GIHEVBULO 44

Ina dzifesta dzatshavbo dzi ngu mu tsakisa Nungungulu?

WOMBISA

Jehovha o vbweta gu khuye hi tsaka hi bwe hi dzi buza khu sifestana dzimbe dzitepo. Ganiolu, ina dzifesta dzatshavbo dzi ngu mu tsakisa? Ga siemo nya nga esi, hi nga yeyedza kharini lihaladzo lathu khu Jehovha?

1. Khu ginani dzifesta nya dzingi dzi gu mba tsakisa Jehovha?

Adzina u nga hlamala khu guti gu khuwe dzifesta nya dzingi kha dzi longoloki ni sihevbudzo nya Bhibhiliya mwendro dzo dugeya omu nya wukhongeyi nya malipha. Dzifesta dzodzo si nga gira na dzi gimbileyana ni wudhemoni mwendro na dzi dugeya avba nya gihevbudzo nyo pwani hefemulo kha wufi. Dzifesta nyo khaguri dzo dugeya omu nya sihevbudzo nya malipha. (Isaya 65:11) Jehovha a ngu gengedza sithumi saye, khuye: “Dugani khu vbakari gwawe . . . mu nga khuhini gilo nya gunyenyeze.” — 2 Vakorinto 6:17. a

2. Jehovha o dzipwa kharini khu dziferiyadho dzi ningago vathu wuzundzo nyo vbindre pimo?

Jehovha a ngu hi gengedza gu khuye hi si dzi kalaveyi hi ‘tumba muthu kwawe.’ (Leri Jeremiya 17:5.) Dziferiyadho nyo khaguri dzo giredwa gu zundza masotshwa mwendro vafumeli. Dzimbe dzo giredwa gu dundruga mwaga li nga tshulega khilo litigo nyo khaguri mwendro gu khuzeya bhandeira ni simbe silo nyo yelane ni litigo lolo. (1 Johane 5:21) Dzimbe dziferiyadho gambe dzo giredwa gu tsakeya dzihengeledzano nya politika mwendro nya vavbanyi nya litigo lolo. Khu mawonelo yago, Jehovha a di hadzi dzipwa kharini ho patega omu nya feriyadho nyo khaguri yi ningago wuzundzo vathu mwendro dzihengeledzano dzi si longolokigo ni gugola gwaye?

3. Ginani gi nga girago gu festa nyo khaguri yi si tsakisi Jehovha?

Bhibhiliya yi ngu himbedzeya “wubewudzi mwendro gu seya ngudzu wadwa, ni limidzo, ni guleva.” (1 Pedro 4:3) Omu nya dzifesta nyo khaguri, vathu kha va kodzi gu dzi phara nigu vo gira silo nya mba handzega. Gasi hi khala dzipari dza Jehovha, kha hi yeli gu patega omu nya dzifesta dzodzo nya mba handzega.

GIRA WUGEVISISI NYO ETE

Wona gu khuwe u nga gira ginani gasi u hatha silo si tsakisago Jehovha avba nya dzifesta ni dziferiyadho nyo khaguri.

4. U nga pategi omu nya dzifesta dzi gu mba tsakisa Jehovha

Lerini Vaefeso 5:10, mu vbedza mu bhula khu siwudziso sesi:

Ginani hi yedego gu tiyisega khigyo na hi si hongoli ga festa nyo khaguri?
Dzifesta muni dzi oloveyago gu girwa omu u vbanyago umo?
Wo si wona kharini, ina dzifesta dzodzo dzi ngu tsakisa Jehovha?

Khu giyeyedzo, u di nga tshuka u dzi wudzisa gu khuwe Nungungulu o dzi wona kharini dzifesta nyo dundruge matshigu nyo velegwe? Bhibhiliya kha yi ganeyi ne khu githumi gimwegyo gya Jehovha gi nga nga gira festa nyo dundruge matshigu nyo velegwe. Dzifesta dza dzimbili nyo dundruge matshigu nyo velegwe dzi khumbugwago omu nya Bhibhiliya khya vathu va nga ba va si thumeyi Jehovha. Lerini Genesi 40:20-22; Matewu 14:6-10, mu vbedza mu bhula khu siwudziso sesi:

Silo muni nyo fane si giregidego avba nya dzifesta dzedzi dza dzimbili nyo dundruge matshigu nyo velegwe?
Khu guya khu mavhesi yaya, wo pimisa gu khuwe Jehovha o dzi wona kharini dzifesta nyo dundruge matshigu nyo velegwe?

Ganiolu, adzina u nga dzi wudzisa khuwe: ‘Ina kamo Jehovha a ngu goroga nyo patega omu nya dzifesta nyo dundruge matshigu nyo velegwe mwendro yimbe festa yi si pwananigo ni esi Bhibhiliya yi si hevbudzago?’ Lerini Ekisodha 32:1-8. Khavbovbo, mu sistiri VHIDHYU mu vbedza mu bhula khu siwudziso sesi.

