GIHEVBULO 34

Hi nga yeyedza kharini gu khethu hi ngu mu haladza Jehovha?

WOMBISA

Gukhugeya u nga pheya gu hevbula Bhibhiliya, ina u ngu dzipwa vbafuvbi ngudzu ni Nungungulu? U ngu tsakeya gu simama gu tiyisa wupari wago naye? Abari gu ina, dundruga gu khuwe tepo lihaladzo lago khu Jehovha li yago li dandra, uye a na gu haladza ngudzu ni gu khathala khuwe. Ganiolu, u nga yeyedza kharini gu khuwe u ngu mu haladza Jehovha?

1. Hi nga yeyedza kharini gu khethu hi ngu mu haladza Jehovha?

Ho yeyedza gu kethu hi ngu haladza Jehovha tepo hi mu engisago. (Leri 1 Johane 5:3.) Uye kha gurumedzi muthu gu mu engisa. Ganiolu, o ninga lithomo moyo ni moyo wathu nyo dzi hatheye gu khuye a na mu engisa mwendro ne. Khu ginani? Khu gu Jehovha o vbweta gu khuye hi mu engisa khu ‘myonyo yathu yatshavbo.’ (Varoma 6:17) Khu mambe maganelelo, uye o vbweta gu khuye u mu engisa khu monyo wago watshavbo, nasiri khu gu gurumedzwa. Sipandre 3 ni 4 nya libhuku leli, si na gu phasa gu yeyedza gu khuwe u ngu mu haladza Jehovha khu gu gira silo si mu tsakisago ni gu mba gira silo si gu mba mu tsakisa.

2. Khu ginani si nga garadzago gu yeyedza lihaladzo lathu khu Jehovha?

“Sigaradzo nya muthu nya gululame singi ngudzu.” (Ndzimo 34:19) Hatshavbo hi ngu dwanisana ni gumbavbeleya gwathu. Dzimbe dzitepo adzina hi ngu tshaniswa khu wusiwana, hi giredwa wuvivbi ni simbe sigaradzo. Tepo hi tshanganago ni sigaradzo, si nga hi garadzeya gu gira esi Jehovha a si vbwetago. Si nga hi garadzeya kholu gu gira silo nyo vivbe si nga wonega nari iso si vbevbugago ngudzu. Ganiolu, tepo u tumbegago ni gu engisa Jehovha, wo yeyedza gu khuwe u ngu mu haladza ngudzu guvbindra ni gevbini gilo. Wo yeyedza gambe gu khuwe u ngu tumbega gwaye, nigu Jehovha nuye a na tumbega gwago. Uye gima kha na nga gu diga. — Leri Ndzimo 4:3.

GIRA WUGEVISISI NYO ETE

Wona gu khuwe khu ginani Jehovha a gu ningago lisima guengisa, u bwe u wona gu khuwe ginani gi nga gu phasago gu simama gu tumbega gwaye.

3. Sathane a ngu gu singedza

Omu nya Bhibhiliya, ga libhuku la Joba, ho hevbula gu khethu Sathane singedzide Joba ni vathu vatshavbo va vbwetago gu thumeya Jehovha. Lerini Joba 1:1, 6–2:10, mu vbedza mu bhula khu siwudziso sesi:

Khu guya khu Sathane, khu ginani Joba a nga ba a engisa Jehovha? — Wona Joba 1:9-11.
Ginani egi Sathane a singedzago vathu vatshavbo, gupata nago? — Wona Joba 2:4.

Lerini Joba 27:5b, mu vbedza mu bhula khu giwudziso gegi:

Joba yeyedzide kharini gu khuye a ngu mu haladza Jehovha?

Joba yeyedzide lihaladzo laye khu Jehovha khu gu tumbega gwaye

Anethu ho yeyedza lihaladzo lathu khu Jehovha khu gu tumbega gwaye

4. Tsakisa monyo wa Jehovha

Lerini Mavingu 27:11, mu vbedza mu bhula khu siwudziso sesi:

Jehovha o dzipwa kharini tepo hi girago silo nya sadi ni gu mu engisa? Khu ginani?

5. U nga si kodza gu tumbega ga Jehovha

Ethu hi ngu mu haladza Jehovha, nigu isoso so hi kutsa gu bhuleya vambe khuye. Gutumbega gwathu ga Jehovha, gu ngu hi kutsa gu mu engisa, ambari so ba si garadza gu gira isoso. Sistirini VHIDHYU, mu vbedza mu bhula khu siwudziso si landreyago.

VHIDHYU: Emeya gukhodwa gwago ambari wo ba u wugedwa (5:09)

Wo si wona kharini, ina si ngu garadza gu bhula ni vathu khu Jehovha?
Kha nga u si wonidego omu nya vhidhyu, ginani gi phasidego Cláudio gu pala hwanga?

Si ngu vbevbuga gu tumbega ga Jehovha ho ba hi gola esi a si golago ni gu nyenya esi a si nyenyago. Lerini Ndzimo 97:10, mu vbedza mu bhula khu siwudziso sesi:

Khu guya khesi u si hevbudego, ginani egi Jehovha a gi golago? Ginani egi a gi nyenyago?
U nga si kodza kharini gu gola silo nya sadi ni gu nyenya silo nyo vivbe?

6. Gu engisa Jehovha si ngu resa makategwa

Gu engisa Jehovha khyadi tepo yatshavbo. Lerini Isaya 48:17, 18, mu vbedza mu bhula khu siwudziso sesi:

Wo si wona kharini, ina hi nga khodwa gu khethu Jehovha a ngu siti esi si gu sadi gwathu? Khu ginani?
Kala avba, esi u si hevbudego omu nya Bhibhiliya khu Jehovha si gu phaside kharini?

VAMBE VARI KHAVO: “Nungungulu kha khathali khesi nyi girago mwendro nyi digidego gu gira.”