Makristo nya lisine ma dzi emisede gu mba diga gilo mwendro muthu a va digisa gu khozeya Jehovha. Kha hi kanakani gu khethu khidzo u dzi pwago khidzo nuwe. Jehovha a ngu gu ninga lisima gutumbega gwago. (Leri 1 Dzikoronika 28:9.) Khu sevbini siemo si nga lingago gutumbega gwago, nigu u nga emisana naso kharini?

1. Vambe vathu va nga linga kharini gutumbega gwathu ga Jehovha?

Vambe vathu va na zama gu hi digisa gu thumeya Jehovha. Khu vamani avo vovo? Vambe vathu va digidego lisine va ngu ganeleya malipha khu hengeledzano ya Nungungulu gasi gu songa gukhodwa gwathu. Avo vo ranwa pwani vawugeyi. Vbavbandze nya isoso, vathangeyi nyo khaguri nya dzitshetshe va ngu swayela malipha gasi ava va nga ne tiya gukhodwani va diga lisine. Si na ni mhango gu zama gu bhula ni vawugeyi vovo, gu zama gu leri mabhuku yawe, gu beya omu nya dzisaite dzawe mwendro gu sistiri dzivhidhyu dzawe. Nga wona esi si ganedwego khu Jesu khava va zamago gu gira vambe va diga gu thumeya Jehovha: “Mu nga garadzegi khavo. Avo sikhumu si hetedzago sikhumu. Kholu gikhumu gya gu hetedza gimbe gikhumu, vatshavbo va na thegeya phalani.” — Matewu 15:14.

Ahati o tshuka muthu hi mu tigo a hunga gu diga gu khala Fakazi ya Jehovha ke? Si ngu vbisa ngudzu o tshuka muthu hi mu golago a gira isoso. Adzina muthu yoyo a nga hi gurumedza gu hatha gu khethu ga uye ni Jehovha ho hatha mani. Gu vbwetega hi khala na hi dongide gu simama hi tumbega ga Jehovha guvbindra ni wevbini muthu. (Matewu 10:37) Khu kharato, hi ngu engisa nayo wa Jehovha nya gu hi si giri wupari ni vathu nya nga vovo. — Leri 1 Vakorinto 5:11.

2. Esi hi hungago gu gira so yeyedza kharini gu khiso hi ngu tumbega ga Jehovha?

Gu haladza Jehovha si na hi kutsa gu mba dzi bedzedzeya omu nya wukhongeyi nya malipha. Isoso so thula gu khiso kha hi giri gipandre nya hengeledzano yi yelanago ni wukhongeyi nya malipha. Isoso si nga pata thumo mwendro gimbe gilo hi gi girago. Jehovha a ngu hi gengedza khuye: “Dugani enu vathu vangu khu [Bhabhiloni nya Khongolo].” — Gutuledwa 18:2, 4.

 GIRA WUGEVISISI NYO ETE

3. Dzi woneye ga sihevbudzo nya malipha

Ginani hi yedego gu gira ho tshuka hipwa silo nyo vivbe khu hengeledzano ya Jehovha? Lerini Mavingu 14:15, mu vbedza mu bhula khu giwudziso gegi:

• Khu ginani hi gu mba yela gu khodwa ni gevbini hi gi pwago?

Lerini 2 Johane 10, mu vbedza mu bhula khu siwudziso sesi:

• Hi yede gu va wona kharini vawugeyi?

• Ambari ho mba bhula ni vawugeyi khu ndziya nyo kongome, hi nga sengedzedwa kharini khu sihevbudzo sawe?

• Ina Jehovha a di hadzi dzipwa kharini ho khaleya gu engiseya malipha khuye ni hengeledzano yaye?

4. Simama gu tumbega ga Nungungulu o tshuka ndriyathu a gira gighoho

Ginani hi yedego gu gira ho tshuka hiti gu khethu ndriyathu nyo khaguri giride gighoho nya gikhongolo? Wona esi Nungungulu a embedego va na Israyeli dziteponi dza gale. Lerini Levhi 5:1.

Kha nga li ganeyago livhesi leli, ho tshuka hiti gu khethu ndriyathu giride gighoho nya gikhongolo, gu vbwetega hi embeya madhota. Ganiolu, gupheya gwadi gu kutsa muthu yoyo gu ya bhula ni madhota a ma embeya gighoho gyaye. O bomba gu hongola, hi na yeyedza gutumbega gwathu ga Jehovha khu gu embeya madhota satshavbo hi si tigo. Ho gira isoso, hi na ba hi yeyedza kharini lihaladzo nyo tumbege . . .

• khu Jehovha Nungungulu?

• khoyu a giridego gighoho?

• khu vambe libandlani?

 5. Duga khu guvbeleya ga Bhabhiloni nya Khongolo

 REZUMO

Gasi hi simama na hi tumbegide ga Jehovha, gu vbwetega hi diga gu gira wupari ni vale va gu mba tumbega gwaye. Vbavbandze nya isoso, gu vbwetega hi duga khu guvbeleya omu nya wukhongeyi nya malipha.

Siwudziso nyo wusedze

• Khu ginani hi gu mba yela gu sistiri, gu leri mwendro gu engiseya mahungu ya vawugeyi?

• Hi yede gu va phara kharini vale va gu mba dzina gambe gu khala Dzifakazi dza Jehovha?

• Hi nga engisa kharini gigengedzo nyo duge khu guvbeleya khomu nya wukhongeyi nya malipha?