Babetesi 7:1-25
7 Mpawo Jerubbaala, nkukwaamba Gidiyoni, abantu boonse mbaakalaabo bakafuma baakukkempa kuchikala chaHarodi. Aachiindi eecho, kkeempu yamaMidiyani yakali kubbazu lyakunyika lyakkeempu yaGidiyoni kukalundu kaMore mukkuti.*
2 Jehova wakabuzya Gidiyoni kuti: “Bantu mbulaabo mbiingi loko kuti ndibikke maMidiyani mukuboko kwabo. Nkaambo ma-Israyeli balakonzya kulisumpula mpawo bandibuzye kuti, ‘Kuboko kwangu nkuko kwandifutula.’
3 Lino buzya bantu kuti: ‘Kufumbwa uulikuyoowa akuzazama abweede kumuunzi wakwe.’” Nkinkaako, Gidiyoni wakabasunka. Bantu bali 22 000 bakabweeda kumyuunzi yabo mpawo kwakasyaala bantu bali 10 000.
4 Jehova wakabuzya Gidiyoni kuti: “Bantu aaba bachili biingi. Kunuka aabo kumaanzi kuchitila kuti ndikabasunke nkukooko. Kuti ndakubuzya kuti, ‘Ooyu ulayinka aanduwe,’ ulayinka aanduwe, pesi kuti ndakubuzya kuti, ‘Ooyu takooyinka aanduwe,’ takooyinka aanduwe pe.”
5 Nkinkaako, wakakunuka aabantu kumaanzi.
Mpawo Jehova wakabuzya Gidiyoni kuti: “Pambula bantu boonse bateka maanzi mukuboko kabanywa alulimi mbuli munkala kuzwa kubantu bakali kunywa maanzi kabafugeme.”
6 Bantu bakali kunywa maanzi kabateka mukuboko bakali 300. Pesi bamwi boonse bakali kunywa kabafugeme.
7 Mpawo Jehova wakabuzya Gidiyoni kuti: “Ndilamufutula kandibelesya baalumi bali 300 banywa maanzi kabateka mukuboko, ndilabikka maMidiyani mukuboko kwako. Bamwi boonse ababweede kumuunzi.”
8 Nibakabweza chakulya amyeembo kubantu, Gidiyoni wakabuzya bamwi baalumi boonse bachi-Israyeli kuti babweede kumuunzi, wakasyaala biyo abaalumi bali 300. Kkeempu yamaMidiyani yakali munsi lyakwe mukkuti.*
9 Mubusiku oobo, Jehova wakamubuzya kuti: “Buka ulwane kkeempu nkaambo ndayibikka mukuboko kwako.
10 Pesi kuti kuli kuyoowa kwiilwana, kunuka uye kukkeempu yabo aPura mubelesi wako.
11 Swiilila nzibatanoowambe mpawo ulaba aachibindi chakubalwana.”* Nkinkaako, Gidiyoni amubelesi wakwe Pura bakakunuka baya aafwiifwi akkeempu yamasooja.
12 MaMidiyani, ma-Amalekki abantu boonse baKubuzwezuba bakalizwide mukkuti mbuli nsozi zyeenda kazili zyiingi, nkamela zyabo teezyakali kubalika pe, zyakali zyiingi mbuli museele wakunkomwe yalwizi.
13 Gidiyoni wakasika, mpawo kwakali umwi mwaalumi wakali kulungunwida mweenzinyina chiloto nchaakalota kati: “Nzezi nzindalota. Ndalota chinkwa chalawundi chabbali chalikukunkulika kachiza kukkeempu yamaMidiyani. Chasika aatente mpawo chalyuuma changuzu zyakuti lyawa. Chapindimuna tente mpawo lyawa kuti vocho.”
14 Mweenzinyina wakati: “Taakwe chimbi pe, eeli biya ndipanga lyaGidiyoni mwana waJowashi mwaalumi wachi-Israyeli. Leza wabikka maMidiyani akkeempu yoonse mukuboko kwakwe.”
15 Gidiyoni mbaakamumvwa biyo kali kwaamba chiloto eecho abupanduluzi bwacho, wakavuntama wakomba. Mpawo wakabweeda kukkeempu yama-Israyeli wati: “Amubuke, nkaambo Jehova wabikka kkeempu yaMidiyani mukuboko kwanu.”
16 Mpawo wakapambula baalumi bali 300 kuti babe nkamu zitatu mpawo boonse wakabapa myeembo anongo mpati zili aamalambe mukati.
17 Wakababuzya kuti: “Amundilange muchite nzinditachite. Nindasika aafwiifwi akkeempu, muchite nzinditachite.
18 Nindalizya mweembo abantu boonse mbindilaabo andinywe mulizye myeembo kuzyunguluka kkeempu yoonse mpawo moompolole kamuti, ‘Panga lyaJehova alyaGidiyoni!’”
19 Gidiyoni abaalumi bali 100 mbaakali aabo bakasika aafwiifwi akkeempu kumatalikilo aachiindi chakulinda kwamansiku kwachibili,* nikwakachili kuzwa kubikkwa balindi. Bakalizya myeembo akupwaya nongo mpati nzibakajisi.
20 Nkamu zitatu zyakalizya myeembo akupwaya nongo mpati. Bakajisi malambe mukuboko kwachimweensi mpawo bakali kulizya myeembo kabayijisi akuboko kwachilisyo. Bakali koompolola kabati: “Panga lyaJehova alyaGidiyoni!”
21 Aachiindi eecho mwaalumi umwi awumwi wakaliimvwi aandawu yakwe kuzyunguluka kkeempu, mpawo nkamu yoonse yamasooja yakachija. Bakachija kabali kuchita chiyoyooyo.
22 Baalumi bali 300 bakayinkilila kunembo kulizya myeembo, mpawo Jehova wakapa kuti masooja aaba balwane chabo-chabo apanga mukkeempu yoonse. Masooja bakachija kuyoosika kuBbeti-shita, kuZerera kuyoosika kumagolelo aa-Abbeli-mehola aafwiifwi aTabbati.
23 Baalumi boonse bachi-Israyeli bakayitwa kuzwa kumusyobo waNafutali, wa-Asha, awaManase woonse mpawo bakaandilila ma-Midiyani.
24 Gidiyoni wakatuma batumwa muchilawu choonse chili aazilundu cha-Efremu kati: “Amukunuke mukalwane ma-Midiyani mpawo musinke mazubukilo aakuBbeti-bbara akuJodani.” Nkinkaako, baalumi boonse bamusyobo wa-Efremu bakabunganaamwi, mpawo bakasinka mazubukilo aakuBbeti-bbara akuJodani.
25 Bakajata basilutwe babili bamaMidiyani, nkukwaamba Orebbu aZeebbu; Orebbu bakamujayila aabbwe lya-Orebbu mpawo Zeebbu bakamujayila muchikandilo chawayini chaZeebbu. Bakayinkilila kunembo kwaandilila maMidiyani. Bakeeta mutwe wa-Orebbu awaZeebbu kuli Gidiyoni muchilawu chaJodani.
Makani Aamunsi
^ Bamwi bati “musena.”
^ Bamwi bati “musena.”
^ MuchiHebberu, “maboko aako alaba aamanguzu aakubalwana.”
^ Kuzwa kuma 10 mansiku kuyoosika kuma 2 kuseeni.
