“Wa gu ba u khodwa gu khuwe Bhibhiliya lito la Nungungulu, so yeyedza gu khiso Nungungulu a ngu ganeya ni ethu. . . . Gasi gu wukhongeyi wago wu gu phasa gu vbindrugedza womi wago, gu vbwetega [Bhibhiliya] na yi vbindrugedzedwe khu maganelelo ma thumiswago tshigu ni tshigu.” Aya malito ma lovidwego khu Alan S. Duthie omu nya libhuku laye li gu khilo Bible Translations and How to Choose Between Them.

Ava va golago Lito la Nungungulu va ngu dzumeleyana nawo malito yaya. Va ngu khodwa khu monyo watshavbo gu khavo “Milowo yatshavbo yi lovidwe khu tshivba ya Nungungulu, yi ngu phasa gu hevbudza ni gu kawuka ni gu luleka, ni gu dandrisa khu gululama.” (2 Thimoti 3:16) Ambari olu Bhibhiliya li gu libhuku la gale, yi ngu ‘vbanya nigu yi na ni tshivba.’ Iyo yi ngu yeyedza dzindziya nya gu lulamise sigaradzo sathu sa tshigu ni tshigu. (Vahebheru 4:12) Gasi gu libhuku leli nya guage li pwisisega gwadi ga ava va na li lerigo, gu vbwetega li thumisa maganelelo ni malito ma thumiswago khu vathu tshigu ni tshigu.

Khu kharato, ava va golago Lito la Nungungulu va tsakide ngudzu khu guduswa nya Bhibhiliya — Matewu khu Gitonga. Dzifakazi dza Jehovha dzi tiviside guduswa nya Bhibhiliya yeyi yi thumisago maganelelo ya tshigu ni tshigu avba nya Mitshangano mivili nya Guhathege yi giridwego khu gu thumisa Televhizawu, dziradhiyu nyo khaguri ni JW Stream, khu 14 ni 15 nya Novembro nya 2020. Ndriyathu Amaro Teixeira, a gu givbango nya Kometi nya Litamo ya Moçambique khuye a tivisidego guduswa nya Bhibhiliya yeyi, gupata ni eyi nya Gironga. Vahuweleyi va ganeyago Gitonga va vbindrago 527, kha va pharegi khu gutsaka kholu va hakhidego Ivhangeli ya Matewu yi thumisago maganelelo ya tshigu ni tshigu. Tshangano wowu wu sistiridwe khu guvbindra 19 mil vathu. Bhibhiliya yeyi yi ngu pwisisega gwadi nigu yi tumbegide. Khu kharato, olu vathu si ngu va vbevbugeya gu pwisisa gwadi mahungu ya Nungungulu khu Gitonga guvbindra gale. Adzina u nga dzi wudzisa gu khuwe: Khu vamani va nga vbindrugedzeya Bhibhiliya yeyi nyo hlamadzise?

Ambari olu Wuvbindrugedzeyi nya Mafu nya Maphya wo ngo pheyago gu duga khu Gitonga, uwo wu phede gu manega gukhugeya khu 1950. Khu mwaga wowo, wu dusidwe khu Gingiza khu Watch Tower Bible and Tract Society​—a gu Sociedade Bíblica nya mayigo nya mangi yi dusago Bhibhiliya gukhugeya gale. Mukhedzeiseyi nya 15 nya Setembro nya 1950 (khu Gingiza), wu di khuwo: “Vama va wumbago kometi nya wuvbindrugedzeyi nya Bhibhiliya va yeyedzide gu khavo kha va nga ba va vbweta gu tidwa khu muthu nigu ne kha va nga ba va vbweta gu khavo malina yawe ma lowa wulangawu ambari na va fude. Makungo nya Bhibhiliya yeyi gu dhumisa lina la Nungungulu nya lisine a vbanyago.”

Wuvbindrugedzeyi nya Mafu nya Maphya nya Milowo nya Guage (khu Gingiza) wu dusidwe kha nga vholumi mweyo nya Bhibhiliya khu 1961. Kha nga olu malina ya vavbindrugedzeyi vakona ma simamago gu mba tidwa khu muthu kala muhuno, kha hi kanakaneyi gukhodwa gwawe nigu kha si thuli gu khiso va di mba wu gira gwadi. Malito nyo pheye nya Bhibhiliya yi dusidwego khu 2013, mari khayo: “Khu kotani nya olu hi dzi tigo gu khethu mahungu ma lovidwego omu nya Bhibhiliya ma na ni lisima, hi giride satshavbo hi nga si kodza gasi hi si vbindrugedzi gilo kholu hi ngu yi ninga githawo Bhibhiliya. Hi ngu dziti gu khethu kha si vbevbugi gu vbindrugedzeya mahungu nya Bhibhiliya khu ndziya nyo tumbege. . . . Egi hi nga ba hi gi vbweta gu diri gu vbindrugedzeya Bhibhiliya yi ganeyago lisine na yi gu vbevbuga gu yi leri ni gu yi pwisisa, ganiolu na hi si vbindrugedzi gilo avba nya milowo ya gale.”

