GIHEVBULO 42
Ginani egi Bhibhiliya yi ganeyago khu gu tshadha ni gu mba tshadha?
Omu nya mitumbunugo nyo khaguri, vathu vo pimisa gu khavo muthu a nga tsaka basi o tshadha. Ganiolu, khandri vatshavbo ava va tshadhidego va tsakago nigu khandri vatshavbo ava va nga mba tshadha va si tsakigo. Lisine khu gu Bhibhiliya yari khiyo gu tshadha ni gu mba tshadha siningwa si tago khiyo ga Jehovha.
1. Khu yavbini makategwa ma reswago khu gu mba tshadha?
Bhibhiliya yari khiyo: “Oyu a dzegago nyamahegyane a ngu gira gwadi; gasi oyu a si dzegigo a ngu gira gwadi ngudzu guvbindrisa.” (Leri 1 Vakorinto 7:32, 33, 38.) Khu ginani Bhibhiliya yi gu khiyo oyu a nga mba tshadha a ngu “gira gwadi ngudzu guvbindrisa”? Mukristo a nga mba tshadha mwalo thumo nyo khathaleye mwama mwendro mwangadzi waye. Khu kharato, uye tshulegide guvbindra oyu a tshadhidego. Khu giyeyedzo, a nga thumisa tepo yaye gasi gu engedzeya thumo waye nyo tshumayele, adzina khu gu endreya limbe litigo gasi gu ya tshumayela mahungu nya yadi. Nya lisima ga satshavbo, khu gu na ni tepo nya yingi nyo tiyise wupari waye ni Jehovha.
2. Khu yavbini makategwa nyo khaguri ma reswago khu gu tshadha khu nayo?
Gu tshadha nugo gu ngu resa makategwa, gufana ni gu mba tshadha. Bhibhiliya yari khiyo ‘tshukwana vavili, guvbindra moyo.’ (Muhevbudzi 4:9) Isoso lisine, ngudzungudzu ga Makristo ma vbanyago khu matshina nya milayo nya Bhibhiliya pangoni gwawe. Tepo mwama ni nyamayi va tshadhago khu nayo, vo tumbisana gu haladzana, gu ningana githawo ni gu khathaleyana. Isoso si ngu gira gu mwama ni nyamayi va tshadhidego va dzipwa na va vhikelegide guvbindra ava va vbanyago vatshavbo na va sa tshadha. Nigu si ngu gira gu sanana niso si dzipwa na si vhikelegide.
3. Jehovha o li wona kharini lipango?
Tepo Jehovha a nga tshadhisa vathu nyo pheye, a di khuye: “Mwama a na diga ndranga ya babe ni mayi waye aya patana ni mwangadzi waye.” (Genesi 2:24) Jehovha o vbweta gu khuye mwama ni ngadzi va haladzana va bwe va vbanya vatshavbo womini wawe watshavbo. Uye o dzumeleya gu khuye mwama ni ngadzi va tshula mutshadho o tshuka moyo wawe a gira wubhayi. Ga giemo gegi, Jehovha a ngu dzumeleya gu khuye oyu a nga ghohedwa a dzi hatheya gu khuye a na tshula mutshadho mwendro ne. a (Matewu 19:9) Jehovha kha dzumeleyi gu khuye Makristo ma manega ni mwama mwendro nyamayi nyo vbindre moyo. — 1 Thimoti 3:2.
GIRA WUGEVISISI NYO ETE
Wona edzi ava va tshadhidego ni ava va si gu tshadhigo va nga manago khidzo gutsaka ni gu bwe va tsakisa Jehovha.
4. Ava va si gu tshadhigo, va nga wu londrola kharini womi wawe?
Jesu a di gu wona gu mba tshadha nga gilo nya lisima. (Matewu 19:11, 12) Lerini Matewu 4:23, mu vbedza mu bhula khu giwudziso gegi:
-
Kha nga olu Jesu a nga mba tshadha, thumiside kharini tepo yaye gasi gu thumeya Papayi waye ni gu phasa vambe vathu?
Makristo ma si gu tshadhigo ma nga gira sa simweso si giridwego khu Jesu. Sistirini VHIDHYU, mu vbedza mu bhula khu giwudziso gegi.
-
Makristo ma nga mba tshadha va nga londrola kharini womi wawe gasi gu thumeya Jehovha khu ndziya nya yadi?
U di gu dziti?
Bhibhiliya kha yi ganeyi myaga eyi muthu a yedego gu tshadha khiyo. Ganiolu, yo kutsa gu khiyo muthu a tshadha hwane nyo ba a vbindride tanga nya wanana, kholu ga tanga yeyi, gudogoreya nya malawu gu nga gira muthu a hunga silo nya mba pheya khu gu pimisa. — 1 Vakorinto 7:36.
5. Hatha gwadi muthu u na tshadhago naye
Gu hatha muthu nyo tshadhe naye gimwegyo nya silo nya lisima ngudzu womini. Lerini Matewu 19:4-6, 9, mu vbedza mu bhula khu giwudziso gegi:
-
Khu ginani Mukristo a gu mba yela gu tutumeya gu tshadha?
