Samiyele Wachibili 21:1-22
21 Mumazuba aaDavida, kwakaba nzala kwaminyaka iitatu iitobelene, nkinkaako, Davida wakabuzya makani kuli Jehova mpawo Jehova wakati: “Sawulu abamung’anda yakwe bali aamulandu waganzi, nkaambo wakajaya bantu bamusyobo waGibbiyoni.”
2 Nkinkaako, mwaami wakayita bantu bakuGibbiyoni waambuulaabo. (Bantu bakuGibbiyoni teebakali ma-Israyeli pe, pesi bakali ma-Amori bakasyeede alubo ma-Israyeli bakali bakonka kuti tabazoobajayi pe, pesi Sawulu wakali kuyanda kubanyonyoona akaambo kakusungwaalila bantu bamu-Israyeli abamusyobo waJuda.)
3 Davida wakabuzya bantu bakuGibbiyoni kuti: “Ndimuchitileenzi alubo nga ndilawumaninsya biyeni mulandu wesu kuchitila kuti mulongezye* lukono lwaJehova?”
4 Bantu bakuGibbiyoni bakati kulinguwe: “Nsiliva angolida tazikonzyi pe kumaninsya mulandu wakachitwa aaSawulu abamung’anda yakwe alubo taakwe muntu ngututajaye mu-Israyeli.” Mpawo wakati: “Kufumbwa nzimutaambe, ndilamuchitila.”
5 Bakati kumwaami: “Mwaalumi wakali kuyanda kutumana alubo wakakanzide kutulobya kuti tutakkali muchilawu cha-Israyeli—
6 amutupe bana bakwe balombe bali musanu ababili. Tulaanzika zidumbu zyabo* kunembo lyaJehova kuGibbeya yaSawulu, ooyo wakasalwa aaJehova.” Kuzwa waawo, mwaami wakati: “Ndilababikka mumaboko aanu.”
7 Nikuba oobo, mwaami wakamufwida luzyalo Mefibbosheti mwana waJonatani mwana waSawulu, akaambo kachikonke Davida nchaakachita aaJonatani mwana waSawulu kunembo lyaJehova.
8 Nkinkaako, mwaami wakabweza Amoni aMefibbosheti, bana balombe babili baRizipa mwana musimbi wa-Aya, mbaakazyala aaSawulu, abana balombe bali musanu baMikkala* mwana musimbi waSawulu, mbaakazyala a-Adiliyeli, mwana waBbazilayi wakuMehola.
9 Wakababikka mumaboko aamaGibbiyoni alubo bakaanzika zidumbu zyabo kuchilundu kunembo lyaJehova. Boonse kabali musanu ababili bakafwaamwi. Bakajayigwa nikwakasaanguna kutebulwa, nkukwaamba kumasaangunino aakutebulwa kwabbali.
10 Rizipa mwana wa-Aya wakabweza mulembo uupangidwe aamasaka, wawuyala aabbwe, kuzwa kumasaangunino aakutebula kusika mvula yakujulu niyakawida zidumbu eezyo. Taakazumizya bayuni bakujulu kuti bakkale aalinzizyo sikati, nibaba banyama bamusokwe kuti baswene aafwiifwi mansiku.
11 Davida wakabuzigwa zyakachitwa aawumwi mwanakazi* waSawulu uutegwa Rizipa mwana wa-Aya.
12 Davida wakayinka waakubweza zifuwa zyaSawulu azyamwanaakwe Jonatani kubazulwidi* bakuJabbeshi-giliyadi, aabo bakali bazibba kulubuwa lwakuBbeti-shani, ooko maFilisiti nkubakazyaanzikide mubuzuba maFilisiti mbubakajaya Sawulu kuGilibbowa.
13 Wakeeta zifuwa zyaSawulu azyamwanaakwe Jonatani alubo bakabunganizya zifuwa zyabaalumi bakali bajayigwa.*
14 Bakazikka zifuwa zyaSawulu azifuwa zyamwanaakwe Jonatani munyika yaBbenjamini kuZela, mukabanda kaKkishi wisi. Nibakamaninsya kuchita zyoonse nzibakalayililwa aamwaami, Leza wakaswiilila zintu nzibakakumbila kuti zichitike atala anyika yabo.
15 Kwakaba nkondo lubo aakati kamaFilisiti ama-Israyeli. Nkinkaako, Davida ababelesi bakwe bakakunuka baakulwana aamaFilisiti, pesi Davida wakakatala.
16 Umwi mwaalumi uutegwa Ishibbi-bbenobbu wamusyobo waRefa, ooyo wakali aasumu lyakkopa,* lyakali kulema mashekeli aali 300 alubo kali aapanga pya, wakali kuyanda kujaya Davida.
17 Aachiindi nchicheecho, Abbishayi mwana waZeruya wakaza kuzoomugwasya. Wakayasa muFilisiti ooyo wamujaya. Mpawo baalumi bakali aaDavida bakakonka kulinguwe kabati: “Utachiinki lubo pe andiswe kunkondo! Toyelede kuzima lambe lya-Israyeli pe!”
18 Kuzwa waawo, kwakaba nkondo lubo amaFilisiti kuGobbu. Aachiindi eecho, Sibbekkayi muHusha wakajaya Safi, ooyo wakali wamusyobo waRefa.
19 Kwakaba nkondo lubo amaFilisiti kuGobbu mpawo Elihanani mwana waJaare-origimu wakuBbetelehema wakajaya Goliyati wakuGati, ooyo wakali aasumu lyakali aaluti lwakali mbuli lwachisamu chabasikuluka.
20 Kwakaba nkondo lubo kuGati, ooko kwakali mwaalumi wakali mupati loko. Wakali aatunwe tuli 6 kukuboko kumwi akumwi, atunwe tuli 6 kukuulu kumwi akumwi. Toonse twakali 24. Anguwe wakali wamusyobo waRefa.
21 Wakaliswini kusampawula ma-Israyeli, nkinkaako, Jonatani mwana waShimeyi mukulana waDavida wakamujaya.
22 Bantu boonse aaba kabali bane, bakali bamusyobo waRefa wakuGati alubo bakajayigwa aakuboko kwaDavida akuboko kwababelesi bakwe.
Makani Aamunsi
^ Bamwi bati “mukombwede.”
^ MuchiHebberu, “Tulababikka aantanganana,” nkukwaamba, maboko amawulu aabo katyoledwe.
^ Amwi malembe ati,” baMerabbu.”
^ Ooyu wakali mwanakazi ngwaakali kukwata mwaalumi, kutali mwanakazi wakusaanguna. Mwanakazi ooyu taakalikwe bulemu buli mbuli bwamwanakazi wakusaanguna. Langa Bupanduluzi Bwamabala.
^ Amwi malembe ati, “kubanaanyika.”
^ MuchiHebberu, “babikkwa aantanganana.”
^ Naakuti, “lyamukuba.”
