KuBaroma 8:1-39
8 Nkinkaako, aabo balaamwi aKkristu Jesu tabakwe mulandu pe.
2 Nkaambo mulawu wamuuya uupa buumi muli Kkristu Jesu, wamwaangununa kumulawu wachibi awalufu.
3 Eezyo nzwaakatali kukonzya kuchita Mulawu akaambo kakuti teewakalikwe manguzu kubantu bali aachibi, Leza wakazichita kwiinda mukutuma Mwanaakwe kali muchiimo chabantu bali aachibi, kuti amaninsye chibi akuti achipe mulandu chibi chili mumubili,
4 kuchitila kuti zintu ziluleme zyaambwa aaMulawu, zizuzikizigwe mulindiswe nitweenda kweendelana aamuuya kutali kweendelana anyama.
5 Nkaambo aabo bapona kweendelana anyama, bayeeya zintu zyanyama, pesi aabo bapona kweendelana amuuya, bayeeya zintu zyamuuya.
6 Nkaambo kuyeeya zintu zyanyama chaamba lufu, pesi kuyeeya zintu zyamuuya, chaamba buumi aluumuno.
7 Nkaambo kuyeeya zintu zyanyama, chaamba kuba sinkondonyina aLeza, nkaambo nyama tayilibombyi kumulawu waLeza alubo tayikonzyi pe kuchita oobo.
8 Nkinkaako, aabo bapona kweendelana anyama, tabakonzyi pe kubotezya Leza.
9 Nikuba oobo, inywe mupona kweendelana amuuya kutali kweendelana anyama, kufumbwa kuti muuya waLeza kawukkede mulindinywe choonzyo. Pesi muntu uutakwe muuya waKkristu, teewakwe pe.
10 Pesi kuti Kkristu kalaamwi andinywe, mubili ulifwide akaambo kachibi, pesi muuya mbuumi akaambo kabululami.
11 Kuti muuya wayooyo wakabusya Jesu kuzwa kubafu kawuli mulindinywe, ooyo wakabusya Kkristu Jesu kuzwa kubafu, uzoopa kuti anjiyo mibili yanu iifwa, ibe aabuumi kwiinda mumuuya wakwe uukkede mulindinywe.
12 Nkinkaako bakombima, kuli zintu nzitweelede kuchita, kutali kunyama, kuti tupone kweendelana aziyandwa aanyama,
13 nkaambo kuti kamupona kweendelana anyama, kwaamba choonzyo mulafwa, pesi kuti mwajaya michito yamubili kwiinda mumuuya, mulaba bawumi.
14 Nkaambo aabo boonse beendelezegwa aamuuya waLeza, kwaamba choonzyo mbana baLeza.
15 Nkaambo teemwakatambula muuya wabuzike uupa kuti muyoowe lubo pe, pesi mwakatambula muuya uupa kuti mube bana baLeza. Alubo kwiinda mumuuya ooyo, tuloompolola katuti: “Abba,* Taata!”
16 Muuya ooyo ulazuminana amyoyo yesu* kuti tuli bana baLeza.
17 Nkinkaako, kuti katuli bana bakwe, andiswe tuli basikukona, nkukwaamba basikukona lukono luzwa kuli Leza, pesi tuyookonaamwi aKkristu, kufumbwa kuti twapenzegwaamwi anguwe, kuchitila kuti tukapegwe bulemu aamwi anguwe.
18 Nkaambo mapenzi ngindilikuswaana lino, tandaaboni kuba chintu pe, kuti ndaakozyanisya aabulemu butazooyubununwe mulindiswe.
19 Nkaambo zilenge zilikulindila kuyubununwa kwabana baLeza achiyandisyo chipati.
20 Nkaambo zilenge zyakachitwa kuti zibe zyabuyo, kutali akaambo kakuti zyakaliyandila pe, pesi akaambo kayooyo wakapa kuti zibe oobo, kuchitila kuti zibe aabulangilizi
21 bwakuti anzizyo zilenge zizoowangununwa kubuzike bwakubola, mpawo zibe aalwaangunuko lwabulemu bwabana baLeza.
