Chiyubunuzyo chaJohane 22:1-21
22 Mpawo yakanditondeezya mulonga wamaanzi aabuumi, aabalangala mbuli bbwe lyakkristali, kaakunka kuzwa kuchuuno chabwaami chaLeza achaMwanaambelele,
2 kaaya aakati kamugwagwa mupati wamuunzi. Kumabazu aabili aamulonga, kwakali minsamu yabuumi yakali kuzyala michelo iili 12, nkukwaamba kuti yakali kuzyala muchelo uumwi mweezi amweezi. Alubo matu aaminsamu eeyo akali aakuponia zisi.
3 Alubo takuchizoobi lutuko lubo pe. Pesi chuuno chabwaami chaLeza achaMwanaambelele zinooli mumuunzi, alubo bazike bakwe bazoomubelekela mulimu uusalala.
4 Alubo bazoobona kumeso kwakwe, alubo zina lyakwe lizooba aankumu zyabo.
5 Alubo, takuchinoolikwe mansiku pe, alubo tabachinooyandikani mumuni walambe naakuti wazuba, nkaambo Jehova* Leza uzoobamunikila, alubo bazooyendelezya kabali baami kusikila kukabe kutamani.
6 Yakati kulindime: “Majwi aaya alasyomeka alubo ngakasimpe. Kwaamba choonzyo, Jehova* Leza, ooyo uuzulwida bapolofita, watuma ngilozi yakwe kuti izootondeezye bazike bakwe zintu zyeelede kuchitika chakufwambaana.
7 Bona! Ndilikuza lino-lino. Ulabotelwa muntu uubamba majwi aabupolofita bwabbuku eeli lyakupeta.”
8 Ime ndiJohane, ndime ndakali kumvwa akubona zintu eezi. Nindakazimvwa akuzibona, ndakavuntama kumawulu aangilozi yakali kunditondeezya zintu eezi kuti ndiikombe.
9 Pesi yakandibuzya kuti: “Peepe! Utachiti oobo pe! Ime ndili muzike biyo mbuli nduwe abakombinyokwe, abapolofita abaabo babamba majwi aabbuku eeli lyakupeta. Komba Leza.”
10 Alubo yakandibuzya kuti: “Utaajali pe majwi aabupolofita bwabbuku eeli lyakupeta, nkaambo chiindi chibikkidwe chaba aafwiifwi.
11 Ooyo uutaluleme ayinkilile kunembo mukutalulama, alubo ooyo uutasalali ayinkilile kunembo mukutasalala kwakwe, pesi ooyo uululeme ayinkilile kunembo mubululami, alubo ooyo uusalala ayinkilile kunembo mubusalali.
12 “‘Bona! Ndilikuza lino-lino, alubo bulumbu mbundipa ndilaabo, kuti ndibweedezye umwi awumwi kweendelana amulimu wakwe.
13 Ndime Alufa a-Omega,* wakusaanguna awamamanino, matalikilo amamanino.
14 Balabotelwa aabo bawacha zigogo zyabo zilamfu, kuchitila kuti bazumizigwe kwiinka kuminsamu yabuumi akuti banjile mumuunzi kwiinda mumageedi aawo.
15 Aanze kuli bankala* abaabo bachita zyamizimu abasibwaamu* abajayi abasikukomba zibumbwa amuntu woonse uuyandisya kubeja akwaamba zyakubeja.’
16 “‘Ime ndiJesu, ndakatuma ngilozi yangu kuti izoomupe bukamboni atala azintu eezi zyambungano. Ndilimuyanda amwana waDavida alubo ndili nyenyeezi iimweka yakubuchedo.’”
17 Alubo muuya anabwiinga balikwiinkilila kunembo kwaamba kuti: “Kuza!” Alubo muntu woonse uumvwa ati, “Kuza!” Alubo muntu woonse uuli aanyota aze, ooyo uuyanda abweze maanzi aabuumi katabbadali pe.
18 “Ndilikupa bukamboni kumuntu woonse uumvwa majwi aabupolofita bwabbuku eeli lyakupeta: Kuti muntu wayungizya kuzintu eezi, Leza uzoomuyungizizya zipenzyo zilembedwe mubbuku eeli lyakupeta,
19 alubo kuti muntu wagwisya zimwi zintu kuzwa mumajwi aabbuku lyakupeta lyabupolofita oobu, Leza uzoogwisya chaabilo chakwe kuzwa kuminsamu yabuumi akuzwa mumuunzi uusalala, nkukwaamba zintu zilembedwe mubbuku eeli lyakupeta.
20 “Ooyo uupa bukamboni bwazintu eezi waamba kuti, ‘Kwaamba choonzyo, ndilikuza lino-lino.’”
“Ameni! Kuza Mwaami Jesu.”
21 Luzyalo lupati lwaMwaami Jesu alube aabasalali.
Makani Aamunsi
^ Langa Bupanduluzi Bwamabala.
^ Langa Bupanduluzi Bwamabala.
^ Naakuti, “Ndime A aZ.” Bbala lyakuti Alufa, ndibbii lyakusaanguna mu-alufabbeti yachiGrikki, lyakuti Omega ndyamamanino.
^ Nkukwaamba, aabo boonse bachita michito iisesemya mumeso aaLeza.
^ Langa Bupanduluzi Bwamabala, “Bwaamu.”
