KuBaroma 13:1-14
13 Muntu woonse alibombye kubeendelezi nkaambo taakwe bweendelezi bukonzya kubawo kuti teebwazumizigwa aaLeza. Leza wakazumizya beendelezi aaba kuti beendelezye mundawu zyabo zisiyene-siyene.
2 Nkinkaako, kufumbwa uukazya beendelezi, nga ulikukazyania aamabambe aaLeza. Aabo bakazyania aamabambe aaya, bazoolyeetela lubeta.
3 Nkaambo beendelezi aaba bayoowegwa aabantu bachita zintu zibi kutali abaabo bachita zintu zibotu. Uyanda kuba muntu uutayoowi beendelezi na? Yinkilila kunembo kuchita zintu zibotu mpawo balakulumbayizya,
4 nkaambo beendelezi aaba mbabelesi baLeza bagwasya nduwe. Pesi kuti kulikuchita zintu zibi, yoowa, nkaambo tabajati panga kakutakwe kaambo pe. Mbabelesi baLeza batondeezya bukali* kumuntu uuchita zintu zibi.
5 Nkinkaako, kaambo kapati keelede kupa kuti mulibombye kulimbabo, takali kakuti muyoowa bukali oobo kupela, pesi kalaswaanizya akuti muyanda kuba aamyoyo iitamupi mulandu.*
6 Nchimubbadala mitelo nkaambo beendelezi aaba mbabelesi baLeza bagwasya bantu akaambo kamakanze aaya.
7 Amubape nzibeelede boonse. Ooyo uuyanda mutelo, amumupe mutelo, ooyo uuyanda kubbadalwa, amumubbadale, ooyo uuyanda kuyoowegwa, amumuyoowe, ooyo uuyanda kulemekwa, amumulemeke.
8 Mutabi aachikwelete kumuntu woonse, kunze kwachikwelete chakuyandana. Nkaambo kufumbwa muntu uuyanda muntunyina, wazuzikizya mulawu.
9 Nkaambo milawu yakuti: “Utachiti bumambi, utajayi, utabbi, uteemuzyi,” kuswaanizya ayimwi milawu yoonse iiliwo, iyakilidwe aakaambo aaka kati: “Weelede kuyanda simayakilane wako mbuli mbuliyanda.”
10 Muntu uuli aaluyando tabisizyi muntu ngwayakilenaawe pe. Nkinkaako, luyando luzuzikizya mulawu.
11 Amuchite zintu eezi nkaambo mulichizi chiindi, kuti yasika kale awa yakuti mubuke kuzwa kung’onzi, nkaambo lino lufutuko lwesu lwaba aafwiifwi loko kwiinda chiindi nitwakaba basyomi.
12 Busiku bweenda, lino kwaamba kucha, nkinkaako, atusowe milimu yamudima mpawo tuzwaate zilwanisyo zyamumuni.
13 Atweende bweelede mbuli mbubachita bantu nilili sikati, kutali mumapobwe aatanyoneki akukolwa, kuchita bwaamu amichito iitondwa,* kulwana akuchitilana bbivwe.
14 Pesi amuzwaate Mwaami Jesu Kkristu, alubo mutakanzi kakuchili chiindi kuchita zintu ziyandwa aamibili yanu.
Makani Aamunsi
^ Naakuti, “bapa chisubulo.”
^ Mabala aakuti ‘myoyo iitamupi mulandu,’ aawa aamba kuziba chibotu achibi. Langa Bupanduluzi Bwamabala, “Moyo.”
^ Naakuti, “akubisya kutakwe bweeme.” Majwi aaya azwa kubbala lyachiGrikki lyakuti a·sel′gei·a lili mubwiingi. Langa Bupanduluzi Bwamabala.
