Jesu khuye Hungo nya libandla nya Wukristo. (Vaefeso 5:23) Muhuno Jesu a ngu thangeya valandreyi vaye mafuni nari khu ndzadzini khu gu thumisa “githumi nya gutumbege ni nya gugengeye.” (Leri Matewu 24:45.) Jesu khuye a nga emisa “githumi” gegi a bwe a gi ninga thumo nyo khathaleye libandla. Ambari olu gi khathaleyago libandla, githumi gegi gyo thumeya Kristo ni vandriyaye. Khu mani githumi gegi? Gyo hi khathaleya kharini?

1. Khu mani “githumi nya gutumbege ni nya gugengeye?”

Jehovha tepo yatshavbo thumiside muthu moyo mwendro tsawa nya vama gasi gu ninga sileletelo vathu vaye. (Malakiya 2:7; Vahebheru 1:1) Hwane nya gufe ga Jesu, vapostoli ni madhota ya Jerusalema khavo va nga ba va gira thumo wowu. (Mithumo 15:2) Khiso sa simweso si giregago muhuno. Jehovha o thumisa tsawa nya wudugwana nya madhota, a gu Huwo nya Guthangeye nya Dzifakazi dza Jehovha, gasi gu hi ninga guhodza nya liphuvbo ni gu thangeya thumo nyo tshumayele. Tsawa wowu khigyo “githumi nya gutumbege ni nya gugengeye egi [Jesu] a gi ningidego thumo” wowu nyo khathaleye vathu va Jehovha. (Matewu 24:45a) Satshavbo sivbango nya Huwo nya Guthangeye Makristo ma todzidwego khu liphuvbo nya guage. Avo va na fuma ni Kristo ndzadzini hwane nyo ba wu vbede womi wawe mafuni.

2. Githumi nyo tumbege gyo va ninga kharini guhodza ga liphuvboni vathu va Jehovha?

Jesu a di khuye githumi nya gutumbege gi hadzi ‘ninga guhodza sithumi saye khu tepo yakone.’ (Matewu 24:45b) Kha nga olu guhodza gu hi ningago tshivba ni womi nya wadi, guhodza ga liphuvboni — a gu sihevbudzo nya Lito la Nungungulu — gu ngu hi ninga tshivba nyo simame gu tumbega ga Jehovha ni gu gira thumo hi ningidwego khu Jesu. (1 Thimoti 4:6) Guhodza gogo ga liphuvboni ho gu mana omu nya mitshangano nya libandla, dziasembleya, dzikongresu, mabhuku ni dzivhidhyu dzi seketedwago omu nya Bhibhiliya. Guhodza gogu gwatshavbo nya liphuvbo gu ngu hi phasa gu pwisisa gugola ga Nungungulu ni gu tiyisa wupari wathu naye.

 GIRA WUGEVISISI NYO ETE

3. Vathu va Jehovha gu vbwetega va sasamedzwa gwadi

Na yi thangedwa khu Jesu, Huwo nya Guthangeye yi ngu sasamedza thumo nya Dzifakazi dza Jehovha. Khiso si nga ba si girega ga Makristo nyo pheye. Sistirini VHIDHYU.

Lerini 1 Vakorinto 14:33, 40, mu vbedza mu bhula khu giwudziso gegi:

• Mavhesi yaya mo yeyedza kharini gu khayo Jehovha o vbweta gu khuye vathu vaye va sasamedzwa gwadi?

4. Githumi nya gutumbege khigyo gi sasamedzago thumo wathu nyo tshumayele

Gu tshumayela wu diri uwo thumo nya lisima ngudzu ga Makristo nyo pheye. Lerini Mithumo 8:14, 25, mu vbedza mu bhula khu siwudziso sesi:

• Khu mani a nga ba a woneleya thumo nyo tshumayele wu nga ba wu girwa khu Makristo nyo pheye?

• Ina Pedro ni Johane va dzumede gu thangedwa khu vapostoli vakwawe?

Thumo nya lisima ngudzu wu girwago khu Huwo nya Guthangeye gu woneleya thumo nyo tshumayele. Sistirini VHIDHYU.

 Jesu ganede ngudzu khu lisima nyo tshumayele. Lerini Marko 13:10, mu vbedza mu bhula khu siwudziso sesi:

• Khu ginani Huwo nya Guthangeye yi wonago thumo nyo tshumayele na wuri wa lisima ngudzu?

• Khu ginani hi vbwetago “githumi nya gutumbege ni nya gugengeye” gasi gu sasamedza thumo wowu nya mafu yatshavbo?

5. Githumi nya gutumbege gi ngu hi ninga sileletelo

Huwo nya Guthangeye khiyo yi ningago sileletelo Makristo ya mafuni gwatshavbo. Vo gira kharini isoso? Wona edzi huwo nya guthangeye ya dziteponi dza Makristo nyo pheye yi nga ba yi gira khidzo isoso. Lerini Mithumo 15:1, 2, mu vbedza mu bhula khu siwudziso sesi:

• Gigaradzo muni gi nga ba gi garadza Makristo nyo pheye?

• Khu mani oyu Pawulo, Bharinabha ni vambe va nga mu vbweta gasi gu ta lulamisa gigaradzo gyogyo?

Lerini Mithumo 15:12-18, 23-29, mu vbedza mu bhula khu giwudziso gegi:

• Na yi si gu hungi gu khiyo ginani yi na girago, huwo nya guthangeye ya dziteponi dza vapostoli yi di gu pheya khu gu vbweta guti mawonelo ya Nungungulu khu gilo gyogyo. Va di gu gira kharini isoso? — Wona mavhesi 12, 15 ni 28.

Lerini Mithumo 15:30, 31 ni 16:4, 5, mu vbedza mu bhula khu siwudziso sesi:

• Ina Makristo nyo pheye ma engiside gileletelo ma nga ningwa khu huwo nya guthangeye ya tepo yoyo?

• Jehovha kategiside kharini guengisa gwawe?

Lerini 2 Thimoti 3:16 ni Jakobe 1:5, mu vbedza mu bhula khu giwudziso gegi:

• Huwo nya Guthangeye yo hunga kharini silo muhuno?

 REZUMO

Huwo nya Guthangeye khiyo “githumi nya gutumbege ni nya gugengeye” gi emisidwego khu Kristo. Vandriyathu vava vo ninga sileletelo ni gu thangeya thumo nyo tshumayele nya Makristo mafuni gwatshavbo.

Siwudziso nyo wusedze

• Khu mani a emisidego “githumi nya gutumbege ni nya gugengeye”?

• Huwo nya Guthangeye yo hi khathaleya kharini?

• U ngu khodwa gu khuwe Huwo nya Guthangeye khiyo “githumi nya gutumbege ni nya gugengeye”?