GIHEVBULO 35

Hi nga hatha kharini silo nya sadi?

WOMBISA

Hatshavbo hi ngu tshuka hi manega ga siemo si lombago gu khiso hi hunga gu khethu ginani hi na girago guvbanyani. Nyasingi sakona si nga vbindrugedza womi wathu ni gu kuha wupari wathu ni Jehovha. Khu giyeyedzo, gu hatha omu hi na khalago umo, thumo nya gudzivbanyise mwendro gu tshadha ni gu mba tshadha. Ho hatha gu gira silo nya sadi, hi na tsaka hi bwe hi tsakisa Jehovha.

1. U nga thumisa kharini Bhibhiliya gasi yi gu phasa gu hatha silo nya sadi?

Nu si giri gilo nyo khaguri, pheya khu gu gombeya u lomba giphaso ga Jehovha u bwe u vbweta guti esi Bhibhiliya yi si ganeyago. (Leri Mavingu 2:3-6.) Ga simbe siemo, Jehovha a ngu ninga nayo nyo kongome. Ga siemo soso, nya gyadi u nga girago gu dzegeya gu engisa nayo wowo.

Ahati wo ba wuri mwalo nayo nyo kongome omu nya Bhibhiliya wu ganeyago khesi u vbwetago gu gira ke? Jehovha a nga na simama gu gu ‘thangeya ga ndziya u yelago gu gimbiya khiyo.’ (Isaya 48:17) Khu ndziya muni? Bhibhiliya yi na ni matshina nya milayo ma nga gu phasago. Matshina nya milayo lisine li gomogo omu nya Bhibhiliya li hevbudzago edzi Jehovha a si wonago khidzo silo. Gutala nya dzitepo, tepo hi lerigo matimu nya Bhibhiliya hi ngu tugula edzi Jehovha a si wonago khidzo silo nyo khaguri. Tepo hi tugulago edzi Jehovha a si wonago khidzo silo soso, si ngu vbevbuga gu gira silo si mu tsakisago.

2. Ginani u yedego gu dundrugeya khigyo nu si giri silo nyo khaguri?

Bhibhiliya yari khiyo: “Muthu nya mapimo a gu khedza umo a gandrago.” (Mavingu 14:15) Isoso so thula gu khiso na hi si hungi gu gira gilo nyo khaguri, gu vbwetega hi pheya khu gu dundrugeya khu satshavbo si pategago. Tepo u dundrugeyago khiso, dzi wudzise gu khuwe: ‘Khu levbini litshina nya nayo nya Bhibhiliya nyi nga li thumisago avba nya giemo gegi? Esi nyi vbwetago gu gira, ina si na nyi ninga gurula mapimoni? Iso si na kuha kharini vambe vathu?’ Nya lisima ga satshavbo: ‘Ina iso si na mu tsakisa Jehovha?’ — Dhewuteronome 32:29.

Jehovha khuye enga a ninganedwago khu gu hi embeya esi si gu sadi ni esi nyo vivbe. Tepo hi tigo gwadi milayo ni matshina nya milayo ya Jehovha hi bwe hi dzi emiseya gu yi engisa, ho hevbudza gwadi livhalo lathu. Livhalo makodzelo hi gu nawo nyo hambanise esi nya sadi ni esi nyo vivbe. (Varoma 2:14, 15) Livhalo li hevbudzidwego gwadi li ngu hi phasa gu gira silo nya sadi.

GIRA WUGEVISISI NYO ETE

Wona edzi matshina nya milayo nya Bhibhiliya ni livhalo lathu ma nga hi phasago khidzo gu gira silo nya sadi.

3. Diga Bhibhiliya yi thangeya womi wago

Matshina nya milayo nya Bhibhiliya ma nga hi phasa kharini gu gira silo nya sadi? Sistirini VHIDHYU, mu vbedza mu bhula khu siwudziso sesi.

VHIDHYU: Diga matshina nya milayo nya Bhibhiliya ma thangeya womi wago (5:54)

Ginani gutshulega nyo dzi hatheye?
Khu ginani Jehovha a hi ningidego gutshulega nyo dzi hatheye?
Ginani egi Jehovha a hi ningidego gasi gu hi phasa gu hunga esi hi na girago?

Gasi gu wona giyeyedzo nya litshina limwedo nya nayo nya Bhibhiliya, lerini Vaefeso 5:15, 16. Khavbovbo, mu bhula khedzi u nga sayisago khidzo mwendro gu thumisa khidzo tepo yago gasi u . . .

leri Bhibhiliya tshigu ni tshigu.
khala mwama mwendro mwangadzi, papayi mwendro mamayi ni gyanana nya gyadi.
hongola mitshanganoni nya libandla.

