Novba khwa lisima ngudzu. Nya mba na novba, mwalo gwathu a nga hadzi vbanya. Kha nga Muvangi, Nungungulu na ni fanelo nyo ganeye edzi novba wu yedego gu thumiswa khidzo. Ginani egi Nungungulu a ganeyago khu novba? Ina hi yede gu hodza novba mwendro gu thedwa givilini? Hi nga gira kharini gasi hi tsakisa Jehovha ga mahungu nya novba?

1. Jehovha o wu wona kharini novba?

Jehovha embede sithumi saye sa gale, khuye: “Guvbanya nya mili gomo novbani gwaye.” (Levhi 17:14) Ga Jehovha, novba wo emeya womi. Kha nga olu womi wu gu giningwa nya lisima gya Nungungulu, novba nuwo wu na ni lisima ngudzu.

2. Khu yavbini mathumiselo nya novba ma himbedzedwago khu Nungungulu?

Na li nga si tudwi libandla nya Wukristo, Jehovha layide sithumi saye gu khuye si si hodzi novba. (Leri Genesi 9:4 ni Levhi 17:10.) Nigu hwane nyo ba li tudwe libandla nya Wukristo, Jehovha khu gu thumisa huwo nya guthangeye, ningide gileletelo gya gimwegyo: “Mu diga gu hodza [“simamani gu gimbileya hwindzo ni”, NM] . . . novba.” — Mithumo 15:28, 29.

So thula ginani gu gimbileya hwindzo ni novba? Wo embedwa khu medhiko gu pwani diga gu seya wadwa, hi ngu tumba gu khethu u di hadzi wu diga. Ganiolu, ina u di hadzi hodza silo nyo thedwe wadwa mwendro gu wu theya givilini khomu nya misivba? Ahihi. Khu ndziya nyo fane, nayo wa Nungungulu nyo gimbileye hwindzo ni novba wo thula gu khuwo kha hi yeli gu seya novba mwendro gu hodza nyama yi nga mba duswa novba. Ne kha hi yeli gu hodza guhodza gu gu na ni novba.

Ahati mathumelo nya madwali ma lombago gu khayo gu thumiswa novba ke? Mathumelo nyo khaguri nya madwali ma ngu dwanisana khu gukongoma ni nayo wa Nungungulu. Isoso so pata gu thedwa novba mwendro ni gevbini gipandre gyawo nya litshina, a gu dziglobhulo nyo fuviye, dziglobhulo nyo age, dziplaketa ni plasma. Ganiolu, ga mambe mathumelo nya madwali si nga tshuka si garadza guti gu khethu ma ngu dwanisana ni nayo wa Nungungulu mwendro ne. Khu giyeyedzo, ga mambe gu ngu thumiswa sipandryana nya sipandre nya litshina nya novba; ga mambe gu thumiswa novba nya muthu yoyo a dwalago kamo. Ga siemo nya nga esi, moyo ni moyo wathu gu vbwetega a dzi hatheya esi a na girago. a — Vagalatiya 6:5.

 GIRA WUGEVISISI NYO ETE

3. Hatha mathumelo nya madwali ma tsakisago Jehovha

U nga hatha kharini mathumelo nya madwali ma longolokago ni mawonelo ya Nungungulu khu novba? Sistirini VHIDHYU, mu vbedza mu bhula khu lisima nyo landrise sileletelo si landreyago.

• Gombeya u lomba wugengeyi.— Jakobe 1:5.

• Gevisisa matshina nya milayo nya Bhibhiliya ni dzindziya nyo ma thumise khidzo. — Mavingu 13:16.

• Zama guti mathumelo nya madwali ma gomogo omu u vbanyago umo.

• Tugula mathumelo nya madwali u si ma dzumeyigo.

• Hatha mathumelo nya madwali ma na gu tshiyago ni livhalo li agidego. — Mithumo 24:16. b

• Dundruga gu khuwe mwalo a yedego gu gu embeya esi u yedego gira so ba si lomba gu thumisa livhalo lago — ne mwama mwendro mwangadzi wago, ne lidhota, ne muhevbudzi wago nya Bhibhiliya. — Varoma 14:12.

• Lova esi u hathidego gu gira.

4. Dzifakazi dza Jehovha dzo vbweta mathumelo nya yadi nya madwali

Si ngu kodzega gu engisa nayo wa Nungungulu nyo gimbileye hwindzo ni novba, ganiolu hi mana mathumelo nya yadi nya madwali ma gu mba patana ni novba. Sistirini VHIDHYU.

Lerini Tito 3:2, mu vbedza mu bhula khu giwudziso gegi:

• Khu ginani hi yedego gu yeyedza githawo ni gurula tepo hi bhulago ni vamedhiko?

  5. Ginani u na girago so tshuka si lomba gu thedwa sipandryana nya novba?

Novba wu na ni 4 sipandre nya litshina: dziglobhulo nyo fuviye, dziglobhulo nyo age, dziplaketa, ni plasma. Sipandre sesi nya 4 si ngu kabaniswa khu sipandryana, si ranwago pwani sipandryana nya novba. c Sipandryana nyo khaguri si ngu thumisedwa gu thuma madwali nyo khaguri ni gu emisa guduga nya novba.

Avba nya sipandryana nya novba, Mukristo ni Mukristo a yede gu thumisa livhalo laye gasi gu dzi hatheya gu khuye a na thedwa mwendro ne. Si nga gira vambe vathu va dzumeya gu thedwa sipandryana nya novba, ganiolu si nga gira vambe va bomba gu thedwa.

Tepo u vbwetago gu hunga esi u na girago, dundrugeya khesi:

• Nyi nga mu tshamuseya kharini medhiko wangu gighelo nya gu dzumeye mwendro nyo bombe gu thedwa sipandryana nya novba?

 REZUMO

Jehovha o vbweta gu khuye hi wu ninga githawo novba.

Siwudziso nyo wusedze

• Khu ginani Jehovha a wonago novba nga gilo nya lisima?

• Ho dziti kharini gu khethu nayo wa Nungungulu nyo gimbileye hwindzo ni novba wo pata gu thedwa novba?

• Hi nga yeyedza kharini githawo khu novba tepo hi hathago mathumelo nya madwali?