Detoronomi 12:1-32
12 “Aaya ngiimalayilile anzila zyakubeteka nzimweelede kutobela mumazuba aabuumi bwanu boonse munyika Jehova Leza wamasianyookulu njatazoomupe kuti mukone.
2 Mweelede kunyonyoona ndawu zyoonse zyazisi nzimuyootanda nzibakombela baleza babo, kufumbwa kuti muuzilundu zilamfu naakuti muutulundu naakuti munsi aaminsamu iifwefwema.
3 Mweelede kudilisya zipayililo zyabo, mupwaye mapila aabo aasalala, mutente zisamu zyabo zisalala,* mugonkoole zikozyano zibezedwe zyabaleza babo, muzimaazye mazina aabaleza babo mundawu eeyo.
4 “Mutakombi Jehova Leza wanu munzila eeyo.
5 Pesi amuyanduule Jehova Leza wanu, kufumbwa nkwaasala kubikka zina lyakwe akukkala aakati kamisyobo yanu yoonse mpawo mwiinke nkukooko.
6 Kundawu eeyo nkuko nkumweelede kutola zipo zyanu zitentwa, azipayizyo zyanu, zyakkumi zyanu, zipo zyanu, zipo zyanu zyachikonke, zipo zyanu zyakuliyandila, abana bakusaanguna bang’ombe, mbelele ampongo zyanu.
7 Inywe abamumaanda aanu mweelede kulida nkukooko kunembo lyaJehova Leza wanu, alubo mukondwe amilimu yanu yoonse nkaambo Jehova Leza wanu wamulongezya.*
8 “Tamweelede kuchita mbuli mbutuli kuchita sunu, umwi awumwi kalikuchita nzyabona kuti zililuleme mumeso aakwe,*
9 nkaambo tamunasika pe kundawu yakupumuna akulukono ndwalikumupa Jehova Leza wanu.
10 Nimwazoozubuka Jodani akukkala munyika njalikumupa Jehova Leza wanu kuti mukone, kwaamba choonzyo, uzoomupumuzya kuli basinkondonyokwe boonse bamuzyungulukide, muzookkala kamulyiibide.
11 Mweelede kutola zintu zyoonse nzindili kumulayilila kundawu Jehova Leza wanu njatazoosale kuti zina lyakwe likkale nkuko, nkukwaamba zipo zyanu zitentwa, zipayizyo zyanu, zyakkumi zyanu, zipo zyanu, azipo zyachikonke zyoonse nzimukonkezya kuli Jehova.
12 Muzookondwa kunembo lyaJehova Leza wanu, inywe abana banu balombe, bana banu basimbi, bazike banu bachaalumi abachanakazi amuLevi uukkala mumyuunzi yanu,* nkaambo taakwe chaabilo naakuti lukono aamwi andinywe.
13 Amuchenjelele kuti mutapi zipo zyanu zitentwa kuli imwi ndawu njimutabone.
14 Mweelede kupa zipo zyanu zitentwa kundawu eeyo Jehova njatazoosale kupela muli chimwi chilawu chamisyobo yanu, alubo kundawu eeyo mweelede kuchita zintu zyoonse nzindili kumulayilila.
15 “Pesi kufumbwa chiindi nimwayanda kulya nyama, mulakonzya kujaya akulya nyama kweendelana azilongezyo nzyaamupa Jehova Leza wanu mumyuunzi yanu yoonse.* Muntu uusofweede awutasofweede balakonzya kwiilya mbuli mbumulya mondwe naakuti nsya.
16 Pesi tamweelede kulya ganzi pe, mweelede kulitila aansi mbuli maanzi.
17 Tamuzumizigwi pe kulida mumyuunzi yanu* chipanzi chakkumi chazilyo zyanu, chawayini yanu mpya, chamafuta aanu, bana bakusaanguna bang’ombe, mbelele ampongo zyanu, kufumbwa zipo zyanu zyachikonke nchimukonka naakuti zipo zyanu zyakuliyandila naakuti zipo zyanu.
