Esita 4:1-17
4 Modekkayi naakaziba zyoonse zyakali zyachitwa, wakadelula zigogo zyakwe, wazwaata chigogo chamasaka akulitutila dyota, mpawo wakayinka aakati kamuunzi kalikubobola zifwisya nsoni.
2 Wakeenda waakwiimikila aageedi lyamwaami nkaambo taakwe muntu wakali kuzumizigwa pe kunjila mugeedi lyamwaami kazweete chigogo chamasaka.
3 Muzilikiti zyoonse mulyakasika jwi amulawu wamwaami, maJuda bakalila loko, bakalyiimya kulya alubo bakoomoka akulilisya. Bantu biingi bakali koona aamasaka amudyota.
4 Babelesi ba-Esita bachanakazi abamwi babelesi bazibidwe nibakanjila akumubuzya, namalelo wakakataazikana loko. Mpawo wakatumizya zigogo zyakuti Modekkayi azwaate akuti agwisye chigogo chamasaka nchaakazweete, pesi Modekkayi wakazikaka.
5 Mpawo Esita wakatuma Hatakki, umwi wababelesi uuzibidwe wamwaami, mwaami ngwaakali wasala kuti amubelekele. Wakamutuma kuli Modekkayi kuti akamvwe kuti eezi zyakali kwaambaanzi akuti niinzi zyakali kuchitika.
6 Hatakki wakayinka kuli Modekkayi mulubuwa lwamuunzi, kunembo lyageedi lyamwaami.
7 Modekkayi wakamubuzya zyoonse zyakali zyamuchitikila, amali Hamani njaakali wasyomezya kugwisya kuti izoobikkwe muchibikkilo chamali chamwaami, kuchitila kuti maJuda banyonyoonwe.
8 Alubo wakamupa lugwalo lwakali aamulawu wakazwa muShushani* lwakali atala akunyonyoonwa kwabo. Mubelesi ooyo uuzibidwe wakeelede kulutondeezya Esita akulupandulula kulinguwe akumubuzya kuti aye kumwaami akakumbile kufwidwa luzyalo akuti akakombelezezye bantu bakwe.
9 Hatakki wakaboola mpawo wabuzya Esita zyakaambwa aaModekkayi.
10 Esita wakabuzya Hatakki nzyaakeelede kuyoobuzya Modekkayi. Wakati:
11 “Babelesi boonse bamwaami abantu bali muzilikiti zyamwaami balizi kuti, kuti mwaalumi naakuti mwanakazi wanjila mulubuwa lwamukati lwamwaami katayitidwe pe, kuli mulawu uumwi biyo uubeleka, weelede kujayigwa. Ulakonzya kupona biyo kuti mwaami watandabika nkoli yabwaami yangolida kulinguwe. Lino ndaba aamazuba aali 30 kanditayitidwe pe amwaami.”
12 Modekkayi naakabuzigwa zyakaambwa aa-Esita,
13 wakasandula Esita kuti: “Utabonaanga kuba mung’anda yamwaami kuzookufutula chiindi maJuda boonse nibatazoonyonyoonwe.
14 Nkaambo kuti wawumuna biyo aachiindi eechino, lwaangunuko alufutuko lwamaJuda luyoozwa kumbi, pesi iwe abamung’anda yawuso mulajayigwa. Ngwani uuzi, amwi bulemu oobu mbwaakajana mubwaami mbwakuti uzootufutule muchiindi eechino chamapenzi?”
15 Mpawo Esita wakasandula Modekkayi kuti:
16 “Yinka, ukabunganizye maJuda boonse bali muShushani,* mulyiimye kulya akaambo kandime. Mutalyi naakuti kunywa kwamazuba aatatu, mansiku asikati. Ime ababelesi bangu basimbi tulalyiimya kulya. Ndilayinka kumwaami nikuba kuti mulawu tuuzumizyi pe. Kuti kakuli kufwa, andikafwe biyo.”
17 Nkinkaako, Modekkayi wakeenda waakuchita zintu zyoonse Esita nzyaakamubuzya kuti achite.
