GIHEVBULO 43
Khu yavbini mawonelo nya Bhibhiliya khu wadwa?
Mafuni gwatshavbo, vathu va na ni mawonelo hambanehambane khu wadwa. Vambe va ngu gola gu hodza na va seyanyana gumogo ni dzipari dzawe. Vambe ni gu wu linga basi, kha va wu vbweti. Ganiolu, vambe vo seya nyo bwe va leva. Gasi khu yavbini mawonelo nya Bhibhiliya khu wadwa?
1. Ina si vivbide gu seya wadwa?
Bhibhiliya kha yi himbedzeyi gu seya wadwa. Gasi gu ganeya lisine, iyo yari khiyo ‘vhinyu yi ngu tsakisa myonyoni nya vathu’ — yo gira gipandre nya siningwa si tago khu ga Nungungulu. (Ndzimo 104:14, 15) Vama ni vanyamayi nyo tumbege va khumbugwago omu nya Bhibhiliya va di gu seya wadwa. — 1 Thimoti 5:23.
2. Wusingalagadzi muni Bhibhiliya yi ningago ava va seyago wadwa?
Jehovha kha vbweti gu khuye hi seya ngudzu wadwa ni gu leva. (Vagalatiya 5:21) Bhibhiliya yari khiyo: “U nga hengeli gumogo ni dzibewudzi mwendro vathu va seyago ngudzu vhinyu.” (Mavingu 23:20) Khu kharato, ho hunga gu seya wadwa, ambari na hiri honga, gu vbwetega hi seya khu gu pimeledza. Kholu ho seya hi vbindrisa pimo, kha hi na nga si kodza gu pimisa gwadi, nigu hi na ganeya ni gu gira silo nyo duge ndziyani, mwendro gu dzi vangeya madwali. Ho ba hi si si kodzi gu seya khu gu pimeledza, tshukwana hi dzegeya gu diga gu seya.
3. Hi nga yeyedza kharini githawo vathu va gu hatha gu seya mwendro gu mba seya wadwa?
Muthu ni muthu a yede gu dzi hatheya gu khuye a na seya wadwa mwendro ne. Kha hi yeli gu lamula muthu a hathago gu seya khu gu pimeledza. Kha hi yeli gambe gu gurumedza muthu gu seya na si si seyi. (Varoma 14:10) Hi ngu hunga gu mba seya ho wona gu khethu womo si mu garadzago. (Leri Varoma 14:21.) Kha hi ‘dwaneli basi esi si hi tsakisago wurumba wathu, aholu muthu ni muthu a gu dwanela esi si tsakisago muthu kwawe.’ — 1 Vakorinto 10:23, 24.
GIRA WUGEVISISI NYO ETE
Wona matshina nya milayo nya Bhibhiliya ma na gu phasago gu hunga gu khuwe u na seya wadwa mwendro ne, nigu pimo muni u na seyago. Wona gambe esi u na girago wo ba uri ni gigaradzo nyo seye ngudzu wadwa.
4. Hunga gu khuwe u na seya mwendro ne
Jesu a di gu gu wona kharini gu seya wadwa? Gasi u mana hlamulo nya giwudziso gegi, wona gilewugiso nyo pheye a giridego Jesu mafuni. Lerini Johane 2:1-11, mu vbedza mu bhula khu siwudziso sesi:
-
Gilewugiso gegi gyo phasa kharini gu wona edzi Jesu a wu wonago khidzo 1) wadwa ni 2) oyu a hathago gu seya wadwa?
-
Kha nga olu Jesu a nga mba himbedzeya gu seya wadwa, Makristo ma yede gu mu wona kharini oyu a seyago wadwa?
Ambari olu si nga mba vivba gu Mukristo a seya wadwa, kha si thuli gu khiso gu vbwetega a khala khu gu seya tepo yatshavbo. Lerini Mavingu 22:3, mu vbedza mu bhula khedzi dziponto dzedzi dzi landreyago dzi nga gu phasago khidzo gu hunga gu khuwe u na seya mwendro ne:
-
Wo vbweta gu gimbidzisa movha mwendro gu thumisa mutshini nyo khaguri.
-
Wo ba uri ni mimba.
-
Wo ba u himbedzedwe gu seya khu medhiko.
-
Wo ba u si kodzi gu dzi phara tepo u seyago.
-
Wo ba nayo wu gu himbedzeya gu seya wadwa.
-
Wo ba uri ni muthu a hathidego gu diga gu seya kholu si nga ba si mu garadzeya gu seya khu gu pimeledza gale yoyo.
Ina si vivbide gu vega wadwa mutshadhotunu gwago mwendro avba nya hagano nyo khaguri gasi wu ta sedwa khava va na tago? Gasi gu wona egi gi na gu phasago guti gilo nyo gire, sistirini VHIDHYU.
