Samiyele Wakusaanguna 3:1-21
-
Samiyele wayitwa kuti abe mupolofita (1-21)
3 Aachiindi eecho, mulombe Samiyele wakali kubelekela Jehova kunembo lya-Eli, pesi jwi lizwa kuli Jehova, teelyakachili kumvwika-mvwika pe mumazuba aayo. Zilengaano zyakali zyacheya.
2 Limwi zuba, Eli wakalilede aandawu yakwe njaakali koona lubbe alubo meso aakwe akali aba aagubilizi. Taakachili kubona kabotu pe.
3 Lambe lyaLeza teelyakalinazimwa pe alubo Samiyele wakalilede mutempele* lyaJehova, oomo mwakali Bbokesi lyaLeza.
4 Jehova wakayita Samiyele. Mpawo wakavwiila kati: “Ndime aano.”
5 Wakachijaana waya kuli Eli mpawo wakati: “Ndime aano, nkaambo wandiita.” Pesi Eli wakati: “Teendakwiita pe. Bweeda ukoone lubo.” Nkinkaako, Samiyele wakabweeda wakoona.
6 Jehova wakayita lubo kati: “Samiyele!” Samiyele wakabuka waya kuli Eli mpawo wakati: “Ndime aano, nkaambo wandiita.” Pesi Eli wakati: “Teendakwiita pe mwanaangu, kuya ukoone lubo.”
7 (Aachiindi eecho, Samiyele taakalinamuziba pe Jehova alubo jwi lyaJehova teelyakalinayubununwa pe kulinguwe.)
8 Nkinkaako, Jehova wakayita lubo kachitatu kati: “Samiyele!” Samiyele wakabuka waya kuli Eli mpawo wakati: “Ndime aano, nkaambo wandiita.”
Aachiindi eechi, Eli wakaziba kuti Jehova nguwe wakali kwiita mulombe ooyu.
9 Nkinkaako, Eli wakati kuli Samiyele: “Kuya ukoone, kuti akwiite lubo weelede kwaamba kuti, ‘Amba Jehova, nkaambo ndimubelesi wako ndiliswiilizizye.’” Mpawo Samiyele wakayinka waakoona aandawu yakwe.
10 Jehova wakasika wayimikila mpawaawo mpawo wakamwiita mbuli mbaakachitide kuli zimwi ziindi kati: “Samiyele, Samiyele!” Mpawo Samiyele wakati: “Amba, nkaambo ndimubelesi wako ndiliswiilizizye.”
11 Jehova wakati kuli Samiyele: “Bona, ndiyanda kuchita chimwi chintu mu-Israyeli chitape kuti mubili wamuntu woonse uuchimvwa utilimuke.
12 Mubuzuba oobo, ndizoochitila Eli zintu zyoonse nzindakaamba atala ang’anda yakwe kuzwa kumasaangunino kusikila kumamanino.
13 Ukamubuzye kuti ndizooyetela ng’anda yakwe lubeta lutamani akaambo kachibi nchazi, nkaambo bana bakwe balikutuka Leza, pesi tali kubakalalila pe.
14 Eezi nzizyo zyapa kuti ndikonke kung’anda ya-Eli kuti chibi chabamung’anda ya-Eli tachizoomaninsigwi aazipayizyo naakuti azipo.”
15 Samiyele wakoona kusikila nibwakacha mpawo wakajula milyango yang’anda yaJehova. Samiyele wakali kuyoowa kubuzya Eli atala achilengaano.
16 Pesi Eli wakayita Samiyele kati: “Samiyele mwanaangu!” Mpawo Samiyele wakati: “Ndime aano.”
17 Wakati: “Wakubuzyaanzi? Ndikumbila utandisisili pe. Leza akusubule alubo ayungizye chisubulo eecho kuti undisisile niliba jwi limwi kumajwi woonse ngaakubuzya.”
18 Nkinkaako, Samiyele wakabuzya Eli zintu zyoonse, taakwe nzyaakamusisila pe. Eli wakati: “NguJehova. Achite zintu zyoonse zilikabotu mumeso aakwe.”
19 Samiyele wakayinkilila kunembo kukomena, alubo Jehova lwakwe wakali aanguwe alubo taakalekela majwi aakwe woonse kuti atazuzikizigwi.*
20 Ma-Israyeli boonse kuzwa kuDani kusika kuBbeeri-shebba bakaziba kuti Samiyele wakali wasalwa kuba mupolofita waJehova.
21 Alubo Jehova wakayinkilila kunembo kulibonia kuShilo, nkaambo Jehova wakaliyubununa kuli Samiyele kuShilo kwiinda mujwi lyaJehova.
