Detoronomi 16:1-22
16 Amubambe mweezi wa-Abbibbi,* musekelele Pasika kuli Jehova Leza wanu, nkaambo mumweezi wa-Abbibbi Jehova Leza wanu wakamugwisya mu-Ijipita mansiku.
2 Mweelede kupa Jehova Leza wanu chipayizyo chaPasika kuzwa kumbelele, mpongo ang’ombe kundawu Jehova njatazoosale kuti zina lyakwe likkale nkuko.
3 Chipayizyo eechi tamweelede kuchilya aamwi achintu chili aabumena. Mweelede kulya chinkwa chitakwe bumena kwamazuba aali musanu aabili, ichinkwa chamapenzi, nkaambo mwakazwa munyika ya-Ijipita kamuchijaana. Amuchite oobo kufumbwa kamuchipona, kuchitila kuti kamubuyeeya buzuba mbumwakazwa munyika ya-Ijipita.
4 Mumazuba aali musanu aabili, taakwe fulawa iikandidwe iifufumukide yeelede kujanika aakati kanu muzilawu zyanu zyoonse alubo taakwe nyama yachipayizyo nchimutapayizye goko mubuzuba bwakusaanguna yeelede kusyaala busiku boonse kusika kuseeni.
5 Tamuzumizigwi pe kupa chipayizyo chaPasika kufumbwa mumyuunzi Jehova Leza wanu njalikumupa.
6 Pesi mweelede kuchipeda kundawu Jehova Leza wanu njatazoosale kuti zina lyakwe likkale nkuko, mweelede kupayizya chipo chaPasika goko zuba kalili kubbila aachiindi chibikkidwe nimwakazwa mu-Ijipita.
7 Mweelede kuchijika akuchilida mundawu Jehova Leza wanu njatazoosale, mpawo kuseeni mulakonzya kubweeda kumatente aanu.
8 Mumazuba aali musanu alimwi, mweelede kulya chinkwa chitakwe bumena mpawo mubuzuba bwamusanu aabili muzoochita muswaangano uuyandikana kuli Jehova Leza wanu. Tamweelede kubeleka pe.
9 “Mweelede kubala mviki zili musanu azibili. Mweelede kusaanguna kubala mviki eezyo zili musanu azibili kuzwa chiindi nimutebula zilyo mumyuunda yanu.
10 Mpawo muzoosekelela Pobwe lyaMviki kuli Jehova Leza wanu azipo zyakuliyandila nzimutazoope kweendelana ambaakamulongezya Jehova Leza wanu.
11 Mweelede kubotelwa kunembo lyaJehova Leza wanu, kundawu Jehova Leza wanu njatazoosale kuti zina lyakwe likkale nkuko, inywe abana banu balombe, bana banu basimbi, bazike banu bachaalumi, bazike banu bachanakazi, maLevi bakkede mumyuunzi yanu, beenzu, bamuchaala, abamukabafu bali aakati kanu.
12 Amuyeeye kuti mwakali bazike mu-Ijipita alubo amwaabambe akwaatobela malayilile aaya.
13 Mweelede kusekelela Pobwe lyaZivututu kwamazuba aali musanu aabili chiindi nimubunganizya zilyo zyanu kuzwa kulubuwa lwakupolela amafuta awayini kuzwa kuzikandilo zyanu.
14 Amubotelwe nimuchita pobwe eelyo kamulaamwi abana banu balombe, bana banu basimbi, bazike banu bachaalumi, bazike banu bachanakazi, maLevi, beenzu, bamuchaala abamukabafu bali mumyuunzi yanu.
15 Kwamazuba aali musanu aabili muzoosekelela pobwe kuli Jehova Leza wanu, kundawu Jehova njatazoosale nkaambo Jehova Leza wanu uzoomulongezya kubutebuzi bwanu boonse amuzintu zyoonse nzimuchita. Mpawo muzoobotelwa loko.
16 Tutatu amunyaka, bantu bachaalumi boonse beelede kuza kunembo lyaJehova Leza wanu, kundawu njatazoosale: kuPobwe lyaZinkwa Zitakwe Bumena, kuPobwe lyaMviki, akuPobwe lyaZivututu. Taakwe weelede kuza kunembo lyaJehova katakwe chintu.
17 Chipo nchatazoozaacho umwi awumwi wanu cheelede kweendelana aachilongezyo nchimutazoopegwe aaJehova Leza wanu.
18 Mweelede kusala babetesi basilutwe mumusyobo umwi awumwi mumyuunzi Jehova Leza wanu njalikumupa alubo beelede kubeteka bantu munzila iiluleme.
19 Mutachiti zintu munzila iitaluleme, mutasaluuli pe nikuba kutambula chisinkamulomo, nkaambo chisinkamulomo choofwaazya meso aabasongo akupambanisya majwi aabalulami.
20 Mweelede kutobela bululami, kuchitila kuti mwiinkilile kunembo kupona akuti mubweze nyika Jehova Leza wanu njalikumupa.
21 Tamweelede kubyala munsamu nuuba uumwi kuti ube chisamu chisalala* aafwiifwi achipayililo nchimuzoopangila Jehova Leza wanu.
22 Mutalipangili pila lisalala, nkaambo Jehova Leza wanu ulawuzonda.
