Samiyele Wachibili 20:1-26
20 Kwakali umwi mwaalumi wakali kuyandisya kubusya musindo wakali kutegwa Shebba mwana waBbikkiri, wamusyobo waBbenjamini. Wakalizya mweembo mpawo wakati: “Tatukwe chaabilo pe kuli Davida alubo tatukwe lukono pe kumwana waJese. Umwi awumwi aye kuli baleza bakwe,* inywe nima-Israyeli!”
2 Baalumi boonse ba-Israyeli bakaleka kutobela Davida mpawo bakatobela Shebba mwana waBbikkiri, pesi baalumi bamusyobo waJuda bakakakatila kumwaami wabo, kuzwa kuJodani kusika kuJerusalema.
3 Davida naakasika kung’anda yakwe* kuJerusalema, mwaami wakabweza bamwi banakazi* bakwe bali kkumi mbaakali wasiya kuti kabalanga ng’anda mpawo wakababikka mung’anda yakali kulindwa. Wakali kubapa chakulya, pesi taakoonaabo pe. Bakakkala kabajalilidwe mumoomo kusika mubuzuba nibakafwa, kabali kupona mbuli bamukabafu nikuba kuti mulumaabo wakachili muumi.
4 Mwaami wakabuzya Amasa kuti: “Ndiitile baalumi bamusyobo waJuda kuti baze kulindime mumazuba aatatu, anduwe weelede kubawo.”
5 Nkinkaako, Amasa wakayinka waakwiita baalumi bamusyobo waJuda, pesi wakaboola chiindi nchaakali wabikkilwa kachili chayinda.
6 Mpawo Davida wakati kuli Abbishayi: “Shebba mwana waBbikkiri ulakonzya kutweetela mapenzi mapati kwiinda aa-Abbisalomu. Nkinkaako, bweza babelesi basimalelaako umwaandilile kuchitila kuti atajani myuunzi iikwabilidwe mpawo atuyube.”
7 Nkinkaako, baalumi mbaakalaabo Jowabbu, maKkereti, maPeleti abaalumi boonse basinguzu, bakazwa kuti bamwaandilile. Bakazwa muJerusalema kuti bakaandilile Shebba mwana waBbikkiri.
8 Kabali baba aafwiifwi kuti basike aabbwe pati kuGibbiyoni, Amasa wakasika kuzoobaswaana. Jowabbu wakazweete zigogo zyakwe zyankondo alubo wakali aapanga lyakali munkomo yalyo lyakasungilidwe muchibuno. Naakaswena aafwiifwi anguwe, panga lyakawa.
9 Jowabbu wakati kuli Amasa: “Ulikabotu na mweenzuma?” Jowabbu wakajata malezu aa-Amasa akuboko kwachilisyo kachitaanga uyanda kumumyonta.
10 Amasa taakalikataazya pe apanga lyakali mukuboko kwaJowabbu. Nkinkaako, Jowabbu wakamuyasa mwida alubo mala akawayukila aansi. Wakamuyasa kamwi biyo kuti amujaye, taakamuyasa lubo pe kachibili. Mpawo Jowabbu amwanikaakwe Abbishayi bakaandilila Shebba mwana waBbikkiri.
11 Umwi mulombe wakali aaJowabbu wakiimikila kumbali lyakwe mpawo wakati: “Kufumbwa uuli kubbazu lyaJowabbu awuli kubbazu lyaDavida aatobele Jowabbu!”
12 Aachiindi eecho, Amasa wakali kubumbuluka muganzi lyakwe aakati kamugwagwa. Mulombe ooyo naakabona kuti bantu boonse bakali kwiimikila mpawaawo, wakagwisya Amasa mumugwagwa wamutola musokwe mpawo wakamuvumba aamulembo, nkaambo wakabona kuti bantu boonse bakali kwiimikila nibakali kusika mpaakabede Amasa.