Bhibhiliya yi nga gu phasa guti makhalelo u yedego gu ma khedza ga mwama mwendro nyamayi u vbwetago gu tshadha naye. Ganiolu, nya lisima ga satshavbo, gu vbwetega na haladza Jehovha. b Lerini 1 Vakorinto 7:39 ni 2 Vakorinto 6:14. Khu hwane mu na bhula khu siwudziso sesi:
-
Khu ginani hi yedego gu tshadha ni muthu a thumeyago Jehovha?
-
Wo si wona kharini, Jehovha a di hadzi dzipwa kharini ho tshadha ni muthu a gu mba mu haladza?
Go patwa sirengo sivili nyo hambane avba nya kanga mowo, si na tshaniseka. Khu ndziya nyo fane, Mukristo a tshadhago ni muthu a si haladzigo Jehovha a na tshangana ni sigaradzo nya singi
6. Wona lipango kha nga edzi Jehovha a li wonago khidzo
Dziteponi dza Vaisrayeli, vama nyo khaguri va di gu diga vagadzi wawe khu sighelo nya mba pwala. Lerini Malakiya 2:13, 14, 16, mu vbedza mu bhula khu giwudziso gegi:
-
Khu ginani Jehovha a nyenyago gu tshula mutshadho na si si seketedwi khu Bhibhiliya?
Wubhayi ni gu tshula mutshadho si nga vanga sigaradzo ga oyu ghohedwego ni sanana niso
Sistirini VHIDHYU, mu vbedza mu bhula khu giwudziso gegi.
-
Wo ba u tshadhide ni muthu a gu mba thumeya Jehovha, u nga gira kharini gasi u tsaka pangoni gwago?
7. Thumisa milayo ya Jehovha pangoni gwago
Adzina si nga lomba gu muthu a dzi garadza ngudzu gasi gu thumisa milayo ya Jehovha pangoni gwaye. c Ganiolu, Jehovha a ngu kategisa ava va girago isoso. Sistirini VHIDHYU.
Lerini Vahebheru 13:4, mu vbedza mu bhula khu siwudziso sesi:
-
Wo si wona kharini, si ngu vbevbuga gu landrisa milayo ya Jehovha nya lipango? Khu ginani u ganeyago isoso?
Ga mayigo nya mangi, wufumu wo kutsa gu khuwo vathu va lovedzisa mitshadho yawe mwendro tepo va tshulago mutshadho. Jehovha o vbweta gu khuye Makristo ma engisa milayo yoyo. Lerini Tito 3:1, mu vbedza mu bhula khu giwudziso gegi:
-
Wo ba u tshadhide, u ngu tiyisega gu khuwe mutshadho wago lovedzisidwe nigu wu ngu tidwa wufumuni?
VAMBE VA NGA WUDZISA KHAVO: “Mo tshadheya ginani? Kha si kodzegi gu mu vbanya mwatshavbo na mwa sa tshadha?”
-
U di hadzi hlamula kharini?
REZUMO
Gu tshadha ni gu mba tshadha siningwa si tago khu ga Jehovha. Ava va tshadhidego ni ava va nga mba tshadha va nga mana gutsaka womini vo vbanya khu milayo ya Jehovha.
Siwudziso nyo wusedze
-
Oyu a nga mba tshadha a nga thumisa kharini womi waye khu ndziya nyo tsakise?
-
Khu ginani Bhibhiliya yi hi kutsago gu tshadha basi ni muthu a thumeyago Jehovha?
-
Khu gevbini gighelo gya gimwego nyo tshule mutshadho gi seketedwago khu Bhibhiliya?
HEVBULA SIMBE
So thula ginani gu tshadha ‘Pfhumoni’?
“Siwudziso sa valeri” (Mukhedziseyi nya 1 nya Julho nya 2004, khu Giputukezi)
Sistiri dzivhidhyu dzimbili nyo role dzi na gu phasago gu hunga silo nya sadi avba nya gu namorare ni gu tshadha.
Wona egi gi girago ndriyathu nyo khaguri a ganeya khuye esi Jehovha a mu ningidego khyadi ngudzu guvbindra ni gevbini gilo a gi digidego hwane.
Ginani egi muthu a yedego gu dundrugeya o ba a pimisa gu tshula mutshadho mwendro gu hambana ni mwama mwendro mwangadzi?
“Ninga githawo ‘egi gi hungidwego khu Nungungulu’” (Mukhedziseyi nya Dezembro nya 2018)
a Wona Tshamuselo 4 gasi uti sighelo si nga girago mwama ni ngadzi va hambana ambari moyo wawe o ba a sa gira wubhayi.
b Omu nya mitumbunugo nyo khaguri, vavelegi khavo va hatheyago mwama mwendro nyamayi sanana sawe. Ga siemo sesi, vavelegi nya lihaladzo gupheya vo khedza gu khavo muthu yoyo a ngu haladza Jehovha mwendro ne, vbavbandze nyo khedze gu khavo ghanyide mwendro na ni ndruma.
c Wo ba u vbanya ni muthu u nga mba tshadha naye, khuwe u hathago gu khuwe u na mu diga mwendro khu na nga mu diga muthu yoyo.
You May Also Like
SIWUDZISO VA TALAGO GU GIRA
Ginani gihevbulo nya Bhibhiliya?
Mana mihlamulo nya edzi hi girago khidzo gihevbulo nya Bhibhiliya.
