Babetesi 12:1-15
12 Mpawo baalumi bamusyobo wa-Efremu bakayitwa bazubuka baya kuZafoni* mpawo bakabuzya Jefita kuti: “Wakalekelaanzi kutwiita nwaakazubuka kuti ukalwane aama-Amoni? Tuyanda kukutentela mung’anda yako.”
2 Pesi Jefita wakasandula kuti: “Ime abantu bangu twakali munkondo njumu ama-Amoni. Ndakamwiita kuti mundigwasye, pesi teemwakandivuna mukuboko kwabo.
3 Nindakabona kuti tamukoondivuna pe, ndakasala kubikka buumi bwangu mupenzi mpawo ndakeenda ndaakulwana aama-Amoni. Jehova wakababikka mukuboko kwangu. Nkamboonzi sunu nimwasika kuzoondilwana?”
4 Jefita wakabunganizya baalumi boonse bamuGiliyadi, mpawo bakalwana aama-Efremu. Baalumi bakuGiliyadi bakazunda ma-Efremu, aabo bakaambide kuti: “Mwakachija kumusyobo wa-Efremu, inywe nimaGiliyadi nimukkede mundawu ya-Efremu ayaManase.”
5 Baalumi baGiliyadi bakasinka mazubukilo aaJodani kunembo lya-Efremu; baalumi ba-Efremu nibakali kuchija, bakali kwaamba kuti: “Ndikumbila kuzubuka”; mpawo baalumi baGiliyadi bakali kubuzya umwi awumwi wabo kuti, “Uli mu-Efremu na we?” Naakali kusandula kuti, “Peepe!”
6 Bakali kumubuzya kuti, “Amba kuti Shibboleti.” Pesi wakali kuti, “Sibboleti,” nkaambo taakali kukonzya pe kulyaamba kabotu. Bakali kumujata mpawo bamujaya aamazubukilo aaJodani. Aachiindi eecho kwakafwa ma-Efremu bali 42 000.
7 Jefita wakabeteka Israyeli kwaminyaka iili musanu awumwi. Jefita muGiliyadi wakazoofwa mpawo wakazikkwa mumuunzi wakwe muGiliyadi.
8 Nikwakazwa nguwe, Ibbizani wakuBbetelehema wakabeteka Israyeli.
9 Wakali aabana balombe bali 30 abasimbi bali 30. Wakakwatya bana bakwe basimbi kubana batali baluzubo lwakwe alubo wakeeta banakazi bali 30 kuti bakwatwe aabana bakwe. Wakabeteka Israyeli kwaminyaka iili musanu ayibili.
10 Ibbizani wakazoofwa mpawo wakazikkwa muBbetelehema.
11 Nikwakazwa nguwe, Eloni wamusyobo waZebbuloni wakabeteka Israyeli; wakabeteka Israyeli kwaminyaka iili kkumi.
12 Eloni wamusyobo waZebbuloni wakazoofwa mpawo wakazikkwa mu-Ayijaloni munyika yaZebbuloni.
13 Nikwakazwa nguwe, Abbidoni mwana waHileli muPiratoni wakabeteka Israyeli.
14 Wakali aabana balombe bali 40 abazukulu bachaalumi bali 30 bakali kutanta madonki aali 70. Wakabeteka Israyeli kwaminyaka iili musanu ayitatu.
15 Abbidoni mwana waHileli muPiratoni wakazoofwa mpawo wakazikkwa muPiratoni munyika ya-Efremu muchilundu chama-Amalekki.
Makani Aamunsi
^ Amwi malembe ati, “bazubukila kubbazu lyakunyika.”