VHIDHYU: Dziferiyadho ni dzifesta dzi gu mba tsakisa Nungungulu (5:07)

Khu ginani si gu sa lisima gu pheya khu gu tiyisega gu khethu si na tsakisa Jehovha mwendro ne?
Hi nga si gira kharini isoso?

Hi nga dziti kharini gu khethu festa nyo khaguri kha yi tsakisi Nungungulu?

Iyo festa yoyo khandri yo dugeya omu nya sihevbudzo si dwanisanago ni sihevbudzo nya Bhibhiliya? Zama guti omu yi dugeyago umo.
Ina yi ngu ninga wuzundzo nyo vbindre pimo ga vathu, dzihengeledzano ni litigo nyo khaguri? Ethu ho zundza Jehovha guvbindra ni wevbi muthu mwendro ni gevbi gilo nigu khuye hi mu tumbago gasi gu lulamisa sigaradzo mafuni.
Ina esi vathu va giredzeyago vo ba vari ga festa yoyo kha si dwaniswani ni milayo nya Bhibhiliya? Gu vbwetega mavbanyelo yathu ma khala na ma agide.

5. Phasa vambe gu pwisisa esi u hungidego

Si nga garadza gu bomba gu hongola ga festa yi gu mba tsakisa Jehovha wo tshuka u gurumedzwa gu hongola. Va tshamuseye sighelo si gu girago u si hongoli, ganiolu khu ndziya nya githawo nu va laphiseya monyo. Gasi gu wona giyeyedzo nya edzi u nga girago khidzo, sistirini VHIDHYU.

VHIDHYU: Yeyedza githawo tepo u tshamuseyago esi u si khodwago (2:01)

Lerini Matewu 7:12, mu vbedza mu bhula khu siwudziso sesi:

Khu guya khu lowo wowu, ina u yede gu gurumedza valongo va gu mba thumeya Jehovha gu khuwe va si dundrugi matshigu nyo velegwe?
U nga va yeyedza kharini valongo vago khuwe ambari olu u gu mba patega omu nya dzifesta nyo dundruge matshigu nyo velegwe mwendro dzimbe dziferiyadho, kha si thuli gu khiso kha wu va goli gambe?

6. Jehovha o vbweta gu khuye hi tsaka

Jehovha o vbweta gu khuye hi dzi buza khu gutsaka ni valongo ni dzipari dzathu. Lerini Muhevbudzi 8:15, mu vbedza mu bhula khu giwudziso gegi:

Lowo wowu wo yeyedza kharini gu khuwo Jehovha o vbweta gu khuye hi tsaka?

Jehovha o vbweta gu khuye vathu vaye va dzi buza khu gutsaka ni Makristo makwawe. Sistirini VHIDHYU gasi mu wona edzi isoso si wonegago khidzo omu nya dzikongresu dzathu nya mayigo nya mangi.

VHIDHYU: Gu hakha gwadi vapfhumba khu tepo nya dzikongresu nya mayigo nya mangi (5:40)

Lerini Vagalatiya 6:10, mu vbedza mu bhula khu siwudziso sesi:

Ina hi yede gu patega omu nya dziferiyadho nyo khaguri khu gu feya gu ‘gireya esi nya sadi’ vathu basi?
Ginani gi nga hadzi tsakisa ngudzu: Gu gurumedzwa gu ninga giningwa khu litshigu nya feriyadho nyo khaguri, mwendro gu ningeya giningwa khu gu nari iso u hungidego gu gira?
Dzifakazi dza Jehovha nya dzingi dzi ngu gira sifestana ni gu ninga siningwa sanana sawe ni ga levbini litshigu. Wo ba uri ni sanana, silo muni nyo hathege u nga hadzi si gireya?

VAMBE VARI KHAVO: “Kha si hungi gu khiso kala hiti omu yi dugeyago umo festa nyo khaguri, ho nga nga dzi buza khu gutsaka ni valongo ni dzipari dzathu basi.”

U di hadzi khu ginani?

REZUMO

Jehovha a ngu dzina gu khuye hi dzi buza khu sifestana ni valongo ni dzipari dzathu. Ganiolu, o vbweta gu khuye hi si pategi omu nya sifestana si gu mba mu tsakisa.

Siwudziso nyo wusedze

Siwudziso muni si na hi phasago guti gu khethu festa nyo khaguri yi ngu tsakisa Jehovha?
Ginani hi nga girago gasi hi phasa valongo ni dzipari gu pwisisa egi gi hi girago hi si pategi omu nya dzifesta nyo khaguri?
Ho dziti kharini gu khethu Jehovha o vbweta gu khuye hi dzi buza khu gutsaka ni gu hagana?

Gihevbulo gegi gi vbede khu dhiya:

Zama gu gira esi

Thumisa esi u si hevbudego omu nya gihevbulo gegi gasi u hunga gu khuwe u na patega mwendro ne omu nya dziferiyadho dzi girwago omu u vbanyago umo.

Simbe u nga girago:

Your other goal