Mawonelo yathu khu malilo ni madzingelo yathu so seketedwa omu nya sihevbudzo nya Bhibhiliya, nya nga esi si landreyago:

•   Kha sa vivba gu liya wo ba u fedwe khu muthu u mu gu golago. Khu giyeyedzo, vapizane va Jesu va lide tepo va nga fedwa khu vathu va nga ba va va gola. (Johane 11:33-​35, 38; Mithumo 8:2; 9:​39) Khu kharato, kha hi woni malilo nga gilo nyo hagane khigyo. (Muhevbudzi 3:​1, 4; 7:​1-4) Ganiolu ho gu wona nga tepo nyo pweye wusiwana vambe, mwendro gu yeyedza lihaladzo ni gu thaveleya vambe.​ — Varoma 12:15.

•   Ava va fudego kha vati gilo gambe. Ambari na hita khu wulanga nyo hambane mwendro na hiri ni mitumbunugo nyo hambane ni vambe, kha hi giri sihena si seketedwago omu nya gihevbudzo nyo khigyo ava va fudego va nguti gilo nigu va nga hi phasa khomu va gomogo. (Muhevbudzi 9:​5, 6, 10) Isoso so pata sihena nya nga gu pilekeyana ni girumbi, dzimisa, gu phaseya dzinguluve, gu bhula ni ava vafudego ni gu hamba magufa. Ethu kha hi giri ni gimwegyo nya sihena sesi kholu hi ngu engisa nayo wowu nya Bhibhiliya: “Dugani khu vbakari gwawe . . . mu nga khuhini gilo nya gunyenyeze.” ​— 2 Vakorinto 6:​17.

•   Gomo gutumba nya guwuswe ga ava va fudego. Bhibhiliya yo hevbudza gu khiyo gu na ba gu romo guwuswa ga ava va fudego nigu yi nguta tepo eyi gu no ne gufa muthu. (Mithumo 24:15; Gutuledwa 21:4) Kha nga edzi gutumba gogu gu phasidego khidzo maKristo nyo pheye, gu ngu hi phasa nethu gu mba vbisega ngudzu ni gu mba gira sihena si gu mba tsakisa Nungungulu.​ — 1 Vatesalonika 4:​13.

•   Bhibhiliya yo hi kutsa gu dzi nogisa. (Mavingu 11:2) Ethu kha hi woni malilo nga wulanga nyo yeyedze vathu gu khethu “hi naso”. (1 Mavingu 2:​16) Kha hi giri malilo nyo dhure khu gu gireya gu gireya gu ndrindra gupima nya vathu. Nigu kha hi rengi dzikaxawu nyo dhure ngudzu mwendro gu ambala sombo nya dzimodhamodha gasi gu hlamadzisa vathu.

•   Kha hi gurumedzi muthu gu dzumeya sihevbudzo sathu nya malilo. Khu lisine, ethu ho thumisa litshina leli nya nayo: “Muthu ni muthu a naya dzi ganelela abune gwa Nungungulu.” (Varoma 14:12) Ganiolu, ho ningwa lithomo, hi ngu zama gu tshamuseya sihevbudzo sathu “khu monyo gurule ni githawo.”​ — 1 Pedro 3:​16.

 Wulanga wakona: Ndranga nyo khaguri yo hunga gu gira tshangano nya malilo, yi nga hatha gu gira Salawuni nya Mufumo, avba gu giredwago avba malilo, ga ndranga nyo khaguri, avba va kremarigo avbo mwendro simitero.

 Esi si giregago: Go vegwa ganelo nya gu thaveleye ava va fedwego yi tshamuseyago esi Bhibhiliya yi ganeyago khu gufa ni gutumba nya guwuswe ga ava vafudego. (Johane 11:25; Varoma 5:​12; 2 Pedro 3:​13) Ndrani nya tshangana wowo gu nga khumbugwa makhalelo nya yadi ya oyu a fudego, adzina khu gu yeyedza esi hi si hevbulago ga giyeyedzo nya gukhodwa gwaye. — 2 Samuweli 1:​17-​27.

 Gu ngu embeledwa ndzimo yi seketedwago omu nya Bhibhiliya. (Vakolosi 3:​16) Tshangano wowu wo segwa khu nombelo nyo thaveleye.​ — Vafilipi 4:​6, 7.

 Gitiki mwendro mihengo: Kha hi livbiseyi dzitsapawu khu mithumo yathu nya wukhongeyi, gupata ni malilo. Kha hi hengiseyi dzitsapawu mitshanganoni yathu.​ — Matewu 10:8.

 Khu vamani va dzumeledwago gu manega?: Ambari ava va sirigo Dzifakazi dza Jehovha anavo va ngu dzumeledwa gu manega avba nya tshangano nya malilo wu giredwago Salawuni nya Mufumo. Gufana ni eyi yimbe mitshangano yathu, avba nya malilo gambe, ni wevbini muthu tshulegide gu hongola.

 Fakazi ya Jehovha mweyo ni mweyo yo dzi hungeya yabune khu gu thumisa livhalo layo li hevbudzidwego khu Bhibhiliya. (1 Thimoti 1:​19) Ganiolu, kha hi pategi omu sigiro nya wukhongeyi si gu mba yelana ni esi Bhibhiliya yi si hevbudzago. ​— 2 Vakorinto 6:​14-​17.