Samiyele Wakusaanguna 13:1-23
13 Sawulu wakali aaminyaka iili . . .* naakaba mwaami alubo wakeendelezya mu-Israyeli kwaminyaka iibili.
2 Sawulu wakasala baalumi bali 3 000 kuzwa kuma-Israyeli. Bali 2 000 bakali aaSawulu kuMikkimashi akuchilawu chili aazilundu chakuBbeteli alubo bali 1 000 bakali aaJonatani kuGibbeya iili muchilawu chaBbenjamini. Bamwi bantu boonse wakati beende, umwi awumwi kutente lyakwe.
3 Mpawo Jonatani wakajaya nkamu yamasooja aamaFilisiti yakali kuGebba alubo maFilisiti bakamvwa atala anzizyo. Mpawo Sawulu wakalayilila kuti mweembo ulizigwe munyika yoonse akuti kwaambwe kuti: “MaHebberu abamvwe!”
4 Ma-Israyeli boonse bakamvwa makani aaya aakuti: “Sawulu wajaya nkamu yamasooja aamaFilisiti alubo lino Israyeli waba chintu chinunka nsu kumaFilisiti.” Nkinkaako, bantu bakayitwa kuti batobele Sawulu kuGiligali.
5 Ambabo maFilisiti bakabunganaamwi kuti balwane Israyeli kabali aangolo zyankondo zili 30 000 abasimabbiza bali 6 000 amasooja miingi mbuli museele wakunkomwe yalwizi mpawo bakatanta baakukkempa kuMikkimashi, kubuzwezuba kwaBbeti-aveni.
6 Baalumi bachi-Israyeli bakabona kuti bakali mumapenzi, nkaambo bakali aachiimo chiyumu, nkinkaako, bantu bakayuba mumpako zyamabwe, mumpako, mumabwe mapati, mutwaanda twamunsi amumigodi.
7 Bamwi maHebberu bakazubuka Jodani baya kunyika yaGadi aGiliyadi. Pesi Sawulu wakachili kuGiligali alubo bantu boonse bakali kumutobela bakali kukankama.
8 Wakayinkilila kunembo kalikulinda kwamazuba aali musanu aabili kusikila aachiindi chakabikkidwe aaSamiyele, pesi Samiyele taakasika pe kuGiligali alubo bantu bakasaanguna kusiya Sawulu.
9 Kumamanino, Sawulu wakati: “Amundipe chipayizyo chitentwa azipayizyo zyalumvwanano.” Mpawo wakapa chipayizyo chitentwa.
10 Pesi mbaakamaninsya biyo kupa chipayizyo chitentwa, Samiyele wakasika. Nkinkaako, Sawulu wakazwa kuti akaakumuswaane akuti akamulongezye.*
11 Mpawo Samiyele wakati: “Wachitaanzi?” Sawulu wakasandula kati: “Ndabona kuti bantu balikundisiya akuti iwe teewasika aachiindi chibikkidwe alubo maFilisiti balikubunganaamwi kuMikkimashi.
12 Nkinkaako, ndalibuzya kuti, ‘Lino maFilisiti alaseluka kuti azoondilwane kuGiligali, pesi teendakumbila Jehova kuti andigwasye.’ Nkinkaako, ndabona kakweelela kuti ndipe chipayizyo chitentwa.”
13 Mpawo Samiyele wakati kuli Sawulu: “Wachita chabufuba-fuba. Teewaatobela pe malayilile Jehova Leza wako ngaakupa. Kaansinga waatobela, Jehova walikunoopa kuti bwaami bwako kuma-Israyeli busime kukabe kutamani.
14 Pesi lino bwaami bwako tabuchizookkalilili pe. Jehova uzooyanduula muntu weendelana aamoyo wakwe alubo Jehova uzoomusala kuti abe muzulwidi wabantu bakwe, nkaambo iwe teewaatobela pe malayilile Jehova ngaakulayilila.”
15 Kuzwa waawo, Samiyele wakanyampuka weenda kazwa kuGiligali kaya kuGibbeya iili muchilawu chaBbenjamini alubo Sawulu wakabala bantu mpawo kwakajanika kuti wakachili aabaalumi bali 600.
16 Sawulu amwanaakwe Jonatani abantu mbibakali aabo bakali kukkala kuGibbeya iili muchilawu chaBbenjamini alubo maFilisiti bakakkempede kuMikkimashi.
17 Basikunyanga zintu bakali kunoonga bazwa kukkeempu yamaFilisiti kabali tubunga tutatu. Kamwi kabunga kakali kweenda aamugwagwa waku-Ofira kunyika yaShuwali.
18 Kamwi kabunga kakali kweenda aamugwagwa uuya kuBbeti-horoni alubo kabunga kachitatu kakali kweenda aamugwagwa uuya kumugaano uulangene aakkuti lyaZebboyimu,* uutozya munkanda.
19 Aachiindi eecho, teekwakali sikufula nsimbi munyika yoonse yama-Israyeli, nkaambo maFilisiti bakaambide kuti: “Kuchitila kuti maHebberu batafuli panga niliba sumu.”
20 Ma-Israyeli boonse bakeelede kuya kumaFilisiti kuti bakanone milomo yamaamba aabo, mabbida, tuleba amasikela.
21 Mbadalo yakunona milomo yamaamba, mabbida, zibelesyo zili aamenyo aatatu, tuleba achibinzyo chang’ombe yakali pimu.*
22 Mubuzuba bwakulwana, taakwe sumu naakuti panga lyakajanika mukuboko kwabantu bakali aaSawulu aJonatani. Sawulu amwanaakwe Jonatani mbabo abalikke bakali aazilwanisyo.
23 Nkamu yamasooja aamaFilisiti yakali yazwa yayinka kumugwagwa uuya kukkuti lyaMikkimashi.*
Makani Aamunsi
^ Namba yaminyaka yakwe tayijaniki pe mumalembe aachiHebberu.
^ Bamwi bati “akamukombwede.”
^ Bamwi bati “aamusena waZebboyimu.”
^ Eechi nchipimyo chachiindi alubo kweelede kuti chakali kulema zipanzi zibili zyazipanzi zitatu zyashekeli.
^ Bamwi bati “kumusena waMikkimashi.”
