Detoronomi 23:1-25
23 “Taakwe mwaalumi wakazibwa kwiinda mukupwayigwa mabbola naakuti wakadunsulwa chizo chakwe chabwaalumi weelede kuza mumbungano yaJehova.
2 “Taakwe mwana wamusokwe weelede kunjila mumbungano yaJehova. Nibaba bana bakwe tabeelede kuza pe mumbungano yaJehova kusika kuzyalani lyakkumi.
3 “Taakwe mu-Amoni naakuti muMowabbu weelede kuza mumbungano yaJehova. Nibaba bana babo tabeelede kuza pe mumbungano yaJehova kusika kuzyalani lyakkumi,
4 nkaambo teebakamugwasya aachakulya amaanzi nimwakali munzila kamuzwa ku-Ijipita alubo akaambo kakuti bakatuma Bbalamu mwana waBbewori wakuPetori kuMesopotamiya kuti amutuke.*
5 Pesi Jehova Leza wanu wakakaka kumuswiilila Bbalamu alubo Jehova Leza wanu wakachincha lutuko kuti lube chilongezyo kulindinywe nkaambo Jehova Leza wanu wakali kumuyanda.
6 Mubuumi bwanu boonse, tamweelede kubagwasya pe kuti babe aaluumuno akuti bazwidilile.
7 “Utazondi mu-Edomu pe nkaambo mwananyokwe.
“Utazondi mu-Ijipita pe nkaambo wakali mweenzu munyika yakwe.
8 Zyalani lyachitatu lyabana babo lilakonzya kunjila mumbungano yaJehova.
9 “Kuti mwakkempa kuti mulwane basinkondonyokwe, mutachiti chintu chibi* pe.
10 Kuti mwaalumi wasofwaala kwiinda mukusuba bwaalumi mansiku, weelede kuya aanze aakkeempu alubo tayelede kuboola lubo mukkeempu.
11 Goko weelede kusamba mpawo nilyabbila zuba ulakonzya kuboola mukkeempu.
12 Mweelede kusala ndawu iisisikene* kunze aakkeempu alubo ooko nkumweelede kwiinka.
13 Weelede kuba aachakusisya aakati kazibelesyo zyako. Chiindi nuya kukuligwasya kunze, weelede kusya kkomba anchicho mpawo uvwikkile doti lyako.
14 Nkaambo Jehova Leza wanu ulikweendeenda mukkeempu yanu kuti amuvune akuti ababikke mumaboko aanu basinkondonyokwe, kkeempu yanu yeelede kusalala kuchitila kuti ataboni chimwi chintu chisesemya mulindinywe akuleka kweenda aandinywe.
15 “Toyelede kubweedezya muzike kuli simalelaakwe kuti wamuchija mpawo waza kulinduwe.
16 Ulakonzya kukkala aanduwe kundawu njaasala muli umwi wamyuunzi yako kufumbwa mpaayanda. Toyelede kumukataazya pe.
17 “Taakwe mwana musimbi naakuti mwana mulombe wamu-Israyeli weelede kuba wuule lyamutempele.
18 Toyelede kweeta mali yabbadalwa wuule lyachanakazi naakuti lyachaalumi* kung’anda yaJehova Leza wako kuti uzuzikizye chikonke, nkaambo boonse balasesemya kuli Jehova Leza wako.
19 “Utakweletesyi bbululu wako zintu kuyanda kuti azookupe kazili zyazyala kufumbwa kuti nimali, nchakulya naakuti nchiimwi chintu chikonzya kuboola kachili chazyala.
20 Mweenzu ulakonzya kumukweletesya mali iizyala, pesi mwananyokwe toyelede kumukweletesya mali iizyala pe, kuchitila kuti Jehova Leza wako azookulongezye muzintu zyoonse nzutazoochite munyika njutazoobweze.
21 “Kuti wakonka kuli Jehova Leza wako, utanonoki pe kuchizuzikizya, nkaambo kwaamba choonzyo, Jehova Leza wako uzooyanda kuti uchizuzikizye nkaambo kuti teewachita oobo, unooli wabisya.
22 Pesi kuti teewakonka tunoolikwe mulandu pe.
23 Weelede kubamba majwi ngwaakaamba amulomo wako, alubo uzuzikizye nzwaakakonka kachili chipo chakuliyandila kuli Jehova Leza wako.
24 “Kuti wanjila mumuunda wamisaansa wasimayakilane wako, ulakonzya kulya masaansa kusikila ukkute, pesi taakwe ngweelede kubikka muchibikkilo pe.
25 “Kuti wanjila mumuunda wasimayakilane wako uuli aazilyo zyiimvwi, ulakonzya kupulula zibizidwe, pesi toyelede kunjizya sikela pe muzilyo zyakwe.
Makani Aamunsi
^ Naakuti, “amwaambile kuti muchitikilwe zintu zibi.”
^ Naakuti, “chisofwaazya.”
^ Nkukwaamba chimbuzi.
^ MuchiHebberu, “munkala.”