13 Naakamugwisya mumugwagwa, baalumi boonse bakatobela Jowabbu kuti baandilile Shebba mwana waBbikkiri.
14 Shebba wakayinda aakati kamisyobo yoonse yama-Israyeli kaya ku-Abbelo yakuBbeti-maakka. Bantu bamusyobo waBbikkiri bakabunganaamwi mpawo bakamutobela.
15 Jowabbu abaalumi mbaakalaabo bakasika, bamusinkila ku-Abbelo yakuBbeti-maakka mpawo bakalundika museele kuti kube dundulundu, kuchitila kuti balwane muunzi ooyo, mbukunga muunzi ooyo wakali aakati kadundulundu. Kuzwa waawo, baalumi boonse mbaakalaabo Jowabbu bakasya muduli wamuunzi kuti bawukolomone.
16 Mpawo umwi mwanakazi musongo wakoompolola kali mumuunzi kati: “Nibaalumi amuswiilile kaka! Amubuzye Jowabbu kuti aze ookuno ndaambuulaawe.”
17 Nkinkaako, Jowabbu wakayinka aafwiifwi anguwe mpawo mwanakazi ooyo wakati: “Nduwe Jowabbu na?” Wakasandula kuti: “Ndime.” Mpawo mwanakazi ooyo wakati kulinguwe: “Ikaka swiilila majwi aamubelesi wako.” Jowabbu wakati: “Ndaswiilizya.”
18 Mwanakazi ooyo wakati: “Chiindi, bakali kwaamba kuti, ‘Amukabuzye makani ku-Abbelo.’ Mpawo akali kuba ngiimamanino aakaambo.
19 Ndiiminina bantu bali aaluumuno alubo basyomeka mu-Israyeli. Uyanda kunyonyoona muunzi kakuli mbiibanyina mu-Israyeli. Nkamboonzi nuyanda kunyonyoona* lukono lwaJehova?”
20 Jowabbu wakasandula kuti: “Tandikoonga ndayeeya kuunyonyoona kale pe.
21 Teenzizyo pe nzindiyanda kuchita. Pesi mwaalumi uutegwa Shebba mwana waBbikkiri uuzwa kuchilawu chazilundu ku-Efremu wabukila Mwaami Davida. Kuti mwandipa mwaalumi ooyo, ndilaleka kuunyonyoona.” Mpawo mwanakazi ooyo wakati kuli Jowabbu: “Bona! Mutwe wakwe ulawaalilwa kulinduwe kawuzwa aajulu aamuduli!”
22 Aachiindi nchicheecho, mwanakazi ooyu musongo wakayinka nkubakabede bantu boonse mpawo bakadyunkula mutwe waShebba mwana waBbikkiri, bawuwaalila Jowabbu. Kuzwa waawo, Jowabbu wakalizya mweembo alubo bantu bakamwayika mumuunzi, umwi awumwi wakaya kumuunzi wakwe mpawo Jowabbu wakabweeda kumwaami kuJerusalema.
23 Jowabbu wakali kuzulwida nkamu yoonse yamasooja aamu-Israyeli. Bbenaya mwana waJehoyiyada wakali kuzulwida maKkereti amaPeleti.
24 Adoramu wakali kuzulwida aabo bakali kubeleka milimu iimizya. Jehoshafati mwana wa-Ahiludi wakali sikulemba makani.
25 Sheva wakali mulembi. Zadokki a-Abbiyata bakali bapayizi.
26 Ira muJayiri anguwe wakaba muzulwidi mupati* waDavida.
Makani Aamunsi
^ Amwi malembe ati, “kumatente aakwe.”
^ Naakuti, “kumuunzi wamwaami.”
^ Aaba bakali banakazi mbaakali kukwata mwaalumi, kutali mwanakazi wakusaanguna. Banakazi aaba teebakalikwe bulemu buli mbuli bwamwanakazi wakusaanguna. Langa Bupanduluzi Bwamabala.
^ MuchiHebberu, “kumena.”
^ Naakuti, “mupayizi.”
