Lisine: Ethu hi ngu khodwa gu khethu Jesu Kristo muvbulugisi wathu, nigu hi ngu gira satshavbo hi si kodzago gasi gu “landreya khu gu tumbega migondro yaye.” — 1 Pedro 2:21; Luka 2:11.

 Lisine: Ethu hi ngu khodwa avba nya gu wuswe ga Jesu; ha gu gu wona nga gihevbudzo nya litshina avba nya gukhodwa nya Mukristo nigu hi ngu gu tshingisa thumoni nyo tshumayele. — 1 Vakorinto 15:3, 4, 12-15.

 Lisine: Ethu hi ngu haladza sanana sathu nigu hi ngu gira satshavbo hi si kodzago gasi gu si trenari ni gu si phasa gasi si tsaka. — Tito 2:4.

•   Feriyadhu nya Phasika ya muhuno kha yi seketedwi khu Bhibhiliya.

•   Jesu a hi rumide gu dundruga gufa gwaye nasiri gu wuswa gwaye. Ethu hi ngu gira Gidundrugiso nya gufa gwaye khu mwaga ni mwaga guya khu kalendharyu nya Bhibhiliya. — Luka 22:19, 20.

•   Ethu hi ngu khodwa gu khethu siolovedzo nya Phasika yi girwago muhuno, sitago khu gale kha si dzumeledwi khu Nungungulu. Nungungulu a gu vbweta gu khuye a ‘khozedwa uye basi,’ nigu a ngu khunguvanyega khu silo si patago silo a gu mba si tsakeya. — Ekisodha 20:5; 1 Dzipfhumu 18:21.

 Ethu ha gu khodwa gu khethu makungo yathu nya gu mba gira Phasika ma gu seketedwa khu Bhibhiliya, yi hi kutsago gu thumisa “guti nya lisine”nasiri gu landrisa siolovedzo nya vathu. (Mavingu 3:21; Matewu 15:3) Tepo hi bhulago ni vambe khesi hi si khodwago va bwe va hi wudzisa maningano ni Phasika, ethu hi ngu ninga githawo esi moyo ni moyo a hungidego gu gira. — 1 Pedro 3:15.