Samiyele Wakusaanguna 31:1-13
-
Kufwa kwaSawulu abana bakwe balombe batatu (1-13)
31 MaFilisiti bakali kulwana aama-Israyeli. Mpawo baalumi bachi-Israyeli bakachija kunembo lyamaFilisiti alubo biingi bakajayigwa aaChilundu chaGilibbowa.
2 MaFilisiti bakaandilila Sawulu abana bakwe kusikila babeenzya mpawo bakajaya bana baSawulu, Jonatani, Abbinadabbu aMalikki-shuwa.
3 Nkondo yakamukomenena loko Sawulu mpawo basitwaanta bakamujana bamuchisa loko.
4 Mpawo Sawulu wakabuzya sikumunyampwida zilwanisyo kuti: “Bweza panga lyako undijaye aandilyo, kuchitila kuti baalumi aaba batapalwidwe batasiki kuti bandijaye akundichitila lunya.” Pesi sikumunyampwida zilwanisyo taakali kuyanda pe, nkaambo wakali kuyoowa loko. Nkinkaako, Sawulu wakabweza panga lyakwe mpawo wakawida aalindilyo.
5 Sikumunyampwida zilwanisyo naakabona kuti Sawulu wafwa anguwe wakawida aapanga lyakwe wafwa.
6 Nkinkaako, Sawulu abana bakwe balombe batatu asikumunyampwida zilwanisyo abaalumi boonse mbaakalaabo bakafwa mubuzuba oobo.
7 Ma-Israyeli bakali kukkala mukkuti* amuchilawu chaJodani, nibakabona kuti masooja aama-Israyeli bachija akuti Sawulu abana bakwe balombe bafwa, bakasaanguna kusiya myuunzi mpawo bakachija alubo maFilisiti bakasika bakkala mumyuunzi eeyo.
8 Mubuzuba bwakatobela, maFilisiti nibakasika kuti bazoobweze zintu zyabantu bakali bajayigwa, bakajana Sawulu abana bakwe balombe batatu kabafwide aaChilundu chaGilibbowa.
9 Nkinkaako, bakamudyunkula mutwe, babweza zilwanisyo zyakwe mpawo bakatuma batumwa munyika yoonse yamaFilisiti kuti bakaambilizye makani aaya mumaanda* aazibumbwa zyabo akubantu.
10 Mpawo bakabikka zilwanisyo zyakwe mung’anda yazifanikisyo zya-Ashitoreti mpawo bakagankamina chidumbu chakwe aamuduli waBbeti-shani.
11 Bantu bakuJabbeshi-giliyadi nibakamvwa maFilisiti nzibakachita Sawulu,
12 basilumamba boonse bakanyampuka, beenda mansiku woonse mpawo bakaakubweza chidumbu chaSawulu azidumbu zyabana bakwe kumuduli waBbeti-shani. Kuzwa waawo, bakabweeda kuJabbeshi mpawo bakazitenta nkukooko.
13 Mpawo bakabweza mafuwa aabo baakwaazikka aansi aamunsamu wamutamarisikki kuJabbeshi alubo bakalyiimya kulya kwamazuba aali musanu aabili.