22 Nkaambo tulizi kuti zilenge zyoonse ziliswini kumimila aamwi alubo zyoonse zili mumachise kusikila lino.
23 Mukuyungizya, andiswe nituli aamichelo yakusaanguna nkukwaamba muuya, tulamimila mumyoyo yesu nituchilindila aamoyo woonse kuti twaambwe kuti tuli bana baLeza kuti mibili yesu yaangununwe kwiinda muchinunuzyo.
24 Twakafutwidwa mubulangilizi oobu, pesi bulangilizi buboneka teebulangilizi pe, nkaambo kuti muntu wachibona chintu nchaali kulangilila, nga uchichilangilila na?
25 Pesi kuti katulikulangilila chintu nchitutaboni, nga tuliswini kuchilangilila achiyandisyo chipati katulisimya.
26 Munzila iikozyenie, anguwo muuya ulatugwasya chiindi nitutakwe manguzu nkaambo penzi ndyakuti, nga tatuzizi pe nzitweelede kukombela mbuli mbutweelede kukomba, pesi muuya ulatukombelezezya chiindi nitulikumimila katulikukachilwa kugwisya majwi.
27 Pesi ooyo uulanga-langa myoyo, ulizizi zyaambwa aamuuya nkaambo nga ulikukombelezezya basalali kweendelana akuyanda kwaLeza.
28 Tulizi kuti Leza upa kuti milimu yakwe yoonse ibelekelaamwi kuti igwasye aabo bamuyanda, aabo bakayitwa kweendelana amakanze aakwe.
29 Nkaambo aabo mbaakasaanguna kuyeeya, wakabasala kakuchili chiindi kuti babe muchikozyano chaMwanaakwe, kuchitila kuti abe wakusaanguna aakati kabakombinyina biingi.
30 Mukuyungizya, aabo mbaakasala kakuchili chiindi, mbimbabo mbaakayita alubo aabo mbaakayita, mbimbabo mbaakaamba kuti baliluleme. Alubo aabo mbaakaamba kuti baliluleme mbimbabo mbaakapa bulemu.
31 Nkinkaako, tutyeni atala azintu eezi? Kuti Leza kali kubbazu lyesu, ngwani uutatulwane?
32 Mbukunga taakatwiima Mwanaakwe pesi wakazumina kuti atufwide toonse, takatupi na zimwi zintu zyoonse aamwi anguwe?
33 Ngwani uutabape mulandu aabo bakasalwa aaLeza? Leza nguwe uubaamba kuti baliluleme.
34 Ngwani uutabape mulandu? Kkristu Jesu nguwe wakafwa, mukuyungizya, wakabusigwa kuzwa kubafu, lino ulikukuboko kwaLeza kwachilisyo, alubo nguwe uutukombelezezya.
35 Ngwani uutatwaanzaanie kuluyando lwaKkristu? Mapenzi na, naakuti makataazyo, naakuti nkupenzegwa, naakuti ninzala, naakuti nkubula zyakuzwaata, naakuti nkununkwa lufu, naakuti ndipanga?
36 Mbuli mbukulembedwe kuti: “Akaambo kandinywe, tulangene aalufu buzuba boonse, twabonwa mbuli mbelele ziya kukujayigwa.”
37 Nikuba oobo, muzintu zyoonse eezi, tulikuzunda chakumaninina kwiinda muli yooyo wakatuyanda.
38 Nkaambo ndili aachoonzyo chakuti lufu, naakuti buumi, naakuti ngilozi, naakuti mfulumende, naakuti zintu ziliwo lino, naakuti zintu zichiza, naakuti manguzu,
39 naakuti bulamfu bwakuya mujulu, naakuti kubbila, naakuti chimwi chilenge, tazikonzyi pe kutwaanzaania kuluyando lwaLeza luli muli Kkristu Jesu Mwaami wesu.
Makani Aamunsi
^ Eeli ndibbala lyachiHebberu naakuti lyachi-Aramu lyaamba kuti “O Taata!”
^ MuchiGrikki, “amuuya wesu.” Langa Bupanduluzi Bwamabala.
