Babetesi 11:1-40
11 Jefita muGiliyadi wakali silumamba uuli aamanguzu; wakali mwana wawuule alubo wisi waJefita wakali Giliyadi.
2 Pesi mwanakazi waGiliyadi wakamuzyalila bana basankwa. Bana bamwanakazi ooyo nibakakomena, bakatanda Jefita akumubuzya kuti: “Tukwe lukono pe mung’anda yandeende nkaambo uli mwana wawumwi mwanakazi.”
3 Nkinkaako, Jefita wakabachija bananyina waakukkala kunyika yaTobbu. Mpawo baalumi batakwe zyakuchita bakamutobela Jefita bayinkaamwi anguwe.
4 Nikwakayinda chiindi, ma-Amoni bakalwana aama-Israyeli.
5 Chiindi ma-Amoni nibakalwana aama-Israyeli, chakufwambaana baalu bamuGiliyadi bakayinka kunyika yaTobbu kuyooyeta Jefita.
6 Bakabuzya Jefita kuti: “Kuza uzoobe muzulwidi wamasooja eesu kuchitila kuti tulwane ma-Amoni.”
7 Pesi Jefita wakabuzya baalu bamuGiliyadi kuti: “Teendinywe na nimwakali kundizonda loko zyakuti mwakasika mpumunditanda biya mung’anda yandeende? Mwazidaanzi kulindime mbumwabona kuti mwaba mumapenzi?”
8 Nibakamvwa oobo, baalu bamuGiliyadi bakabuzya Jefita kuti: “Eezi nzizyo biya zyatweeta kulinduwe. Kuti wiinke aandiswe kuyoolwana ma-Amoni, uzooba muzulwidi wabantu boonse bakkala muGiliyadi.”
9 Nkinkaako, Jefita wakabuzya baalu bamuGiliyadi kuti: “Kuti mundiboozye kuti ndilwane aama-Amoni mpawo Jehova ape kuti ndibazunde, nkukwaamba kuti ndilaba muzulwidi wanu.”
10 Baalu bamuGiliyadi bakabuzya Jefita kuti: “Jehova abe kamboni* aakati kesu kuti twazooleka kuchita mbuli mbuwaamba.”
11 Nkinkaako, Jefita wakayinka aabaalu bakuGiliyadi mpawo bantu bakamubikka kuti abe muzulwidi wabo amupati wamasooja aabo. Mpawo Jefita wakayindulula majwi aakwe woonse kunembo lyaJehova kuMizipa.
12 Jefita wakatuma batumwa kumwaami wama-Amoni kuti bakamubuzye kuti: “Uli akamboonzi biya andime* nwaaza kuzoondilwana munyika yangu?”
13 Mwaami wama-Amoni wakabuzya batumwa baJefita kuti: “Ma-Israyeli nibakazwa mu-Ijipita, bakabweza nyika yangu kuzwa ku-Anoni kuyoosika kuJabbokku mane do kuJodani. Amwiiboozye muluumuno.”
14 Pesi Jefita wakabatuma lubo batumwa kumwaami wama-Amoni
15 kuti bakamubuzye kuti:
“Nzezi nzyaamba Jefita: ‘Ma-Israyeli teebakabweza nyika yamaMowabbu pe niiba yama-Amoni,
16 nkaambo ma-Israyeli nibakazwa mu-Ijipita, bakayinda munkanda kuyoosika kuLwizi Lusalala, mpawo bakasika kuKkadeshi.
17 Mpawo ma-Israyeli bakatuma batumwa kumwaami wa-Edomu kuti bakamubuzye kuti: “Tukumbila kwiinda munyika yako.” Pesi mwaami wa-Edomu taakaswiilila pe. Bakatuma jwi akumwaami waMowabbu, pesi taakazumina pe. Nkinkaako, ma-Israyeli bakayinkilila kunembo kukkala muKkadeshi.
18 Nibakayinda munkanda, bakeenguluka nyika ya-Edomu ayaMowabbu. Bakayinda kubuzwezuba kwanyika yaMowabbu baakukkempa muchilawu cha-Anoni; teebakanjila pe muMowabbu nkaambo Anoni nguwo wakali mugaano waMowabbu.
19 “‘Kuzwa waawo, ma-Israyeli bakatuma batumwa kuli Sihoni mwaami wa-Amori, mwaami waHeshibboni, ma-Israyeli bakamubuzya kuti: “Tukumbila kwiinda munyika yako tuye kunyika yesu.”
20 Pesi Sihoni taakaasyoma pe makanze aama-Israyeli aakutimbwida munyika yakwe. Nkinkaako, wakabunganizya bantu bakwe boonse waakukkempa kuJahazi mpawo wakalwana ma-Israyeli.
