Bakamboni baJehova tabasekeleli pe mazuba aakuzyalwa nkaambo tusyoma kuti kusekelela kuli boobu takumubotezyi pe Leza. Nikuba kuti Bbayibbele talikasyi zilaantanganana pe kusekelela mazuba aakuzyalwa, pesi lilatugwasya kuziba zintu ziswaanizidwe mumapobwe aali boobo alubo litutondeezya mbaabona Leza. Amulange-lange zintu zili 4 akubona njiisyo zyamuBbayibbele ziswaanizidwe.

1.   Mapobwe aakusekelela buzuba bwakuzyalwa akatalisigwa aabantu batakombi Leza. Kweendelana abbuku litegwa Funk & Wagnalls Standard Dictionary of Folklore, Mythology, and Legend mbolyaamba, mapobwe aaya ayeeme kunjiisyo yakuti chiindi muntu naazyalwa, “myuuya mibi nga yabalwana aabo basekelela” akuti “kusika kwabeenzinyina akwaamba majwi mabotu kulakonzya kukwabilila basikusekelela.” Bbuku litegwa The Lore of Birthdays lyaamba kuti chiindi, kuziba buzuba bwakuzyalwa “kwakali kugwasya kuziba buumi bwamuntu mbubuyooba kunembo” kweendelana “alwiiyo lwanyenyeezi luswaanizya kuziba ziyoochitika kunembo.” Bbuku eeli lyakayungizya kwaamba kuti “makkandela aabelesegwa mubuzuba bwakuzyalwa alaamanguzu aazyamasalamusi aakulongezya muntu.”

    Kusiyana azeezi, Bbayibbele talizumizyi pekubelesya masalamusi, kusonda, kukomba mizimu naakuti “cintu cili boobu.” (Deuteronomo 18:14; Bagalatiya 5:19-21) Alubo kamwi kaambo kakapa kuti Leza atabotelwi amuunzi waBbabbiloni wachiindi nkakuti bantu bakuBbabbiloni bakali kupandulula bweende bwanyenyeezi, kuchita oobu njiimwi nzila yakusonda. (Isaya 47:11-15) Eezi tazyaambi kuti chiindi choonse Bakamboni baJehova balanga-langa zilengwa zyabantu zyoonse; nikuba boobo, chiindi Magwalo naatuzulwida munzila iisalala, tulaabikkila maanu.

2.   MaKristu bakusaanguna teebakali kusekelela pe mazuba aakuzyalwa. Bbuku litegwa The World Book Encyclopedia, lyaamba kuti “kusekelela buzuba bwakuzyalwa bakali kukubona kuti nchilengwa chabantu batakombi Leza.” Bbayibbele litondeezya kuti baapostolo abamwi bakayiisigwa chaantanganana aJesu, bakatusiila chikozyano cheelede kutobelwa aamaKristu boonse.—2 Batesalonika 3:6.

3.   MaKristu balayililwa kuti bayeeye lufu lwaJesu kutali buzuba bwakuzyalwa. (Luka 22:17-20) Eezi tazyeelede kutugambya pe nkaambo Bbayibbele lyaamba kuti “buzuba bwakufwa mbubotu kwiinda buzuba bwakuzyalwa.” (Mukambausi 7:1) Kuzoosika kumamanino aabuumi bwakwe anyika, Jesu wakaba aazina bbotu kuli Leza, eezi zyakapa kuti buzuba mbwaakafwa bube buzuba buyandikana loko kwiinda boobo mbwaakazyalwa.—Bahebrayo 1:4.

4.   Bbayibbele taakwe mpulyaamba kuti kuli mubelesi wa Leza wakasekelela buzuba bwakuzyalwa. Teekuti pe makani aaya akalubwa kubikkwa muBbayibbele nkaambo lilaamba kujatikizya bantu babili bakatali kukomba Leza bakasekelela mazubaabo aakuzyalwa. Nikuba boobo, zyakachitika amapobwe aabantu babili aaba teezyakali zibotu pe.—Matalikilo 40:20-22; Marko 6:21-29.

 Mbuli mbubachita bazyali boonse, Bakamboni ambabo batondeezya mbubabayanda bana babo munyaka woonse, kuswaanizya akubapa zipo akuba aachiindi chakulikondelezya ambabo. Baleezya kutobelezya chikozyano chiinda zikozyano zyoonse chaLeza ooyo uupa zintu zibotu kubana bakwe chiindi choonse. (Matayo 7:11) Bana baBakamboni tabalimvwi kuti kuli chintu nchibanga bayiminwa pe, kweendelana atwaambo tutobela:

•   “Kulabotelwa kupegwa chipo aachiindi nchinditalangilili.”—Tammy, uulaaminyaka iili 12.

•   “Nikuba kuti tandipegwi zipo mubuzuba mbundakazyalwa, bazyali bangu balanduulila zipo kutali mubuzuba bwakuzyalwa pe. Eezi zilandibotezya nkaambo nga teendali kuzilangila zintu nzibandipa.”—Gregory, ulaaminyaka iili 11.

•   “Mubonaanga kusekelela kwamaminiti mache luzutu akayimbo kamwi kalizigwa nkukupobola na ooko? Mweelede kuzoovakacha kulindiswe muzoobone pobwe lyachoonzyo mbulichitwa!”—Eric, ulaaminyaka iili 6.