GIHEVBULO 53

Hatha mihagano yi tsakisago Jehovha

WOMBISA

Jehovha Nungungulu nyo tsake. (1 Thimoti 1:11) Uye o vbweta gu khuye hi tsaka hi bwe hi dzi buza khu womi. Uye a ngu tsaka tepo hi dzi ningago tepo nyo hefemule. Ga gihevbulo gegi hi na wona edzi hi nga londrolago khidzo tepo yathu nyo hefemule khu ndziya yi tsakisago Jehovha.

1. Ginani hi yedego gu gi dundruga tepo hi hathago mihagano?

Ginani u gi golago gu gira ga tepo nyo hefemule? Vambe vo gola gu dzi khaleyana gaya va dzi lereya libhuku, va engiseya muzka, va sistiri filmi mwendro gu beya omu nya internet. Vambe kha va goli gu khala wulanga wumowo, vo oloveya gu pasiyari ni dzipari dzawe, va hambeya mwendro gu jogari hagano nyo khaguri. Ni wevbini hagano hi wu hathago, gu vbwetega hi tiyisega gu khethu wu ngu ‘tsakisa Pfhumu.’ (Vaefeso 5:10) Si na ni lisima gu dundrugeya khesi, kholu gutala nya silo esi vathu va golago gu hagana khiso si na ni silo esi Jehovha a si nyenyago, nya nga wughevenga, wubhayi mwendro wudhemoni. (Leri Ndzimo 11:5.) Ginani gi na hi phasago gu hatha gwadi mihagano yathu?

Ho manega ni dzipari dzi haladzago Jehovha, si na hi vbevbugeya gu hatha mihagano nya yadi. Kha nga hi si wonidego ga gihevbulo 48, ‘wule a gimbiyago ni va nya mapimo, a na mana mapimo.’ Ganiolu ho khaleya gu hagana ni vathu va gu mba yi gola milayo ya Nungungulu, hi na “thegedwa khu libango.” — Mavingu 13:20.

2. Khu ginani si gu sa lisima gu pima tepo hi vbedzago omu nya mihagano?

Ambari mihagano yathu yo ba yiri yadi, gu vbwetega hi dzi woneya gasi yi si hi beyi ngudzu tepo. Ho mba dzi woneya, mihagano yi nga hi gira hi si tshaledwi khu tepo nyo gire yimbe mithumo nya lisima. Bhibhiliya yo hi kutsa gu ‘sayisa gwadi gikhati hi gu nagyo.’ — Leri Vaefeso 5:15, 16.

GIRA WUGEVISISI NYO ETE

Wona egi gi na gu phasago gu hatha mihagano nya yadi.

3. U nga hagani khu silo si gu mba tsakisa Jehovha

Khu ginani hi yedego gu hatha gwadi mihagano yathu? Sistirini VHIDHYU, mu vbedza mu bhula khu siwudziso sesi.

VHIDHYU: Sivbungadzo muni nyi yedego gu si hatha? (4:39)

Mihagano nya vadwani va Roma wa gale yo fana kharini ni mihagano ya matshigwanaya?
Kha nga hi si wonidego omu nya vhidhyu, ginani egi Khwamba a gi hevbudego khu mihagano?

Lerini Varoma 12:9, mu vbedza mu bhula khu giwudziso gegi:

Lowo wowu wu nga gu phasa kharini tepo u hathago mihagano?

Khu sevbini silo nyo khaguri esi Jehovha a si nyenyago? Lerini Mavingu 6:16, 17 ni Vagalatiya 5:19-21. Hwane nyo leri milowo yeyi, bhulani khu giwudziso gegi:

Khu sevbini silo si ganedwego avba nya mavhesi yaya u si wonago omu nya mihagano ya matshigwanaya?

Ndziya nyo hathe khiyo mihagano

Dzi wudzise khuwe:

Hagano wowu wu na ni silo nyo khaguri esi Jehovha a si nyenyago?
Ina hagano wowu wu ngu nyi tandregisa gu gira mithumo nya lisima?
Ina hagano wowu wu ngu nyi tshanganisa ni vathu va gu mba haladza Jehovha?

Gwadi ngudzu gu gimbileya hwindzo ni mhango. Khu kharato, ho ba hi kanakana gu khethu hagano nyo khaguri khwadi mwendro ne, tshukwana gu gimbileya hwindzo nawo

4. Thumisa gwadi tepo yago

Sistirini VHIDHYU, mu vbedza mu bhula khu siwudziso sesi.

VHIDHYU: Ginani gi woneleyago tepo yago? (2:45)

Ndriyathu wa omu nya vhidhyu kha nga ba a sistiri silo nyo vivbe. Ganiolu khu gevbini gigaradzo hi gi wonago gwaye?

Lerini Vafilipi 1:10, mu vbedza mu bhula khu giwudziso gegi:

Lowo wowu wu nga hi phasa kharini gu ghema tepo hi na vbedzago khu mihagano?

5. Hatha gwadi mihagano yago

Lisine gu yimbe mihagano kha yi mu tsakisi Jehovha, ganiolu gu na ni silo nya singi hi nga haganago khiso. Lerini Muhevbudzi 8:15 ni Vafilipi 4:8, mu vbedza mu bhula khu giwudziso gegi:

Khu yevbini mihagano u yi golago?

Gu na ni mihagano nya yingi nya yadi u nga dzi buzago khiyo

VAMBE VARI KHAVO: “Kha sa vivba gu sistiri filmi mwendro gu leri libhuku li ganeyago khu wughevenga, wubhayi mwendro wudhemoni. Egi gi vbwetegago, gu mba gira silo sesi.”