21 Mpawo Jehova Leza wama-Israyeli wakabikka Sihoni abantu bakwe boonse mukuboko kwama-Israyeli, bakabazunda mpawo ma-Israyeli bakabweza nyika yoonse yama-Amori bakali kukkala munyika eeyo.
22 Bakabweza chilawu choonse chama-Amori kuzwa ku-Anoni kuyoosika kuJabbokku, akuzwa kunkanda do kuJodani.
23 “‘NguJehova Leza wama-Israyeli wakatanda ma-Amori kunembo lyabantu bakwe ma-Israyeli, uyanda kubatanda na?
24 Iwe tubwezi zintu zyoonse leza wako Kkemoshi nzyaakupa kuti ubweze na? Andiswe tutanda muntu woonse Jehova Leza wesu ngwaatanda kunembo lyesu.
25 Aniwe usiyene aali aBbalakki, mwana waZipori, mwaami waMowabbu? Kuli naakakazyania aama-Israyeli na, kuli naakalwana aambabo na?
26 Ma-Israyeli nibakali kukkala muHeshibboni, amyuunzi yayo miniini* amu-Arowa amyuunzi yayo miniini amumyuunzi yoonse yakali kunkomwe ya-Anoni kwaminyaka iili 300, wakalekelaanzi kwiibweza aachiindi eecho?
27 Teendakubisizya pe, pesi iwe ulikupambanisya biya kundilwana. Jehova mubetesi, sunu abe mubetesi aakati kama-Israyeli ama-Amoni.’”
28 Pesi mwaami wama-Amoni taakawuswiilila pe mulumbe Jefita ngwaakamutumina.
29 Muuya waJehova wakamusikila Jefita mpawo Jefita wakayinda munyika yaGiliyadi ayaManase kaya kuMizipe yakuGiliyadi, mpawo kuzwa kuMizipe yakuGiliyadi wakayinda kaya kuma-Amoni.
30 Mpawo Jefita wakakonka kuli Jehova kati: “Kuti ubikke ma-Amoni mukuboko kwangu,
31 kufumbwa muntu uutazwe mung’anda yangu kuti azoonditambule nindaboola muluumuno kuzwa kukulwana ma-Amoni, uzooba wako Jehova, mpawo ndizoomupa kulinduwe mbuli chipo chitentwa.”
32 Nkinkaako, Jefita wakayinka waakulwana ma-Amoni mpawo Jehova wakababikka mukuboko kwakwe.
33 Wakajaya bantu biingi loko kuzwa ku-Arowa kusika kuMiniti—wakazunda myuunzi iili 20—mane do kuyoosika ku-Abbeli-kkeramimu. Mbuboobo ma-Israyeli mbubakazunda ma-Amoni.
34 Kumamanino Jefita wakaboola kumuunzi wakwe kuMizipa, mpawo mwanaakwe musimbi wakazwa kuti amutambule kali kuuma nsakalala akuzyana. Ngumwana ngwaakali aawe kupela. Taakalikwe uumbi mwana mulombe naakuti musimbi.
35 Naakamubona, wakadelula zigogo zyakwe mpawo wakati: “Aaa mwanaangu! Wandipa kuusa kupati, nkaambo nduwe ngundatanda. Nkaambo ndakasyomezya kuli Jehova, tandichikonzyi pe kuchincha.”
36 Pesi musimbi ooyo wakati kuli wisi: “Ndeende, kuti kakuli kuti wakasyomezya kuli Jehova, chita kulindime mbuli mbwaakasyomezya mbukunga Jehova wapa kuti ubazunde basinkondonyokwe ma-Amoni.”
37 Mpawo wakabuzya wisi kuti: “Ndikumbila kuchitilwa chintu eechi: Ndizumizye kuti ndiye kuzilundu kwamyeezi iibili ndikalile busimbi bwangu aamwi abeenzuma basimbi.”*
38 Mpawo wisi wakati kulinguwe: “Yinka!” Nkinkaako, wakamuleka kuti ayinke kwamyeezi iibili, wakayinka kuzilundu abeenzinyina kuti akalile busimbi bwakwe.
39 Niyakamana myeezi iibili, wakabweeda kuli wisi, mpawo wisi wakazuzikizya chikonke nchaakali wachita akaambo kanguwe. Musimbi ooyo taakwe naakoona aamwaalumi pe. Mpawo eechi chakaba chiyanza* mu-Israyeli:
40 Munyaka amunyaka, basimbi bamu-Israyeli bakali kwiinka kuti bakasungwaazye mwana waJefita muGiliyadi kwamazuba aane mumunyaka.
Makani Aamunsi
^ MuchiHebberu, “uuswiilila.”
^ MuchiHebberu, “ndilaanzi anduwe.”
^ Naakuti, “iizyungulukide.”
^ Naakuti, “abeenzuma nkaambo tandizoofwi ndakwatwa pe.”
^ Naakuti, “Wakaba mulawu.”
