“Si di gira nga khatshi Jehovha a dipwa guliya ga vavelegi.” Ayoyo malito ma ganedwego khu muvelegi nyo khaguri na gu ganeya khu dzivhidhiyu Khala pari ya Jehovha.

Gukhugeya dzi nga duswa dzivhidhiyu nyo pheye, Dzifakazi dza Jehovha dzi ngu dusa dzivhidhiyu nyo tsakise dza Kalebhi ni Sofiya. Dzivhidhiyu dzedzi, dzi ngu hevbudza sanana gu manega ni mavbanyelo nya yadi ni gu si hevbudza khu liphuvboni, nya nga gu si hevbudza gu khiso khu ginani si si yeligo guba nigu si nga gombeya kharini ga Nungungulu.

Dzivhidhiyu dzi vbindrugedzedwe khu 131 malimi, gasi gu phasa sanana sa mafuni gwatshavbo.

Mamayi nya 5 sanana, a di lova khuye: “Gukhugeya hi nga hakha dhisku nya vhidhiyu Escuta, obedece e serás abençoado, semana yi nga vbeya, hi yi wone 50 nya dzitepo.”

Gyadzyana gimwegyo nyo pwani khu Millie, gi gu na ni 12 myaga, gya Inglaterra, gi na ni ndruye nyo pwani khu Thomas, a gu na ni sindrome de Down. Millie a di lova, khuye: “Thomas a di theya dzivhidhiyu dza Kalebhi ni Sofiya omu nya iPad waye gasi a ya yeyedza dzikolega dzaye xikwatunu. Thomas a ngu dzi gola ngudzu dzindzimo dzedzi nigu a ngu kodza gu dzi embeleya gwadi nyo bwe a lidzisa ndriyathu nyo khaguri nya nyamayi.”

Ava, khanga uye mune a ganedego, na ni 8 myaga ni 9 migima ni 25 matshigu, a di lova khuye: “Kalebhi ni ndriyaye va ngu kodza gu hevbudza gwadi sanana.”

Mikaylah, a di lova khuye: “Nyi na ni 6 myaga. Nyi ngu bonga ngudzu khu dhisku nya vhidhiyu Escuta, obedece e serás abençoado. Dzo nyi hevbudza gu engisa vavelegi vangu kholu Jehovha a ngu tsaka khiso isoso.”

Lidzaha limwedo li sirigo Fakazi ya Jehovha li thumago gu gira dzivhidhiyu nya sibhonekana li di wona vhidhiyu Robar é mau. Li di hlamala ngudzu, ngudzungudzu tepo li ngati gu khilo vhidhiyu yile yi giridwe khu tsawana nya vathu nya wudugwana. Li di khilo: “Nyi nguti vathu va girago dzivhidhiyu nya sibhonekana gasi dzi thumisedwa silo nya sikhongolo ni esi nya sidugwana. Nyi ngu tumba gu kheni va ngu thuma ngudzu gasi gu giredzeya isoso. Ganiolu, vo thumisa tepo yawe ni tshivba yatshavbo gasi gu gira silo si na girago vathu va hega khu gitepwana basi. Narigu enu, sibhonekana sangu si ngu vbindrugedza mavbanyelo nya sanana, si hevbudza sanana guti silo nya sadi ni esi nya guvivbe, ni gu si phasa gu hatha silo nya sadi guvbanyani. Sibhonekana sanu kha mu giri nya mu gire, ganiolu mo gira sibhonekana si na phasago vathu.”

Vavelegi nya vangi mafuni gwatshavbo va ngu dzumeleyana ni malito yaya. Mamayi nyo khaguri a di lova, khuye: “Gyanana gyangu, Quinn, nya 3 myaga, gi di gu sistiri vhidhiyu Quem pode ser amigo de Jeová?. Vbakari nya ndzimo, gi di nyi khedza, khavbovbo gi vega libogo lagyo avba nya monyo wagyo, khiyo: ‘Mamayi, vhidhiyu yeyi yi ngu nyi tsakisa ngudzu.’”