Kala muhuno, gu ghandlidwe guvbindra 240 dzimiliyoni nya Dzibhibhiliya khu 195 malimi ni guvbindra nya rumba mwendro khu sipandre mafuni gwatshavbo. Ginani va gi tugudego ava va leridego Bhibhiliya yeyi?

Jesu hevbudzide vapizane vaye gu gombeya, khavo: “Papayi wathu u gu romo ndzadzini, lina lago li na agiswe.” (Matewu 6:9) Bhibhiliya yari khiyo lina la Nungungulu khu, Jehovha, nigu lina leli lomo omu nya Bhibhiliya tanga nya 7000 malanga. (Ekisodha 3:15; Ndzimo 83:18) Hwane nya gufe ga vapostoli va Jesu, libandla nya Wukristo li di thapedwa khu mawonelo nya guvivbe ya Vajudha nya vangi va nga ba va nyenya gu thumisa lina la Nungungulu. (Mithumo 20:29, 30; 1 Thimoti 4:1) Ava va nga kopiyareya sipandre nya Milowo nya Gigreki va di pheya gu tshikedza lina la Nungungulu, Jehovha, khu malito ma gu khayo “Nungungulu” mwendro “Pfhumu.”

Kometi nya Wuvbindrugedzeyi nya Mafu nya Maphya yi di bweledzeya lina la Jehovha omu nya Milowo nya Gigreki nya Wukristo. * Lina leli lo manega 237 malanga omu nya Milowo yoyo. Vavbindrugedzeyi vovo khandri va di si khugeya va li bweledzeya basi lina leli, ganiolu va phede khu gu gevisisa kala va mana sighelo nyo pwale nya gu va li bweledzeya. Khu giyeyedzo, Luka 4:​18 a gu khumbuga malito ya Isaya 61:1. Omu nya milowo nya gupheye nya Gihebheru, lina, Jehovha, li di romo omu nya livhesi leli la Isaya. Khigyo gi giridego gu Wuvbindrugedzeyi nya Mafu nya Maphya wu theya lina Jehovha omu ga Luka 4:18, wu gu khuwo: “Liphuvbo la Jehovha lomo vbatshani gwangu, kholu uye a nyi todzide gasi gu tshumayela mahungu nya yadi ga sisiwana.”

Lina leli la gu phasa valeri gu hambanisa Jehovha Nungungulu ni Gyanana gyaye gi velegidwego gyonga, Jesu Kristo. Khu giyeyedzo, Dzibhibhiliya nya dzingi dzo vbindrugedzeya Matewu 22:44, khidzo: “Pfhumu a di embela Pfhumu yangu.” (Bhibhiliya nya Guage) Ganiolu, khu mani a ganeyago ni mani? Malito nya livhesi leli, ma dusidwe omu ga Ndzimo 110:1. Omu nya Ndzimo yeyi, lina la Nungungulu lomo khu Gihebheru. Khu kharato, Bhibhiliya — Matewu yi vbindrugedzede Matewu 22:44 khu ndziya yeyi: “Jehovha a di embeya Pfhumu yangu.” So dzegeya gu wonega gu khiso khu Jehovha a ganeyago ni Gyanana gyaye Jesu, kha si lombi gu vidzwa khu gu phuphuteya. (Marko 13:32; Johane 8:17, 18; 14:28) Si na ni lisima gu si pwisisa esi kholu khiso si pharidego womi wathu. Mithumo 2:21, wari khuye: “Ni wevbini a gombeyago khu lina la Jehovha a na vbanyiswa.”

Gu giridwe mizamo nya yikhongolo nya gu milowo nya Gigreki yi vbindrugedzedwa khu ndziya nyo tumbege yi bwe yi vbevbuga gu yi pwisisa ni gu thumisa maganelelo ma thumiswago khu vathu muhuno. Khu giyeyedzo, Wuvbindrugedzeyi nya Mafu nya Maphya wo dzi garadzeya gu vbindrugedzeya dzivherbho nya Gigreki dzi pwala gwadi. Ga malimi nya mangi ya matshigwanaya, dzivherbho dzo thumisedwa gu ganeya tepo eyi silo gi nga girega khiyo — a gu silo si giregidego gale, si giregago olu, mwendro si na giregago teponi yi tago. Dzivherbho nya Gigreki nidzo dzi ngu yeyedza edzi gilo gyakona gi giregidego khidzo — si di girega khu gitepwana, si vbede, mwendro si nga gu girega. Nga dundrugeya khu malito ya Jesu ma gomogo omu ga Matewu 6:33. Verbho nya Gigreki yi gu khiyo gu “simama” yo thula gilo gi giregago gi hongola mbeli. Khu kharato, mongo watshavbo nya esi si ganedwago khu Jesu wu ngu wonega avba nya malito yaya: “Simamani gu vbwetedzeya Mufumo wa Nungungulu ni gululama gwaye gupheya, esi simbe satshavbo mu na engedzeledwa.” Matewu 7:7 nuye vbindrugedzedwe kharati: “Simamani gu lomba, mu na ningwa; simamani gu vbwetedzeya, mu na si mana; simamani gu khokhotha, mu na tuledwa.” — Varoma 1:32; 6:2; Vagalatiya 5:15.

