Detoronomi 7:1-26
7 “Jehova Leza wanu aazoomunjizya munyika njimwaba aafwiifwi kunjila kuti mwiibweze, uzootanda zisi zipati kunembo lyanu: maHeti, maGigashi, ma-Amori, maKkenani, maPerezi, maHivi amaJebbusi, zisi zili musanu azibili zili aabantu biingi bali aamanguzu kwiinda ndinywe.
2 Jehova Leza wanu uzoobabikka mumaboko aanu alubo muzoobazunda. Mweelede kubanyonyoona. Mutapangi chizuminano ambabo nikuba kubafwida luzyalo.
3 Mutakwatilani* ambabo pe. Mutakwatyi bana banu basimbi kubana babo balombe naakuti kubweza bana babo basimbi kuti bakwatwe aabana banu balombe.
4 Nkaambo balapa kuti bana banu baleke kunditobela akukomba bamwi baleza; mpawo bukali bwaJehova buzoomuvutukila alubo uzoomunyonyoona chakufwambaana.
5 “Pesi nzezi nzimweelede kubachitila: Amudilisye zipayililo zyabo, mutyoloole mapila aabo aasalala, mugonkoole zisamu zyabo zisalala* alubo mutente zikozyano zyabo zibezedwe.
6 Nkaambo muli bantu basalala kuli Jehova Leza wanu alubo Jehova Leza wanu wakamusala kuti mube bantu bakwe, bantu bakwe mbayandisya aakati kabantu boonse bakkala aanyika.
7 “Takuli kuti Jehova wakamuyanda akumusala akaambo kakuti mwakali biingi loko kwiinda misyobo yoonse, nkaambo mwakali bache loko kwiinda misyobo yoonse.
8 Pesi Jehova wakachita oobo akaambo kakuti wakamuyanda akubamba chikonke chakwe nchaakakonkezya masianyookulu. Jehova wakamugwisya aakuboko kuli aamanguzu kuti amuvune mung’anda yabuzike, mukuboko kwaFaro* mwaami wa-Ijipita.
9 Muzizi loko kuti Jehova Leza wanu nguLeza wakasimpe, nguLeza uusyomeka uubamba chizuminano chakwe aluyando lutamani kuzyuulu zyamazyalani aabaabo bamuyanda ababamba milawu yakwe.
10 Pesi aabo bamuzonda uzoobakkwichizya kwiinda mukubanyonyoona. Tazoononoki pe kubapa zibeelede aabo bamuzonda; uzoobakkwichizya kabalanga.
11 Amube aachoonzyo chakuti mwatobela milawu amalayilile anzila zyakubeteka nzindili kumulayilila sunu kuti muzibambe.
12 “Kuti mwiinkilile kunembo kuswiilila nzila zyakubeteka eezi akuzibamba akuzitobela, Jehova Leza wanu uzoobamba chizuminano akumutondeezya luyando lutamani, mbuli mbaakakonkezya kumasianyookulu.
13 Uzoomuyanda akumulongezya akumuvuzya. Kwaamba choonzyo, uzoomulongezya kwiinda mukumupa bana biingi, butebuzi mumyuunda yanu, zilyo zyanu, wayini yanu mpya, mafuta aanu, bana bang’ombe zyanu abana bambelele zyanu munyika njaakakonkezya masianyookulu kuti uzoomupa.
14 Muzooba musyobo uulongezedwe kwiinda imwi misyobo yoonse; taakwe mwaalumi naakuti mwanakazi uutazoobule mwana aakati kanu alubo zivuubwa zyanu tazizooleki pe kuzyala.
15 Jehova uzoomugwisizya malwazi woonse, tazoomweeteli malwazi mabi ngimwakabona mu-Ijipita. Pesi uzoowayetela bantu boonse bamuzonda.
16 Mweelede kunyonyoona bantu boonse Jehova Leza wanu mbatabikke mumaboko aanu. Tamweelede kubafwida nsoni pe alubo tamweelede kukomba baleza babo, nkaambo kuchita oobo kulaba kakole kulindinywe.
17 “Kuti mumyoyo yanu mwalibuzya kuti, ‘Zisi eezi nzyiingi loko kwiinda ndiswe. Tulazitanda biyeni?’
18 tamweelede kuziyoowa pe. Mweelede kuyeeya nzyaakachita Jehova Leza wanu kuli Faro aku-Ijipita yoonse,
19 ambeta mpati nzimwakabona* azitondeezyo azigambyo akuboko kuli aamanguzu kutandabikidwe, nzyaakabelesya Jehova Leza wanu kuti amugwisye mu-Ijipita. Eezi nzizyo nzyatazoochite Jehova Leza wanu kubantu boonse mbimuyoowa.
20 Jehova Leza wanu uzoopa kuti bamane manguzu* kusikila balobe aabo bakasyeede abakali kumuyuba.
21 Mutazazami pe akaambo kambabo, nkaambo Jehova Leza wanu uli aandinywe, nguLeza mupati uuyoosya.
22 “Jehova Leza wanu unooya buzitanda zisi eezi kunembo lyanu mbichaani-mbichaani. Tamukazumizigwi pe kuzinyonyoona chakufwambaana, kuchitila kuti banyama bamusokwe batamuvulili akumuzunda.
23 Jehova Leza wanu uzoobabikka mumaboko aanu, muzoobazunda chakumaninina kusikila balobe boonse.
24 Uzoobikka baami mukuboko kwanu, muzoowazimaazya mazina aabo aansi aamajulu. Taakwe uutazookonzye kulwana aandinywe kusikila mwabalobya boonse.
25 Mweelede kutenta zikozyano zibezedwe zyabaleza babo. Muteemuzyi nsiliva naakuti ngolida iili aalinzizyo naakuti kwiibweza kuti ibe yanu, kuchitila kuti itabi kakole kulindinywe, nkaambo nchintu chisesemya kuli Jehova Leza wanu.
26 Muteeti chintu chisesemya mumaanda aanu nkaambo chilapa kuti mweelele kunyonyoonwa mbuli nchicho. Mweelede kuchinyanya akuchisesemwa chakumaninina, nkaambo nchintu cheelede kunyonyoonwa.
Makani Aamunsi
^ Naakuti, “Mutapangi chizuminano chalukwatano.”
^ Langa Bupanduluzi Bwamabala.
^ Naakuti, “kumanguzu aaFaro.”
^ Naakuti, “amasunko mapati ngimwakabona.”
^ Naakuti, “bayoowe.”
