KuBaroma 11:1-36
11 Muleke ndibuzye, Leza wakabakaka na bantu bakwe? Peepe! Nkaambo andime ndili mu-Israyeli, mwana wa-Abbrahamu, uuzwa kumusyobo waBbenjamini.
2 Leza taakabakaka pe bantu bakwe mbaakasaanguna kusala. Tamuzi na kuti lugwalo lutyeni atala a-Elija naakali kukombelezya Leza kuti Israyeli apegwe chisubulo? Wakati:
3 “Jehova,* bajaya bapolofita bako alubo badilisya zipayililo zyako. Ndime andilikke ndasyaala alubo lino bayanda kundijaya.”
4 Nikuba oobo, Leza wakamusandula kutyeni? Wakati: “Ndichili aabantu bangu bali 7 000, batanamufugamina pe Bbaala.”
5 Munzila iikozyenie, nikuba kuchiindi eechino, kuli bamwi basyeede balikusalwa kwiinda muluzyalo lupati.
6 Kuti kakuli kuti balikusalwa kwiinda muluzyalo lupati, nkukwaamba kuti tabachisalwi kwiinda mumilimu, nkaambo kaansinga mbukubede, luzyalo lupati teelwalikunooba luzyalo lupati pe.
7 Ani mpo tutyeni? Chintu Israyeli nchaakali kuyanduula amoyo woonse taakachijana pe, pesi aabo bakasalwa, mbabo bakachijana. Bamwi boonse bakayumya myoyo yabo,
8 mbuli mbukulembedwe kuti: “Leza wapa kuti boone ng’onzi mpati, alubo wabapa meso aataboni, amatwi aatamvwi, kusikila sunu.”
9 Anguwe Davida wakati: “Tebbulu lyabo alibe kakole achiteyesyo, alibe chilebyo achisubulo kulimbabo.
10 Meso aabo aabe aamudima, kuchitila kuti bataboni alubo abasitame chiindi choonse.”
11 Muleke ndibuzye, Bakalebwa mpawo bawidaatu na? Peepe! Pesi kubisya nkubakachita kwakapa kuti bantu bazisi bafutulwe mpawo eezi zyakapa kuti babe aabbivwe.
12 Nkinkaako, kuti kubisya kwabo kakupa kuti nyika ijane bunoti alubo kuti kucheya kwabo kakupa kuti bantu bazisi bajane bunoti, nkukwaamba kuti kunooli bunoti bwiingi loko yaakukkwana namba yabo!
13 Lino ndilikwaambuula aandinywe nibantu bazisi. Mbukunga ndili mwaapostoli kubantu bazisi, ndilawulemeka mulimu wangu,
14 kuchitila kuti, kuti kazichita, ndipe kuti bantu bakulindiswe babe aabbivwe akuti ndifutule bamwi aakati kabo.
15 Nkaambo kuti kusweegwa kwabo kakupa kuti nyika imvwanane lubo aLeza, kuzooba biyeni baakutambulwa lubo? Takukabi mbuli kuti babusigwa kuzwa kubafu na?
16 Mukuyungizya, kuti imwi fulawa iikandidwe iizwa kumichelo yakusaanguna kayisalala, nkukwaamba kuti, anjiyo fulawa yoonse iikandidwe ilasalala. Alubo kuti miyanda kayisalala, anjiyo mitabi ilasalala.
17 Nikuba oobo, kuti kakuli kuti imwi mitabi yamu-olifa yakagonkwa, mpawo iwe nuuzwa kumu-olifa wamulusaka wanamatikwa aamu-olifa ooyo, mpawo wasaanguna kujana chakulya chibotu chizwa kumiyanda yamu-olifa,
18 utalisumpuli pe kumitabi eeyo. Kuti walisumpula kulinjiyo, yeeya kuti teenduwe pe nuujisi miyanda, pesi miyanda njiyo iikujisi.
19 Mpawo ulaamba kuti: “Mitabi iilya yakagonkwa kuchitila kuti ime ndinamatikwe.”
20 Iiyi mbubo! Nkaambo kubula lusyomo kwabo nkuko kwakapa kuti bagonkwe, pesi iwe uliimvwi akaambo kalusyomo lwako. Utalisumpuli pe, pesi yoowa.
21 Nkaambo kuti Leza taakayisiya pe mitabi yampawaawo, andinywe takamusiyi pe.
22 Nkinkaako, amuyeeye luzyalo lwaLeza abukali bwakwe. Leza wakabatondeezya bukali aabo bakawa, pesi inywe ulikumufwida luzyalo, kufumbwa kuti mwakkalilila muluzyalo lwakwe. Pesi kuti teemwachita oobo, andinywe muzoogonkwa.
23 Alubo, ambabo kuti baba aalusyomo, bazoonamatikwa, nkaambo Leza ulakonzya kubanamatika lubo.
24 Kuti kakuli kuti inywe nimitabi yama-olifa aamulusaka mwakagonkwa mpawo mwanamatikwa aamu-olifa uulimwa, nikuba kuti eezi tazyaanzoochitika pe, nkukwaamba kuti mitabi yampawo uzooyinamatika lubo aamu-olifa wayo!
25 Nkaambo bakombima, ndiyanda kuti muzibe nsiswa eeyi iisalala yaLeza, kuchitila kuti mutaliboni kuti mulichenjede pe: Israyeli wakayumya moyo, kusikila namba iikkwene yabantu bazisi niyakanjila.
26 Munzila iikozyenie, Israyeli woonse uzoofutulwa, mbuli mbukulembedwe kuti: “Mufutuli* uzoozwa muZiyoni alubo uzoopa kuti bana baJakkobo basiye michito yoonse yakutayoowa Leza.
27 Alubo eechi nchicho chizuminano changu ambabo, ndaakugwisya zibi zyabo.”
28 Kwaamba choonzyo, kumakani mabotu, mbaasinkondonyina baLeza akaambo kandinywe, pesi kumakani aakusala kwaLeza, mbayandwi akaambo kamasianyinakulu.
29 Nkaambo Leza takalisoli pe akaambo kazipo nzyapa akwiita kwakwe.
30 Mbukunga aali chimwi chiindi andinywe teemwakali kumuswiilila pe Leza, pesi lino mwafwidwa luzyalo akaambo kakutaswiilila kwabo,
31 nkinkaako, kutaswiilila kwabo kwapa kuti andinywe mufwidwe luzyalo, kuchitila kuti ambabo lino bafwidwe luzyalo.
32 Nkaambo Leza wabajalilaamwi boonse mukutaswiilila, kuchitila kuti boonse abafwide luzyalo.
33 Akaka, bunoti bwaLeza, abusongo bwakwe aluzibo lwakwe zilinikide! Imbeta zyakwe nziyumu kuzimvwisisisya alubo nzila zyakwe tazitobelezeki pe.
34 Nkaambo “ngwani waziba mizeezo yaJehova* alubo ngwani waba sikumupa maanu?”
35 Alubo, ngwani wakasaanguna kumupa chimwi chintu zyakuti waabuyanda kubweedezegwa?
36 Nkaambo zintu zyoonse zyakazwa kulinguwe, kwiinda mulinguwe alubo nzizyakwe. Kulinguwe akube bulemu kukabe kutamani. Ameni.
