Samiyele Wachibili 15:1-37
15 Nizyakayinda zintu eezi, Abbisalomu wakaliyandwiida ngolo amabbiza abaalumi bali 50 kuti kabachijaana kunembo lyakwe.
2 Abbisalomu wakali kunoonga wabuka kuseeni waakwiimikila kumbali aamugwagwa uutozya kugeedi lyamuunzi. Kufumbwa chiindi nikwakali kusika muntu kali aankani iiyanda kubetekwa aamwaami, Abbisalomu wakali kumwiita mpawo wakali kwaamba kuti: “Uzwa kuluuli muunzi?” Muntu ooyo wakali kusandula kati: “Mubelesi wako uzwa kuluumwi wamisyobo ya-Israyeli.”
3 Abbisalomu wakali kunoonga wati kulinguwe: “Bona, makani nguwaamba alikabotu alubo aliluleme, pesi taakwe muntu uuzwa kumwaami uukonzya kuswiilila nkani yako.”
4 Mpawo Abbisalomu wakali kuti: “Kaansinga ndakasalwa kuti ndibe mubetesi munyika! Kufumbwa muntu uuli aankani iiyanda kulangwa-langwa naakuti kubetekwa, walikunooza kulindime mpawo ndalikunoobona kuti nkani yakwe yabetekwa kabotu.”
5 Nikwakali kusika muntu aafwiifwi anguwe kuti amufugamine, Abbisalomu wakali kutandabika kuboko kwakwe mpawo wakali kumujata, wamumyonta.
6 Abbisalomu wakali kuchita oobo kuma-Israyeli boonse bakali kusika kumwaami kuti bazoobetekwe. Nkinkaako, Abbisalomu wakayinkilila kunembo kuyunga myoyo yama-Israyeli.*
7 Niyakamana minyaka iine,* Abbisalomu wakati kumwaami: “Ndizumizye ndiinke kuHebburoni ndikazuzikizye chikonke changu nchindakakonka kuli Jehova.
8 Nkaambo nindakali kukkala kuGeshuri iili kuSiriya, ime ndimubelesi wako, ndakakonka kanditi: ‘Kuti Jehova wandibweedezya kuJerusalema, ndizoopa Jehova chipo.’”*
9 Nkinkaako, mwaami wakati kulinguwe: “Yinka muluumuno.” Mpawo wakanyampuka waya kuHebburoni.
10 Kuzwa waawo, Abbisalomu wakatuma basikulanga-langa nyika kumisyobo yoonse yama-Israyeli kati: “Mbumutamvwe biyo kulila kwamweembo, amwaambilizye kuti, ‘Abbisalomu waba mwaami muHebburoni!’”
11 Kwakali baalumi bali 200 bazwa kuJerusalema bakayinkide aa-Abbisalomu nkukooko. Baalumi aabo bakalitambidwe alubo bakayinka kakutakwe nchibakali kuyeeyela, kabatazi zyakali kuchitika.
12 Naakapa zipayizyo, Abbisalomu wakatuma bantu kuti bakayite Ahitofeli wakuGilo, sikupa lulayo waDavida kumuunzi wakwe kuGilo. Kubukila kwakali kuyabukomena alubo bantu bakali kubbazu lya-Abbisalomu bakali kuyabuvula.
13 Nikwakayinda chiindi, kwakasika muntu wakali watumwa kuli Davida. Wakati: “Myoyo yabantu bamu-Israyeli yaba kuli Abbisalomu.”
14 Aachiindi eecho, Davida wakabuzya babelesi bakwe boonse mbaakalaabo kuJerusalema kuti: “Amunyampuke tuchije, nkaambo taakwe naba uumwi aakati kesu uutafutuke kuli Abbisalomu! Amufwambaane, nkaambo ulakonzya kutweenzya atweetele mapenzi alubo anyonyoone muunzi apanga!”
15 Babelesi bamwaami bakasandula mwaami kuti: “Kufumbwa mwaami simaleleesu nchaasala, babelesi bakwe balilibambilide kuchichita.”
16 Nkinkaako, mwaami wakazwa alubo bamung’anda yakwe boonse bakamutobela, pesi mwaami wakasiya bamwi banakazi* bakwe bali kkumi kuti basyaale kabalanga ng’anda.*
17 Mwaami wakayinkilila kunembo alweendo lwakwe kazwa mumuunzi, kalaamwi abantu boonse bakali kumutobela mpawo bakaakwiimikila kuBbeti-mehakki.
18 Babelesi bakwe boonse bakali kweenda aanguwe* amaKkereti woonse amaPeleti abaalumi bali 600 bakuGati, aabo bakali kumutobela kabazwa kuGati. Bakali kwiinda kunembo lyamwaami kalikubalanga-langa.*
19 Mwaami wakati kuli Itayi wakuGati: “Nkamboonzi nuyanda kweenda aandiswe? Bweeda ukakkale aamwaami mupya, nkaambo uli mweenzu alubo wakachija kulindinywe.
20 Wakasika jilo, nkinkaako, zilachita na kuti sunu weendengane aandiswe kufumbwa nkunditayinke? Bweeda abaalumi mbweendaabo alubo Jehova akutondeezye luyando lutamani alubo asyomeke kulinduwe!”