Guduswa nya libhuku la Matewu khu Gitonga maphelo basi. Hi na ni makungo nyo vbindrugedzeye Bhibhiliya yatshavbo khu gu gimbiya nya tepo. Ina Tonga a na leri Bhibhiliya yeyi apwa gutshamba ga gumogo a bwe a yi wona na yi tumbegide nga eyi nya Gingiza?

Kha hi kanakani gu khethu a na gupwa, kholu thumo wowu nya guvbindrugedzeye Bhibhiliya wa gu woneledwa gwadi khu Huwo nya Guthangeye nya Dzifakazi dza Jehovha. Gu hungidwe gu thumo wowu nya gu vbindrugedzeye Bhibhiliya wu girwa khu tsawa, vbavbandze nya gu wu girwa khu muthu moyo. (Mavingu 11:14) Khu kharato, gu emisidwe mitsawa nya guvbindrugedzeye Bhibhiliya mafuni gwatshavbo. Gu emisidwe Departamento de Serviços de Tradução tsindza nya mafu yatshavbo nya Dzifakazi dza Jehovha gasi gu seketeya mitsawa yeyi, gu hlamula siwudziso sa vavbindrugedzeyi, ni gu pwananisa malimi nyo hambanehambane ma vbindrugedzeyago Bhibhiliya yeyi nya Wuvbindrugedzeyi nya Mafu nya Maphya. Vbavbandze nya isoso, gu giridwe programa nya komputadhori nyo pwani i Watchtower Translation System gasi gu phasa vavbindrugedzeyi nya Bhibhiliya. Gimwegyo nya silo si girwago khu programa yeyi gu yeyedza edzi lito ni lito nya Gihebheru mwendro nya Gigreki li vbindrugedzedwego khidzo omu nya Bhibhiliya nya Gingiza. Isoso si ngu phasa vavbindrugedzeyi guti malito va na ma hathago khu lidimi lawe. Ganiolu, u nga dzi sengi: Avba nya thumo nya wuvbindrugedzeyi vathu va ngu thuma ngudzu. Ganiolu, programa yoyo yi vbevbugiside ngudzu thumo wu nga ba wu yela gu girwa khu mitsawa nya vavbindrugedzeyi nya Bhibhiliya — a gu gu vbindrugedzeya Bhibhiliya yeyi nya Wuvbindrugedzeyi nya Mafu nya Maphya khu ndziya nyo tumbege ni gu pwisisega kha nga eyi nya Gingiza.

Hi ngu gu kutsa gu khethu u dzi buza khu gu leri Bhibhiliya — Matewu. U nga yi leri khomu nya interneti mwendro khomu nya JW Library, mwendro gu lomba nyo ghandlwe khu gu gimbiya nya tepo omu nya libandla nya Dzifakazi dza Jehovha li manegago omu u khalago umo. U na bwe u tsakiswa khu silo nya singi u na si manago ndrani gakona: dziletra nyo wonege ni gu lerega gwadi; sasamedzo nya esi si gomogo ndrani nya libhuku ni libhuku, owu wu ningago mahemanyana nya libhuku ni libhuku wu bwe wu phasa gu vbiredza gu mana mavhesi u ma vbwetago. Gilo nya lisima ga satshavbo khu gu u nga leri Bhibhiliya yeyi nu tiyisega gu khuwe yo ganeya mahungu ya Nungungulu yi bwe yi ganeya edzi vathu va ganeyago khidzo tshigu ni tshigu.

Esi si gomogo ndrani nya libhuku leli: Gipandre gegi u na gi mana gupheyani nya libhuku ni libhuku. Gyo thumeya gu gu phasa gu vbiredza gu mana mavhesi nya Bhibhiliya u ma tigo

Yi vbindrugedzedwe khu ndziya nyo tumbege: Gu giridwe mizamo nya yikhongolo nya gu milowo nya Gigreki yi vbindrugedzedwa khu Gingiza, khavbovbo yi vbindrugedzedwa khu Gitonga khu ndziya nyo tumbege ngudzu ni lisine

Dziletra nyo wonege gwadi: Gu thumisidwe dziletra nyo wonege gwadi gasi milowo yi lerega gwadi

Mavhesi ma sasamedzidwe khu dzindrimana: Wulangani nya gu livhesi ni livhesi li khala ndrimana, mavhesi ma di patwa wulanga wumowo gasi ma khala dzindrimana gasi gu phasa Tonga gu longoloka gwadi ni mulovi nya Bhibhiliya

Mitshamuselo ya vbavbatshi: Go thudwa mambe maganelelo nya lito lolo la limwedro, maganelelo nyo kongome nya Gigreki nya lito lolo ni yimbe mitshamuselo