Bakamboni baJehova babelesya busanduluzi bwamaBbayibbele busiyene-siyene. Pesi mumilaka ilaaBbaibbele lyaBusanduluzi Bwanyika Mpya tuvuzya kubelesya Bbayibbele eeli nkaambo lilaazina lyaLeza, ndyachoonzyo alubo lilamvwisisika.

•   Libelesya zina lyaLeza. Bamwi basikupupulula baBbayibbele bakakachilwa kubweedezya amwi makani aandawu yawo. Muchikozyano, bumwi busanduluzi bwaBbayibbele bulaamundando wamazina aabantu aayinda ku70 aabantu bakatola lubazu mukupanga Bbayibbele eelyo. Zigambya nzyakuti, Bbayibbele ndileelyo bakajampa zina lyamunaaBbayibbele Jehova Leza.

   Kusiyana azeezi, muBbayibbele lyaBusanduluzi Bwanyika Mpya zina lyaLeza lyakabweedezya koonse mpulyakali kujanika mumalembe aachiindi pesi mazina aabantu bakali mukkomiti yakusandulula eeyi taalembedwe pe.

•   Lyaamba choonzyo. TeemaBbayibbele woonse pe aalembedwe mbuli mbuwakabede mulumbe waBbayibbele mumalembe aachiindi. Muchikozyano, limwi Bbayibbele lisandulwidwe munzila eeyi muli Matayo 7:13: “Amunjile mumulyango uusyanikide, nkaambo mulyango uutola kuhelo ulikwazeme alimwi nzila iitola nkuko njuubauba.” Nokuba boobo, mulaka wakusaanguna ubelesya bbala lyakuti “lunyonyooko” kutali “helo.” Kulakonzeka kuti basanduluzi bakabelesya bbala lyakuti “helo” akaambo kakusyoma kuti basizibi bayoopenzegwa kukabe kutamani mumulilo wahelo. Pesi Bbayibbele talizuminani pe amuzeezo ooyu. Pesi Bbayibbele lyaBusanduluzi bwa Nyika Mpya lisandulwidwe munzila yachoonzyo litii: “Amunjile mumulyango uusyanikide nkaambo nzila iitola kulunyonyooko ilikwazeme alimwi nimpati.”

•   Lilamvwisisika. Busanduluzi bulikabotu tabugoleli akwaamba zintu munzila iilinjiyo luzutu pesi bweelede kusalazya kaambo kabikkwe aantanganana kamvwisisike. Amulange-lange chikozyano eechi. Mulugwalo lwa Baroma 12:11, mwaapostolo Pawulu wakabelesya bbala lyaamba “kubila kwamuuya.” Mbukunga bbala eeli talimvwisisiki kabotu mumilaka yamazubaano pesi Bbayibbele lyaBusanduluzi bwa Nyika Mpya libelesezye bbala litakataazyi pe kumvwisisisya. Lyaamba kuti maKristu beelede ‘kupya moyo akaambo kamuuya.’

 Kunze lyakuba aazina lyaLeza, mukwaamba twaambo munzila iilinjiyo alubo akusalazya twaambo, Bbayibbele lyaBusanduluzi bwa Nyika Mpya lisiyene kule loko aamwi maBbayibbele: Talyuuzigwi pe. Eezi zilikupa kuti mamiliyoni aabantu balakonzya kubala Bbayibbele mumulaka wabo—kuswaanizya abaabo batakonzyi kuula Bbayibbele.