Guti edzi hi girago khidzo mitshangano yathu. Vbwetedzeya wulanga hi tshanganago avbo vbafuvbi ni omu u khalago umo.

Dzifakazi dza Jehovha dza gu tshangana guvili khu semana gasi gu khozeya Nungungulu. (Vahebheru 10:24, 25) Mitshanganoni yoyo, yi giredwago vathu vatshavbo, ha gu hevbula esi Bhibhiliya yi si ganeyago ni edzi hi nga thumisago khidzo sihevbudzo sayo guvbanyani gwathu.

Ava va manegago mitshanganoni yoyo va ngu tala gu ningedzwa gasi va hlamula mwendro gu tshamuseya esi hi si hevbulago ni edzi hi nga si thumisago khidzo. Mitshangano yathu yo pheya ni gu hegisa khu ndzimo ni nombelo.

Kha si gurumedzi gu muthu a khala Fakazi ya Jehovha gasi gu manega mitshanganoni yathu. Ni wevbini muthu a ngu ranwa gu ta manega. Kha gu livbwi gilo. Gambe kha gu girwi mihengo.