vbedze guvivba mafuni?
“Gu hevbula gwangu khu mafu nyo lulame” (Khendzugani! nya Novembro nya 2011, khu Giputukezi)
a Omu nya Gipandre 3 nya libhuku leli, hi na bhula khu milayo nyo khaguri nya milayo yeyi.
You May Also Like
SIWUDZISO VA TALAGO GU GIRA
Ginani gihevbulo nya Bhibhiliya?
Mana mihlamulo nya edzi hi girago khidzo gihevbulo nya Bhibhiliya.
