Tepo hi manegago ni vandriyathu, ho dzipwa nga Pfhumu Dhavhidhe, a nga khuye: “Nga pwani gutshamba ni gutsakisa, [vandruye] va gu vbanya dangamwedo khu gupwanana!” (Ndzimo 133:1) Ganiolu gupwanana gogu khandri go halahala gu manega. Muthu ni muthu gu vbwetega a gira gipandre gyaye.

1. Ginani gi hlamadzisago ga vathu va Jehovha?

Wo hongola ga tshangano nya libandla omu nya limbe litigo, u na wona gu khuwe ambari olu u gu mba pwisisa lidimi lolo, u na dzipwa na uri gaya. Khu ginani? Khu gu mafuni gwatshavbo ho hevbula Bhibhiliya khu gu thumisa mabhuku ya mamowo. Nigu ho dzi garadzeya gu yeyedzana lihaladzo. Ambari olu hi tago khu malanga nyo hambane, hatshavbo ha “gu rana lina la [Jehovha], ni gu mu thumela khu monyo moyo mwendro gupwanana.” — Sofoniya 3:9.

2. Ginani u nga girago gasi gu andrisa gupwanana?

“Haladzanani khu gyanu khu myonyo yanu yatshavbo.” (1 Pedro 1:22) U nga wu thumisa kharini wusingalagadzi wowu? Khedza makhalelo nya yadi ya vambe, u diga sihosohoswana sawe. Vbavbandze nyo gire wupari basi ni vathu va golago silo sa simweso u si golago, zama guti vambe vandriyathu. Gu vbwetega hi dzi garadzeya gambe gu fuvisa ni yevbini tsheta nya gihatheya hi gu nagyo. — Leri 1 Pedro 2:17. a

3. Ginani u na girago wo tshuka u gandrana ginyalana ni ndriyathu?

Hi ngu pwanana, ganiolu kha ha vbeleya. Dzimbe dzitepo, hi ngu tshuka hi zangarisana. Khu kharato, Bhibhiliya yo hi kutsa gu “tsetselelana mwendro gu divaleyana,” yi bwe khiyo: “Tsetselelanani kha nga [Jehovha] a mi tsetseledego.” (Leri Vakolosi 3:13.) Jehovha hi ngu mu ghoheya dziteponi nya dzingi, ganiolu a ngu hi divaleya. Khu kharato, o vbweta gu khuye anethu hi divaleya vandriyathu. Wo wona gu khuwe u zangariside muthu, pheya khuwe gu ya bhudzisana naye. — Leri Matewu 5:23, 24. b

 GIRA WUGEVISISI NYO ETE

4. Diga gihatheya

Gu vbwetega hi haladza vatshavbo vandriyathu. Ganiolu si nga hi garadzeya gu haladza muthu a wonegago na hambana ni ethu. Ginani gi na hi phasago? Lerini Mithumo 10:34, 35, mu vbedza mu bhula khu siwudziso sesi:

• Jehovha mwalo gihatheya; ni wevbini muthu a dzinago, a nga mu khozeya. Isoso si nga gu pasa kharini gu tshukwadzisa mawonelo yago khu vathu va wonegago na va hambanide nago?

• Githatheya muni gi wonegago omu u vbanyago umo nigu khu ginani u vbwetago gu gi potsa?

Lerini 2 Vakorinto 6:11-13, mu vbedza mu bhula khu giwudziso gegi:

• U nga gira kharini gasi u hidzimeleya vandriyathu va wonegago na va hambanide nago?

5. Divaleya na si khugeya monyoni u bwe u wusa gurula

Li mwalo litshigu si na tshukago si lomba gu khiso hi mu divaleya Jehovha. Ambari ulolo, uye a ngu hi divaleya. Lerini Ndzimo 86:5, mu vbedza mu bhula khu siwudziso sesi:

• Jehovha a gu divaleya kala hayi?

• Khu ginani u bongago divalelo wa Jehovha?

• Siemo muni si nga hi tandregisago gu pwanana ni vambe?

Hi nga mu pimedzeya kharini Jehovha ni gu bwe hi simama gu pwanana ni vandriyathu? Lerini Mavingu 19:11, mu vbedza mu bhula khu giwudziso gegi:

• Wo zangariswa khu muthu, ginani u nga girago gasi gu lulamisa gigaradzo gyogyo?

 Dzimbe dzitepo hi ngu tshuka hi zangarisa vambe. So tshuka isoso si girega, ginani hi yedego gu gira? Sistirini VHIDHYU, mu vbedza mu bhula khu giwudziso gegi.

• Kha nga hi si wonidego omu nya vhidhyu, ginani egi ndriyathu a giridego gasi gu wusa gurula?

 REZUMO

U nga phasa libandla gu simama gu pwanana khu gu divaleya vambe ni gu haladza vatshavbo vandriyathu.

Siwudziso nyo wusedze

• U nga diga kharini gihatheya?

• Ginani u na girago wo tshuka u zangarisana ni ndriyathu nyo khaguri?

• Khu ginani u vbwetago gu pimedzeya giyeyedzo gya Jehovha khu gu divaleya vambe?