Kuyeeya Muswaangano “Wamunyika Yoonse”
Minyaka iili 50 yayinda Bakamboni baJehova bali 583 bakabweza lweendo lwamviki zili 10 lwakuzyunguluka nyika yoonse. Pesi teelwakali lweendo lwakubona nyika pe. Makanze aabo aakali aakuti bayakane abakombinyina kumiswaangano mipati yakali kutobelana yamu1963 yakali aamutwe utii, “Everlasting Good News.” Akaambo kakuti bakwesu abachizi aaba bakeenda kuti bakaswaanane aBakamboni munyika zyiinda ku20, miswaangano eeyi yakali kutobelana yakayitwa kuti Muswaangano “Wamunyika Yoonse.”
Nkani iiyandikana aamuswaangano umwi awumwi yakali yakuti “Chiindi Leza Natazoobe Mwaami Aanyika.” Nathan Knorr, uuzwa kumawofesi mapati aaBakamboni baJehova, wakapa nkani eeyi kumiswaangano myiingi. Wakapandulula zyiimo mbuzili kwiindilila kubija alubo wakatondeezya zisyomezyo zipati zili muBbayibbele zili atala akubweedezya Paradayizi aanyika. Munyika yoonse, bantu boonse bakaswiilila nkani eeyi bakali 580 509.
Kuzyunguluka “Nyika Yoonse” Mumviki Zili 10
Muswaangano wakatalikila kuMilwaukee, kuWisconsin iili kuU.S.A. Kuzwa waawo, bantu bakali kuzwa kuli zimwi nyika bakeenda kabaya kubuzwe zuba. Nibakazwa kunjila muswaangano wakali kuNew York, bakayinka kuEngland, Sweden, Germany akuItaly. Kubusena bumwi abumwi nkubakali kwiinka bakali kujana mweenya wakukambawuka makani mabotu aazwa muBbayibbele.
Bantu biingi bakkala kundawu eezyo bakali kubotelwa kuti Bakamboni bakali kubaswaya mumaanda aabo. Umwi mwanakazi uukkala kuStockholm iili kuSweden, wakaamba kuti: “Kwabuumi bwangu boonse tandizoofwi ndakuluba pe kuswaya nkumwandichita. . . . Nisimpe na kuti mweenda musinzo woonse ooyu kuti muzoondibuzye zintu nzimusyoma atala aLeza? Muli chilongezyo chipati loko.”
Bantu bazwa kuli zimwi nyika bakazide kumuswaangano teebakabotelwa pe chiindi nibakasika kuAthens kuGreece. Akaambo kakumvwa zyakali kwaambwa abapati bazikombelo. Bapati bamfulumende bakajalisya muswaangano wakeelede kuchitilwa muStadium yaPanathinaikos. Pesi akaambo kakuti Bakamboni bakali basungu teebakamana manguzu pe. Kumamanino aaAugust, bantu basika kuma 10 000 bakakonzya kuswiilila pulogilamu yakachitilwa mumaanda akumbungano zyamubusena oobo.
Nibakazwa kuAthens, bakwesu abachizi bakaya kuLebanon, Jordan, Israel, akuCyprus. Bakombinyina bakabatambula chaluyando. Nibakasika muNicosia kuCyprus, umwi mukwesu wakaamba zyakachitika kunsangu zyakwe wakati: “Chiindi choonse nindibweeda kumuunzi akusamununa nsangu . . . , nga zyabulika . . . , mpawo nga zyaboneka nikwayinda maminiti aali 5 kazipolichidwe!”
Bakwesu abachizi bakazooyinka kuyoonjila muswaangano kunyika zili kuAsia aPacific alubo nkuko kwakali kuyoomanina lweendo lwabo. Bakwesu abachizi bakuIndia, Burma (lino yabutegwa Myanmar), Thailand, Hong Kong, Singapore, Philippines, Indonesia, Australia, Taiwan, Japan, New Zealand, Fiji, and Korea bakabeleka changuzu kuti batambule bakombinyina abamwi bakali kuzwa mumasena aasiyene-siyene munyika zyabo. Bantu biingi bakapulana kakuchili chiindi kuti banjile muswaangano ooyu. Pesi kuli zyakachitikila umwi mwaalumi amusimbi wakwe bakali kuyanda kuchada. Mwaalumi ooyu amusimbi wakwe bakkala kuYokosuka kuJapan. Mwaalumi ooyu naakakumbila bbosi wakwe mazuba aa-off kuti ayinke kuyoonjila muswaangano kuKyoto, bbosi wakwe wakamubuzya kuti muntu uupegwa mazuba kuti kayanda kuya kudilwe naakuti kumuchado luzutu. Mbukunga mwaalumi ooyu amusimbi wakwe bakali kupulana kuchada, bakazoochincha buzuba mbubakali basala kuchadaabo mpawo bakafwambaana kuchada alubo aamwi mazuba bakazoowabelesya kuti banjile muswaangano kwiinda kuti bakalikondelezye mbuli bantu bazwa kuchada.
Lweendo lwakali lwaya kumamanino chiindi nikwakali kuchitwa miswaangano kuHawaii akuCalifornia kumasaangunino aaSeptember. KuPasadena iili kuCalifornia ooko nkwaakali kuyoomanina muswaangano, kwakali bantu biingi kwiinda bantu bakali kulangililwa. Eezi zyakapa kuti kukataazye kweenda mumugwagwa nkaambo kwakali moota zyiingi. Nikuba boobo, limwi pepatwaambo lyakaamba majwi aamupati wamapulisa kati: “Ooyu ngumuswaangano mupati uuli aaluumuno ngunditanabona pe.”
Zintu Zibotu Zitazoolubwi
Zintu zyakachitika aamiswaangano eeyi tuchiziyeeyede ambulisunu. Bbuku litegwa “All Scripture Is Inspired of God and Beneficial” lyakagwisigwa aamuswaangano ooyu alubo bbuku eeli lichibelesegwa kumiswaangano yaBakamboni baJehova.
Harold King kali waba aachiindi chifwiifwi kali waangununwa mujele kuChina
Kwakagwisigwa lwiimbo lupya aamuswaangano wakachitilwa kuNew York. Lwiimbo oolu lwakalembwa aawumwi Kamboni uutegwa Harold King. Harold King wakagwisigwa mujele mu1963 kuChina. Lwiimbo oolu lwakali aamutwe utii, “Ng’anda Ang’anda.” Harold King wakalemba lwiimbo oolu kajalilidwe mukaanda kaniini alubo Bakamboni baJehova bachilwiimba lwiimbo oolu. Lino luzibikenwe kuti “Kuŋanda a Ŋanda.”
Mazubaano, miswaangano mipati iichitwa aaBakamboni baJehova yasiyana. Busena mbuniini mpawo buyanda bantu bache alubo kuti kwaba masena miingi aachitilwa miswaangano zipa kuti bantu bateendi musinzo mulamfu. Mabambe aaya kuswaanizya azimwi zyakachitwa zipa kuti bantu biingi baswiilisisye kunkani zipegwa. Bakamboni baJehova bayinda ku7 miliyoni abamwi bantu banjila miswaangano eeyi munyaka amunyaka. Ulayanda na kuzootujoyina kumuswaangano uutobela? Yanduula busena buchitilwa miswaangano aafwiifwi ankukkala.