4. Hevbudza livhalo lago gasi li gu phasa gu gira silo nya sadi

Si ngu vbevbuga guti esi hi yedego gu gira abari gu Bhibhiliya yi ngu hi ninga nayo nyo kongome ga giemo gyogyo. Ganiolu, ahati yo ba Bhibhiliya yiri mwalo nayo nyo kongome ke? Sistirini VHIDHYU, mu vbedza mu bhula khu giwudziso gegi.

VHIDHYU: “Simama ni livhalo nya ladi” (5:13)

Kha nga hi si wonidego omu nya vhidhyu, ginani a giridego ndriyathu nya nyamayi gasi gu gira silo si na tsakisago Jehovha?

Khu ginani hi gu mba yela gu lomba vambe va hi hatheya esi hi yedego gu gira? Lerini Vahebheru 5:14, mu vbedza mu bhula khu siwudziso sesi:

Gu lomba vambe va hi hatheya esi hi yedego gu gira, si nga wonega na si vbevbuga. Ganiolu, ginani egi moyo ni moyo wathu a yedego gu kodza gu gi hambanisa?
Kha nga hi si wonidego omu nya vhidhyu, ginani gi na gu phasago gu hevbudza livhalo lago ni gu gira silo nya sadi?

Gufana ni mapa, livhalo lathu li ngu hi phasa gu hatha ndziya hi na gimbiyago khiyo guvbanyani

5. Ninga githawo mavhalo ya vambe

Vathu va hambanide, khigyo gi girago gu va hatha gu gira silo nyo hambane. Ina ka, hi nga yeyedza kharini gu khethu hi ngu ninga githawo mavhalo ya vambe? Nga dundrugeya khu siemo sesi:

Giemo nyo pheye: Nga dundrugeya khu ndriyathu nya nyamayi a golago gu dzi makiyari, a rurago a hongola ga limbe libandla omu vandriyathu nya vanyamayi si gu mba va phara gwadi gu wona vambe vanyamayi na va dzi makiyaride.

Lerini Varoma 15:1 ni 1 Vakorinto 10:23, 24, mu vbedza mu bhula khu siwudziso sesi:

Khu guya khu mavhesi yaya, ginani egi ndriyathu yoyu a yedego gu gira? Ginani u na girago wo ba uri ni muthu a wonago esi livhalo lago li gu dzumeleyago gu gira na si vivbide?

Giemo nya wuvili: Nga dundrugeya khu ndriyathu nyo khaguri nya mwama a dzi tigo gu khuye Bhibhiliya kha yi himbedzeyi gu seyanyana wadwa, ganiolu uye a dzi hatheya gu mba seya. Khavbovbo, a ranedwa gipfhitsha nyo khaguri khu vandriyathu, a ya wona vandriyathu na va seya wadwa.

Lerini Muhevbudzi 7:16 ni Varoma 14:1, 10, mu vbedza mu bhula khu siwudziso sesi:

Khu guya khu mavhesi yaya, ginani egi ndriyathu yoyu a yedego gu gira? Ginani u na girago wo wona muthu na gira silo esi livhalo lago li gu mba gu dzumeleya gu gira?

Ginani hi yedego gu gira gasi hi gira silo nya sadi?

1. Gombeya ga Jehovha u lomba giphaso gasi u hunga esi u nga girago. — Jakobe 1:5.

2. Gira wugevisisi omu nya Bhibhiliya ni omu nya mabhuku yathu gasi u mana matshina nya milayo nya Bhibhiliya ma nga gu phasago. U nga lomba gambe wusingalagadzi ga Makristo ma vidzidwego.

3. Dundrugeya khedzi esi u vbwetago gu gira si na kuhago khidzo livhalo lago ni mavhalo la vambe.

VAMBE VARI KHAVO: “Nyi tshulegide gu gira ni gevbini nyi gi vbwetago womini gwangu. Kha nyi khathali khesi vathu va na si pimisago.”

Khu ginani hi yedego gu dundrugeya khedzi Nungungulu ni vambe vathu va na dzi pwago khidzo?

REZUMO

Gasi gu hatha gwadi esi hi na girago, gu vbwetega hiti edzi Jehovha a si wonago khidzo silo hi bwe hi dundrugeya khedzi si na kuhago khidzo vambe.

Siwudziso nyo wusedze

Hi nga si kodza kharini gu hatha silo si tsakisago Jehovha?
U nga hevbudza kharini livhalo lago?
U nga yeyedza kharini gu khuwe u ngu ninga githawo mavhalo ya vambe vathu?

Gihevbulo gegi gi vbede khu dhiya:

Zama gu gira esi

Dundrugeya khu silo nyo khaguri u vbwetago gu gira. Khavbovbo, u thumisa mawonelo ma gomogo omu nya kwadru “ Ginani hi yedego gu gira gasi hi gira silo nya sadi?”

Simbe u nga girago:

Your other goal