Dzifakazi dza Jehovha kha dzi pategi nyimbitunu khu sighelo sesi:

1.   Gu engisa Nungungulu. Bhibhiliya ya gu ganeya gu khiyo sithumi sa Nungungulu si di hadzi ‘gu vbindrugedza matshari yawe ma khala mavbadza.’ — Isaya 2:4.

2.   Gu engisa Jesu. Jesu a di embeya mupostoli Pedro gu khuye: “Bweledza xipadha wulangani wayo, kholu vatshavbo va thumisago xipadha va na songwa khu xipadha.” (Matewu 26:52) Khu ndziya yeyi, Jesu a di yeyedza valandreyi vaye gasi va si phari matshari gasi gu hongola nyimbitunu.

    Valandreyi va Jesu va gu engisa gileletelo nya gu mba gira “gipandre nya litigo” khu gu mba dzi bedzedzeya omu nya politika. (Johane 17:16) Avo kha va wugeyi esi si girwago khu masotshwa ambari gu himbedzeya vambe vathu gu hunga gu thuma kha nga masotshwa.

3.   Gu haladza vathu. Jesu a di ruma vapizane vaye gu “haladzana”. (Johane 13:34, 35) Khu ndziya yeyi, vandriyathu va mafuni gwatshavbo va di hadzi gu haladzana, nigu gima va di hadzi gu mba dwana khu gyawe. — 1 Johane 3:10-12.

4.   Giyeyedzo nya Makristo nyo pheye. The Encyclopedia of Religion and War ya gu ganeya gu khiyo: “Valandreyi nyo pheye va Jesu, kha va nga ba va seketeya nyimbi nigu kha va nga ba va thuma kha nga masotshwa,” va di gu wona isoso na si si “pwanani ni lihaladzo la Jesu ni gileletelo nya gu haladze valala vathu.” Teólogo nyo khaguri nyo pwani khu German Peter Meinhold a di ganeya gu khuye: “Gu khala Mukristo khu tepo yayimweyo nari u musotshwa kha si gimbileyanani.”

 Dzifakazi dza Jehovha, sivbango si phasago vathu nigu kha va yeyedzi mhango omu va vbanyago umo. Ethu hi ngu yeyedza githawo mifumo guya khu sileletelo si landreyago:

•   “Gu vbwetega hi engisa dzipfhumu dzi hi fumeyago.” — Varoma 13:1.

•   “Khu kharato, livbani ga Sezari esi si gu sa Sezari, ganiolu ga Nungungulu esi si gu sa Nungungulu.” — Matewu 22:21.

 Khu kharato, ethu ha gu engisa milayo, hi livba mikhupo ni gu seketeya gudzigaradza gu girwago khu mifumo gasi gu phasa vathu.