18 Zintu eezi mweelede kuzilida kunembo lyaJehova Leza wanu, kundawu eeyo Jehova Leza wanu njatazoosale, inywe abana banu balombe abana banu basimbi, babelesi banu bachaalumi abachanakazi amuLevi uukkala mumyuunzi yanu,* muzookondwa kunembo lyaJehova Leza wanu mumilimu yanu yoonse.
19 Amuchenjelele kuti mutamulubi muLevi kufumbwa nimuchikkala munyika yanu.
20 “Jehova Leza wanu naazookomezya chilawu chanu mbuli mbaakamusyomezya mpawo mwazoowamba kuti, ‘Ndiyanda kulya nyama,’ akaambo kakuti mwayanda kulya nyama, mulakonzya kwiilya kufumbwa mpumwayiyandila.
21 Kuti ndawu Jehova Leza wanu njatazoosale kubikka zina lyakwe kayili kule ankumukkala, nkukwaamba kuti, mweelede kujaya ng’ombe, mbelele naakuti mpongo zyanu Jehova nzyaakamupa mbuli mbundakamulayilila mpawo mwiilide mumyuunzi yanu* kufumbwa mpumwayiyandila.
22 Mulakonzya kwiilya mbuli mbumulya mondwe ansya, muntu uusofweede awutasofweede balakonzya kwiilya.
23 Amube aachoonzyo chakuti tamulyi ganzi pe, nkaambo ganzi mbuumi, tamweelede kulya buumi anyama.
24 Tamweelede kulilya pe, mweelede kulitila aansi mbuli maanzi.
25 Tamweelede kulilya pe kuchitila kuti zimweendele kabotu abana mbimutazoobe aabo, nkaambo mulikuchita zintu ziluleme mumeso aaJehova.
26 Mweelede kubweza biyo zintu zyanu zisalala azipo zyanu zyazikonke nimuza kundawu Jehova njatazoosale.
27 Kundawu eeyo muzoopa zipo zyanu zitentwa nyama aganzi aachipayililo chaJehova Leza wanu, ganzi lyazipayizyo zyanu lyeelede kutilwa kumbali aachipayililo chaJehova Leza wanu, pesi nyama mulakonzya kwiilya.
28 “Mweelede kwaaswiilila majwi woonse ngindili kumulayilila, kuchitila kuti zimweendele kabotu abana mbimutazoobe aabo nkaambo mulikuchita zintu ziluleme mumeso aaJehova Leza wanu.
29 “Jehova Leza wanu aazoonyonyoona zisi nzimutazoozunde animwazookkala munyika yazyo,
30 amuzoochenjelele kuti mutazoochegwi pe zyazoomana kunyonyoonwa kunembo lyanu. Mutazoobuzyi atala abaleza bazyo kuti, ‘Zisi eezi zyakali kubakomba biyeni baleza bazyo?’ ‘Andiswe tulachita mbuli nzizyo.’
31 Mutachiti zintu eezi kuli Jehova Leza wanu, nkaambo zisi eezi zichitila baleza bazyo zintu zyoonse zisesemya zizondwa aaJehova nikuba kutenta bana babo balombe abasimbi mumulilo kuli baleza bazyo.
32 Mweelede kutobela majwi woonse ngindili kumulayilila, taakwe nchimweelede kuyungizya naakuti kugwisya kulingawo.
Makani Aamunsi
^ Langa Bupanduluzi Bwamabala.
^ Bamwi bati “wamukombweda.”
^ Naakuti, “nzyayeeya kuti zililuleme.”
^ MuchiHebberu, “mumageedi aanu.”
^ MuchiHebberu, “mumageedi aanu woonse.”
^ MuchiHebberu, “mumageedi aanu.”
^ MuchiHebberu, “mumageedi aanu.”
^ MuchiHebberu, “mumageedi aanu.”
