Chiyubunuzyo chaJohane 20:1-15
20 Mpawo ndakabona ngilozi yakali kuseluka kuzwa kujulu kayijisi kkii yamulindi uutagoli ancheni mpati mukuboko kwayo.
2 Yakajata nzoka mpati iiyoosya, nkukwaamba nzoka yakusaanguna iitegwa Dyabbulosi aSaatani, alubo yakayisunga kwaminyaka iili 1 000.
3 Mpawo ngilozi eeyo yakamuwaalila mumulindi uutagoli, yawujala yamusinkila mukati, kuchitila kuti atazyeeni lubo zisi kusikila izoomane minyaka iili 1 000. Nizyayinda zintu eezi, weelede kwaangununwa kwachiindi chifwiifwi.
4 Mpawo ndakabona zyuuno zyabwaami, alubo aabo bakakkede aalinzizyo bakapegwa manguzu aakuti babeteke. Kwaamba choonzyo, ndakabona mawumi abaabo bakajayigwa akaambo kabukamboni mbubakapa atala aJesu alubo akaambo kakwaambuula atala aLeza, abaabo bakatakomba munyama naakuti chifanikisyo chawo abakatatambwide chitondeezyo aankumu zyabo akumaboko aabo. Bakaba bawumi alubo bakeendelezya kabali baami aKkristu kwaminyaka iili 1 000.
5 (Bamwi boonse bakafwide teebakaba bawumi pe kusikila niyakamana minyaka iili 1 000.) Ooku nkubusigwa kwakusaanguna.
6 Ulabotelwa alubo ulasalala ooyo uubusigwa mukubusigwa kwakusaanguna. Lufu lwachibili talukwe manguzu pe aali baaba, pesi bazooyendelezya kabali bapayizi baLeza abaKkristu, alubo bazooyendelezya kabali baami aamwi anguwe kwaminyaka iili 1 000.
7 Mbiitamane biyo minyaka iili 1 000, Saatani uzoowangununwa mujele lyakwe,
8 mpawo uzoozwa kuti ayene zisi mumabazu aane aanyika, nkukwaamba Gogi wamaGogi, kuti azibunganizye aamwi kunkondo. Mweelwe wazyo uli mbuli museele wamulwizi.
9 Bakazula nyika yoonse alubo bakazyunguluka nkambi yabasalali amuunzi uuyandwa. Pesi mulilo wakaseluka kuzwa kujulu mpawo wakabanyonyoona.
10 Alubo Dyabbulosi ooyo wakali kubeena wakawaalilwa mulwizi lwamulilo asalufa, oomo mwaakabede kale munyama amupolofita wakubeja, alubo bazoopenzegwa* sikati amansiku kusikila kukabe kutamani.
11 Mpawo ndakabona chuuno chabwaami chipati chituba aYooyo wakakkede aalinchicho. Nyika ajulu zyakachija kunembo lyakwe, alubo ndawu yazyo teeyakajanika pe.
12 Alubo ndakabona bafwide, bapati abaniini, kabayimvwi kunembo lyachuuno chabwaami, alubo mabbuku aakupeta akajulwa. Pesi limwi bbuku lyakupeta lyakajulwa, bbuku eeli ndibbuku lyabuumi. Mpawo bafwide bakabetekwa kakubelesegwa zintu zyakalembedwe mumabbuku aakupeta kweendelana amichito yabo.
13 Alubo lwizi lwakagwisya bafwide bakali mulindulo, alufu aKabanda* zyakagwisya bafwide bakali mulinzizyo, alubo umwi awumwi wakabetekwa kweendelana amichito yakwe.
14 Alubo lufu aKabanda* zyakawaalilwa mulwizi lwamulilo. Lwizi lwamulilo, lwiiminina lufu lwachibili.
15 Mukuyungizya, kufumbwa muntu wakajanika katalembedwe mubbuku lyabuumi, wakawaalilwa mulwizi lwamulilo.
Makani Aamunsi
^ Naakuti, “banookasidwe, banoosungidwe.”
^ Naakuti, “aHadesi.” Langa Bupanduluzi Bwamabala.
^ Naakuti, “aHadesi.” Langa Bupanduluzi Bwamabala.