21 Pesi Itayi wakasandula mwaami kati: “Kwaamba choonzyo, mbuli Jehova mbali muumi alubo kwaamba choonzyo, mbuli mwaami simalelaangu mbali muumi, kufumbwa mwaami simalelaangu nkwatanoobede, amubelesi wako nkuko nkwatanoobede. Ndililibambilide kufwa aanduwe!”
22 Mpawo Davida wakati kuli Itayi: “Zubuka.” Nkinkaako, Itayi wakuGati wakazubuka abaalumi boonse mbaakalaabo abana.
23 Bantu boonse bamunyika bakali kulila loko chiindi bantu boonse mbaakalaabo Davida nibakali kuzubuka mpawo mwaami wakayimvwi aafwiifwi aKalonga kaKkidroni. Bantu boonse bakali kuzubuka kabanjila mumugwagwa uutozya munkanda.
24 Anguwe Zadokki wakaliwo kalaamwi amaLevi boonse bakanyampwide bbokesi lyachizuminano chaLeza wakasimpe alubo bakabikka Bbokesi lyaLeza wakasimpe aansi. Mukuyungizya, Abbiyata wakaliwo kusikila bantu boonse nibakamaninsya kuzubuka kalonga kabazwa mumuunzi.
25 Pesi mwaami wakabuzya Zadokki kuti: “Bweza Bbokesi lyaLeza wakasimpe, ulibweedezye mumuunzi. Kuti Jehova wandifwida luzyalo, uzoondibweedezya andime ndizoolibone alubo ndizoobone andawu nkulikkala.
26 Pesi kuti waamba kuti: ‘Taakwe nchwaachita chandibotezya pe,’ achite biyo kufumbwa nzyabona kuti zilikabotu mumeso aakwe.”
27 Mpawo mwaami wakati kuli Zadokki mupayizi: “Aniwe teenduwe sikubona zili kunembo na? Amubweede mumuunzi muluumuno alubo mubweze bana banu babili, nkukwaamba mwanaako Ahimazi aJonatani mwana wa-Abbiyata.
28 Ndinookkede aandawu zyakuzubukila zyamunkanda kusikila nditambule jwi lizwa kulindinywe atala azintu zilikuchitika mumuunzi.”
29 Nkinkaako, Zadokki a-Abbiyata bakabweedezya Bbokesi lyaLeza wakasimpe kuJerusalema alubo bakayinkilila kunembo kabakkala nkukooko.
30 Davida naakali kutanta Chilundu chama-Olifa, wakali kulila kalivumbide kumutwe, kalikweenda mumano.* Bantu boonse mbaakalaabo, ambabo bakavumbide mitwe alubo bakali kulila nibakali kutanta.
31 Davida wakazoobuzigwa kuti: “Anguwe Ahitofeli uli aakati kabantu balikubukilaamwi a-Abbisalomu.” Davida naakamvwa oobo, wakati: “Ikaka Jehova, ndikumbila kuti upe kuti lulayo lwa-Ahitofeli lube mbuli lwamuntu mufuba-fuba!”
32 Davida naakasika aajulu aachilundu, aawo bantu mpubakali kukombela Leza,* Hushayi mu-Akkiti wakali nkukooko kuti aswaananaawe, kazweete chigogo chidelukide alubo kali aalusuko mumutwe.
33 Nikuba oobo, Davida wakati kulinguwe: “Kuti wazubuka aandime, ulaba mukuli kulindime.
34 Pesi bweeda mumuunzi ukabuzye Abbisalomu kuti, ‘Ndili mubelesi wako, O Mwaami. Ndakali mubelesi wawuso chiindi, pesi lino ndaba mubelesi wako.’ Kuti wachita oobo, ulandigwasya kwiinda mukupa kuti makanze aa-Ahitofeli atazwidilili.
35 Zadokki a-Abbiyata bapayizi banooli aanduwe nkukooko. Weelede kubuzya Zadokki a-Abbiyata bapayizi zyoonse nzunoomvwa kung’anda yamwaami.
36 Bona! Bali aabana babo babili, Ahimazi mwana waZadokki aJonatani mwana wa-Abbiyata nkukooko, amubatume bazoondibuzye zyoonse nzimunoomvwa.”
37 Nkinkaako, Hushayi mweenzinyina waDavida, wakanjila mumuunzi aachiindi Abbisalomu naakali kunjila muJerusalema.
Makani Aamunsi
^ MuchiHebberu, “kubba myoyo yama-Israyeli.”
^ Amwi malembe ati, “minyaka iili 40.”
^ Naakuti, “ndizookomba Jehova.” MuchiHebberu, “ndizoobelekela Jehova.”
^ Aaba bakali banakazi mbaakali kukwata mwaalumi, kutali mwanakazi wakusaanguna. Banakazi aaba teebakalikwe bulemu buli mbuli bwamwanakazi wakusaanguna. Langa Bupanduluzi Bwamabala.
^ Naakuti, “muunzi wamwaami.”
^ Naakuti, “kuzubukila kubbazu lyakwe.”
^ Naakuti, “kuzubuka kunembo lyamwaami.”
^ Naakuti, “katazweete chintu kumawulu.”
^ MuchiHebberu, “kufugama kuli Leza.”
