Mbukunga tuli Bakamboni baJehova, tuleezya kulisimya mpuli zyesu azyabasimayakilane. Tulamulemeka Leza akaambo kakuti nguwe Wakatalisya mpuli. (Matalikilo 2:21-24; Baefeso 3:14, 15) Kwiinda muBbayibbele, uyiisya njiisyo zilikugwasya bantu munyika yoonse kuti basimye lukwatano lwabo akuti babotelwe.

 Tubeleka changuzu kuti tutobele malayilile aamuBbayibbele, nkaambo atugwasya kuti tube balumi, banakazi abazyali balikabotu. (Tusimpi 31:10-31; Baefeso 5:22–6:4; 1 Timoteyo 5:8) Busongo buli muBbayibbele bulabagwasya nobaba aabo bali mumpuli iinjila zikombelo zisiyene-siyene. (1 Petro 3:1, 2) Amulange-lange nzibakaamba bantu batali Bakamboni ibakwete naakuti bakwetwe kubantu bakazooba Bakamboni baJehova:

•   “Minyaka yakusaanguna iili 6 njitwakakkalaamwi yakali yankondo luzutu akukataazikana. Ivete naakaba umwi waBakamboni baJehova, wakaba aluyando alubo wakatalika kubaamoyo mulamfu kwiinda chiindi. Kuchincha ooku kwakapa kuti lukwatano lwesu luzumanane.”—Clauir, wakuBrazil.

•   “Teendakabotelwa pe chiindi mulumaangu Chansa naakatalika kwiiya Bbayibbele aBakamboni baJehova akaambo kakuti ndakali kuyeeya kuti baanzaania mpuli. Kuzwa waawo, ndakabona kuti Bbayibbele lilikutugwasya loko mulukwatano lwesu.”—Agness, wakuZambia.

 Mumulimu wesu wakukambawuka, tutondeezya basimayakilane busongo buli muBbayibbele mbubukonzya kubagwasya

•   Kusala kabotu muntu wakukwatanaawe

•   Kuzwidilila mumunyaka wakusaanguna mulukwatano

•   Kukkala abanyokozyala awusozyala

•   Kwiibelesya kabotu mali

•   Kuleka kukazyania

•   Kwiiya kulekelela

•   Kuyiisya bana

 Kwaamba choonzyo, chimwi chiindi kweeta kutamvwanana. Muchikozyano, mulipoti yamu1998 yakapegwa aba research company Sofres kwakajanika kuti mumuchado uumwi aakati kamichado iili 20 kuti umwi kali Kamboni bakali kujana mapenzi miingi akaambo kakuti umwi wachincha chikombelo.

 Jesu wakaamba kuti aabo batobela njiisyo zyakwe zimwi ziindi balakonzya kupenzegwa mumpuli. (Matayo 10:32-36) Will Durant, syaabusongo mumakani aachiindi wakaamba kuti muBweendelezi bwamaRoma, “chikombelo chamaKristu chakapegwa mulandu wakwaanzaania mpuli,” a alubo Bakamboni baJehova bamwi bapegwa mulandu uuli boobu mazubaano. Pesi eezi zyaamba kuti Kamboni nguwe uuyeta kutamvwanana na?

 Nibakali kubeteka mulandu Bakamboni baJehova nibakatamikizigwa kuti baanzaania mpuli, baEuropean Court of Human Rights bakaamba kuti bamumpuli batali Bakamboni chiindi chiingi mbabo bayeta kutamvwanana akaambo kakuti tabayandi “kuzumina akulemeka lwaangunuko lwabukombi ndwalaalo muntu umwi awumwi mumpuli lwakutobela nzyayiya kuchikombelo chakwe.” Nkuta yakayungizya kuti: “Eechi chilijalinkene kumpuli zyoonse zinjila zikombelo zisiyene-siyene, kuswaanizya aBakamboni baJehova.” b Nikuba chiindi Bakamboni baJehova nibakazigwa akaambo kabukombi, baleezua kutobela lulayo lwamuBbayibbele lwakuti: “Mutapilusizyi muntu uuli woonse bubi. . . . Kamusoleka kusikila mpomugolela kukkala muluumuno abantu boonse.”—Baroma 12:17, 18.

 Bakamboni batobela lulayo lwamuBbayibbele lwakukwata “buyo mu Mwami,” zyaamba kuti, kukwata muntu uusyoma nzibasyoma. (1 Bakorinto 7:39) Mulawu ooyu uzwa muBbayibbele alubo ulagwasya. Muchikozyano, chiiyo chamu2010 chakazwa mubbuku lyakuti Journal of Marriage and Family chakaamba kuti “bantu bakwetene banjila chikombelo chikozyenie, bachita zintu munzila iikozyenie alubo basyoma zintu zikozyenie” bamvwanana loko. c

 Nikuba boobo, Bakamboni tabasungwaazyi aabo bakwetwe aabantu batali Bakamboni kuti baanzaane ambibakatwenaabo. Bbayibbele lyaamba kuti: “Ikuti mukwesu umwi kajisi mukaintu uutasyomi, pele mukaintu ooyo kalisungwide kukkala anguwe, atamusiyi pe; alimwi ikuti mukaintu kajisi mulumi uutasyomi, pele kalisungwide kukkala anguwe, atamusiyi pe mulumaakwe.” (1 Bakorinto 7:12, 13.) Bakamboni baJehova balawuswiilila mulawu ooyu.