GIHEVBULO 60

Simama gu tiyisa wupari wago ni Jehovha

WOMBISA

Ndrani nya gihevbulo gyago nya Bhibhiliya, u hevbude silo nya singi khu Jehovha. Nigu satshavbo u hevbudego si gu giride u engedzeya gu mu haladza nyo bwe adzina saye u hendzeledza womi wago gwaye u bwe u bhabhatiswa. Wo ba u si bhabhatiswi, adzina saye u ngu pimisa gu gira isoso nya mba hweya. Ganiolu gubhabhatiswa khandrayo mahegiso. Gu vbwetega u simama gu tiyisa wupari wago ni Jehovha kala gupindruga. Khu ndziya muni?

1. Khu ginani u yedego gu simama gu tiyisa wupari wago ni Jehovha?

Gu vbwetega hi dzi garadza gasi gu simama gu tiyisa wupari wathu ni Jehovha. Khu ginani? “Gasi hi si ndreyi” gwaye. (Vahebheru 2:1) Ginani gi nga hi phasago gu simama hi thumeya Jehovha khu gu tumbega? Khu gu hi si digi gu tshumayela ni gu bwe hi vbwetedzeya dzimbe dzindziya nyo gire nyasingi thumoni wa Jehovha. (Leri Vafilipi 3:16.) Gu thumeya Jehovha khiyo ndziya nya yadi ngudzu nyo londrole khiyo womi wathu! — Ndzimo 84:10.

2. Ginani gimbe u yedego gu simama gu gira?

Ambari olu gihevbulo gegi nya Bhibhiliya gi vbohidego mahegiso, gu vbwetega u simama gu vbanya kha nga Mukristo. Bhibhiliya yari khiyo gu vbwetega hi ‘ambala muthu nya muphya’, mwendro gu vbwetega hi pimedzeya makhalelo ya Jehovha khavba hi si kodzago khavbo. (Vaefeso 4:23, 24) Gasi hi si kodza isoso, gu vbwetega hi simama gu hevbula Bhibhiliya ni gu hongola mitshanganoni. Ho simama gu hevbula silo nya siphya khu Jehovha ni makhalelo yaye, hi bwe hi vbindrugedza esi si vbwetegago womini gwathu, hi na tsakisa monyo wa Papayi wathu, Jehovha.

3. Jehovha a na gu phasa kharini gu simama u tiyisa wupari wago naye?

Bhibhiliya yari khiyo: “Nungungulu . . . a na mi kategisane, a mi tiyisela, a mi ninga tshivba ni gutiya nya lisine.” (1 Pedro 5:10) Hatshavbo hi ngu tshangana ni silingo. Ganiolu Jehovha a ngu hi ninga esi si vbwetegago gasi hi simama gu tumbega gwaye. (Ndzimo 139:23, 24) A ngu tumbisa gu hi ninga gudogoreya ni tshivba nyo mu thumeye khu gutumbega. — Leri Vafilipi 2:13.

GIRA WUGEVISISI NYO ETE

Wona edzi u nga simamago khidzo u tiyisa wupari wago ni Jehovha ni edzi a na gu kategisago khidzo womini gwago.

4. Simama gu bhula ni Pari yago nya yikhongolo

Gu gombeya ni gu hevbula Bhibhiliya si gu phaside gu khala pari ya Jehovha. Ganiolu, silo sesi si nga gu phasa kharini gu tiyisa wupari wago naye?

Lerini Ndzimo 62:8, mu vbedza mu bhula khu giwudziso gegi:

Gasi gu tiyisa wupari wago ni Jehovha, u nga tshukwadzisa kharini milombelo yago?

Lerini Ndzimo 1:2, mu vbedza mu bhula khu giwudziso gegi:

Gasi gu tiyisa wupari wago ni Jehovha, u nga tshukwadzisa kharini guleri gwago nya Bhibhiliya?

U nga gira kharini gasi u phasega ngudzu khu gihevbulo gyago nya muthu enga? Gasi gu wona mawonelo nyo khaguri, sistirini VHIDHYU, mu vbedza mu bhula khu siwudziso sesi.

VHIDHYU: Tshukwadzisa gihevbulo gyago nya muthu enga (5:22)

Mawonelo muni u ma wonidego omu nya vhidhyu u dogoreyago gu ma yedza?
Khu yavbini mahungu u nga ba u tsakeya gu hevbula?

5. Dundrugeya khu dzimbe dzindziya nyo thumeye khidzo Jehovha

Wo dundrugeya khu dzimbe dzindziya nyo thumeye khidzo Jehovha, si na gu phasa gu simama gu tiyisa wupari wago naye. Sistirini VHIDHYU, mu vbedza mu bhula khu giwudziso gegi.

VHIDHYU: Womi nyo tsakise (3:31)

Cameron phasegide kharini khu gu dzi gireya makungo nyo engedzeye thumo waye ga Jehovha?

Khandri vatshavbo va si kodzago gu rura va hongola ga limbe litigo va ya phasedzeya thumo nyo tshumayele. Ganiolu, hatshavbo hi nga dzi gireya makungo nyo engedzeye thumo wathu ga Jehovha. Lerini Mavingu 21:5, mu vbedza mu bhula khesi u nga girago . . .

libandlani.
thumoni nyo tshumayele.

Livhesi leli li nga gu phasa kharini gu gira isoso?

Simbe silo u nga dzi emiseyago gu gira

Gu tshukwadzisa milombelo yago.
Gu leri Bhibhiliya yatshavbo.
Guti vathu vatshavbo libandlani.
Gu pheya ni gu gimbidzisa gihevbulo nya Bhibhiliya.
Gu thuma kha nga piyonero nyo phasedzeye mwendro nya tepo yatshavbo.
Wo ba uri ndriyathu nya mwama, gira satshavbo u si kodzago gasi u khala muphasedzeyi nya libandla.

6. Vbanya nu tsakide kala gupindruga!

Lerini Ndzimo 22:26, mu vbedza mu bhula khu giwudziso gegi:

Ginani u nga girago gasi u vbanya nu tsakide muhuno ni kala gupindruga?

REZUMO

Simama gu tiyisa wupari wago ni Jehovha u bwe u dundrugeya khu dzimbe dzindziya nyo thumeye khidzo Jehovha. Wo gira isoso, u na vbanya nu tsakide kala gupindruga!

Siwudziso nyo wusedze

Khu ginani u nga khodwago gu khuwe Jehovha a na gu phasa gu mu thumeya khu gu tumbega?
U nga tiyisa kharini wupari wago ni Jehovha?
Khu ginani gu dzi vegeya misuwo nya liphuvbo si nga tiyisago wupari wago ni Jehovha?

Nyi vbedzide libhuku leli khu dhiya:

Zama gu gira esi

Ga migima yi tago, leri mabhuku Achegue-se a Jeová ni “Ngona u ndzi landzela.” Mabhuku yaya ma na gu phasa gu simama u tiyisa wupari wago ni Jehovha gumogo ni Gyanana gyaye, Jesu.