Akaambo kakuti bayanda Jehova abasimayakilane babo, Bakamboni baJehova bakambawuka mulumbe wamuBbayibbili kubantu boonse, kuswaanizya abaabo bakali kukaka kukambawukilwa kumasaangunino. (Mateyo 22:37-39) Kuyanda Leza kupa kuti tuswiilile mulawu ngwaakaamba Mwanaakwe wakuti “tupe bukamboni buzwide.” (Milimu 10:42; 1 Johane 5:3) Kuti tuchite oobo, tweelede kwiinkilila kunembo kukambawuka mbuli mbubakali kuchita bapolofita baLeza bachiindi. (Jeremiya 25:4) Akaambo kakuti tulabayanda basimayakilane besu, tuleezya kubabuzya “makani mabotu aaBwaami” aapa buumi kuswaanizya abaabo bakakaka kukambawukilwa kumasaangunino.—Mateyo 24:14.

 Nga twazoojana bantu bali aachiyandisyo chiindi nitubweeda kumaanda aakali aabantu batakwe chiyandisyo. Amubone twaambo tutatu:

•   Bantu balalonga.

•   Bamwi bakkala aang’anda aawo balakonzya kutondeezya chiyandisyo.

•   Bantu balachincha. Zintu zilikuchitika munyika naakuti zyiimo nzibaswaana bantu mubuumi nga zyapa kuti babone “kuti beelede kuzulwidwa aaLeza” akuti bayande kukambawukilwa. (Mateyo 5:3) Nikuba aabo bakazya balakonzya kuchincha mbuli mbaakachita mwaapostoli Pawulu.—1 Timoti 1:13.

 Nikuba oobo, tatufosi bantu pe kuti baswiilile mulumbe ngutukambawuka. (1 Petro 3:15) Tusyoma kuti muntu umwi awumwi weelede kulisalila kukomba Leza.—Deuteronomo 30:19, 20.