Lerini Varoma 13:13 ni 1 Vakorinto 10:31, 32. Hwane nyo leri milowo yeyi yatshavbo, bhulani khu giwudziso gegi:
-
Gu thumisa matshina yaya nya milayo si nga gu phasa kharini gu hunga silo si na tsakisago Jehovha?
Mukristo ni Mukristo a yede gu dzi hatheya gu khuye a seya wadwa mwendro ne. Adzina Mukristo a na hatha gu seya ga giemo nyo khaguri, ganiolu ga gimbe giemo a si seyi
5. Hunga gu khuwe pimo muni u na seyago
Wo hatha gu seya wadwa, dundruga gu khuwe: Jehovha kha himbedzeyi gu seya, ganiolu o himbedzeya gu seya u vbindrisa pimo. Khu ginani? Lerini Hoseya 4:11, 18, mu vbedza mu bhula khu giwudziso gegi:
-
Ginani gi nga giregago muthu o seya a vbindrisa pimo?
Ginani gi nga hi phasago gu seya nya mba vbindrisa pimo? Gu vbwetega hi seya khu gu pimeledza mwendro hiti pimo wathu. Lerini Mavingu 11:2, mu vbedza mu bhula khu giwudziso gegi:
-
Khu ginani si gu sadi gu dzi vegeya pimo nya wadwa u na seyago?
6. Ginani gi nga phasago muthu gu seya khu gu pimeledza?
Wona egi gi phasidego mwama moyo gu diga vhisyu nyo seye wadwa. Sistirini VHIDHYU, mu vbedza mu bhula khu siwudziso sesi.
-
Kha nga hi si wonidego omu nya vhidhyu, ginani egi Dmitry a nga ba a gira o ba a levide?
-
Ina si mu vbevbugede gu dzegeya gu diga gu seya?
-
A si kodzide kharini gu ema gu seya?
Lerini 1 Vakorinto 6:10, 11, mu vbedza mu bhula khu siwudziso sesi:
-
Ina si vivbide ngudzu gu leva?
-
Ginani gi yeyedzago gu khigyo muthu a seyago ngudzu a nga si kodza gu diga?
Lerini Matewu 5:30, mu vbedza mu bhula khu giwudziso gegi:
-
Ga gipimaniso gya Jesu nyo dzi piye libogo, a di vbweta khuye adzina si nga lomba gu hi dzi garadza gasi hi tsakisa Jehovha. Ginani u nga girago so ba si gu garadzeya gu seya khu gu pimeledza? a
Lerini 1 Vakorinto 15:33, mu vbedza mu bhula khu giwudziso gegi:
-
Wo ba u hagana ni vathu va seyago ngudzu wadwa, khu wevbini handro si na gu reseyago isoso?
VAMBE VA NGA WUDZISA KHAVO: “Ina kamo si vivbide gu seya wadwa?”
-
U di hadzi khuwe ginani?
REZUMO
Wadwa gimwegyo nya siningwa hi ningidwego khu Jehovha, ganiolu a ngu himbedzeya gu khuye hi seya ngudzu ni gu leva.
Siwudziso nyo wusedze
-
Khu yavbini mawonelo nya Bhibhiliya khu wadwa?
-
Khu dzevbini dzimhango nyo seye ngudzu wadwa?
-
Hi nga yeyedza kharini githawo vathu va gu hatha gu seya mwendro gu mba seya wadwa?
HEVBULA SIMBE
Vaphya va nga hatha kharini mawonelo nya yadi khu wadwa?
Wona esi u nga girago gasi gu pala gigaradzo nyo seye ngudzu wadwa.
“Vega wadwa wulangani wawo” (Mukhedziseyi nya 1 nya Janeiro nya 2010, khu Giputukezi)
Ina Makristo ma yede gu patega omu nyo ghumise dzikopo?
“Siwudziso sa valeri” (Mukhedziseyi nya 15 nya Fevereiro nya 2007, khu Giputukezi)
Leri matimu “Nyi diri givilelo,” gasi u wona esi mwama nyo khaguri a giridego gasi a diga gu seya ngudzu wadwa.
“Bhibhiliya yi ngu vbindrugedza womi nya vathu” (Mukhedziseyi nya 1 nya Maio nya 2012, khu Giputukezi)
a Ava si va garadzeyago gu diga gu seya ngudzu wadwa, adzina si nga lomba gu va phaswa khu vamedhiko. Vamedhiko nya vangi vari khavo ava va gu na ni gigaradzo gyogyo tshukwana va dzegeya gu diga gu seya.
You May Also Like
SIWUDZISO VA TALAGO GU GIRA
Ginani gihevbulo nya Bhibhiliya?
Mana mihlamulo nya edzi hi girago khidzo gihevbulo nya Bhibhiliya.
