Esita 9:1-32
9 Mubuzuba bwachi 13, mumweezi wachi 12, nkukwaamba mweezi wa-Ada,* aawo majwi amulawu wamwaami nizyakeelede kuzuzikizigwa, mubuzuba basinkondonyina bamaJuda nibakali kulangilila kubazunda, kwakachitika zisiyene, maJuda bakazunda bantu bakali kubazonda.
2 MaJuda bakabunganaamwi mumyuunzi yabo muzilikiti zyoonse zyaMwaami Ahasuwera kuti balwane bantu bakali kuyanda kubajaya. Taakwe wakayimikila pe kunembo lyabo nkaambo bantu boonse bakali babayoowa.
3 Beendelezi boonse bazilikiti, balupati-pati, beendelezi abasikulanga makani aamwaami bakali kubbazu lyamaJuda, nkaambo bakali kumuyoowa Modekkayi.
4 Modekkayi wakali waba aamanguzu mung’anda yamwaami alubo mpuwo yakwe yakali kuyobuzula muzilikiti zyoonse, nkaambo manguzu aakwe akali kuyabuvula.
5 MaJuda bakajaya basinkondonyina boonse apanga, bakabalobya akubanyonyoona. Bakabachita kufumbwa nzibakali kuyanda aabo bakali kubazonda.
6 MaJuda bakajaya akunyonyoona baalumi basika ku 500 muShushani,* muunzi uukwabilidwe.*
7 Alubo bakajaya Pashandata, Dalofini, Aspata,
8 Porata, Adaliya, Aridata,
9 Pamashita, Arisayi, Aridayi aVayizata,
10 abana bali kkumi baHamani mwana waHamedata, sinkondonyina wamaJuda. Nibakabajaya, taakwe nibakabweza zintu zyabo pe.
11 Mubuzuba oobo, mwaami wakabuzigwa namba yabantu bakajayigwa muShushani,* muunzi uukwabilidwe.*
12 Mwaami wakabuzya Namalelo Esita kuti: “MuShushani,* muunzi uukwabilidwe,* maJuda bajaya akunyonyoona baalumi bali 500 abana baHamani bali kkumi. Ubonaanga muli zimwi zilikiti zyamwaami mwiimvwi biyeni? Lino uyandaanzi? Ulazipegwa nzuyanda. Kuchili zimwi na nzuyanda kukumbila? Ulazipegwa.”
13 Esita wakasandula kuti: “Kuti kazimubotezya mwaami, maJuda abazumizigwe lubo kuti juunza bachite lubo kweendelana azili mumulawu wasunu alubo bana baHamani abaanzikwe aachisamu.”
14 Mwaami wakalayilila kuti eezi zichitwe, mulawu wakazwa muShushani* alubo bana bali kkumi baHamani bakaanzikwa.
15 MaJuda bakali muShushani* bakabungana lubo mubuzuba bwachi 14 bwamweezi wa-Ada mpawo bakajaya baalumi bali 300 muShushani,* pesi taakwe nibakabweza zintu zyabo pe.
16 MaJuda boonse bakali muli zimwi zilikiti zyamwaami ambabo bakabunganaamwi akulwanina buumi bwabo. Bakalwana basinkondonyina akujaya bantu bali 75 000 bakali kubazonda, pesi taakwe nibakabweza zintu zyabo pe.
17 Eezi zyakachitika mubuzuba bwachi 13 bwamweezi wa-Ada, mpawo mubuzuba bwachi 14 bakapumuna alubo bakabuchita kuti bube buzuba bwapobwe abwakubotelwa.
18 MaJuda bakali muShushani* bakabunganaamwi mubuzuba bwachi 13 abwachi 14 mpawo bakapumuna mubuzuba bwachi 15 alubo bakabuchita kuti bube buzuba bwapobwe abwakubotelwa.
19 Eezi nzizyo zyakapa kuti maJuda bakali kukkala kuliimwi myuunzi bachite kuti buzuba bwachi 14 bwamweezi wa-Ada bube buzuba bwakubotelwa, bwapobwe, bwakusekelela achiindi chakupana zyakulya.
20 Modekkayi wakalemba zintu eezi akutumizya magwalo aali mumulawu kumaJuda boonse bakali aafwiifwi abakali kule muzilikiti zyoonse zyamwaami Ahasuwera.
21 Wakabalayilila kuti babambe buzuba bwachi 14 abwachi 15 bwamweezi wa-Ada munyaka amunyaka,
22 nkaambo mumazuba aaya, maJuda bakaangunuka kuli basinkondonyina alubo mumweezi ooyu, kuusa kwabo kwakachincha kwaba kubotelwa akulila kwabo kwakaba kusekelela. Mazuba aaya, bakeelede kwaabamba mbuli mazuba aapobwe amazuba aakusekelela achiindi chakupana zyakulya achakubapa zipo bafwaba.
23 Alubo maJuda bakazumina kuti bakali kuzooyinkilila kunembo kusekelela pobwe eeli ndibakali batalika akuchita nzyaakali wabalembela Modekkayi.
24 Nkaambo Hamani mwana waHamedata mu-Agagi sinkondonyina wamaJuda boonse, wakali wazwa aamuzeezo mubi wakunyonyoona maJuda. Alubo wakali wawaala Puri, nkukwaamba chisale, kuchitila kuti bayoowe akuti abanyonyoone.
25 Pesi Esita naakasika kunembo lyamwaami, mwaami wakalayilila kuti: “Muzeezo wakwe mubi atala amaJuda awuze aamutwe wakwe,” mpawo Hamani bakamwaanzika aachisamu abana bakwe.
26 Nchibakawuzika mazuba aayo kuti Purimu, kuzwa kuzina lyaPuri.* Nkinkaako, akaambo kazintu zyoonse zyakalembedwe mulugwalo oolo anzibakali babona akaambo kamakani aaya azintu zyakali zyabasikila,
27 maJuda bakasala kuti bataleki pe kusekelela mazuba aayo aabili akuchita zintu zyakalembedwe atala ambabo aachiindi chibikkidwe munyaka amunyaka. Eezi bakali kuzoozichita abana babo abantu boonse bakali kuzooliswaanizya aambabo.
28 Mazuba aaya akeelede kuyeeyegwa akubambwa mumazyalani woonse, ampuli imwi ayimwi, muchilikiti chimwi achimwi amumuunzi umwi awumwi alubo mazuba aaya aaPurimu taakeelede kumana pe aakati kamaJuda alubo bana babo teebakeelede kuleka pe kwaasekelela.
29 Namalelo Esita mwana wa-Abbihayili aModekkayi muJuda, bakalemba lugwalo lwabili munguzu zyabo kuti basimye nkani iili atala aPurimu.
30 Wakatumizya magwalo aayo aali mumulawu kumaJuda boonse bali muzilikiti zili 127 mubweendelezi bwa-Ahasuwera mumajwi aaluumuno aakasimpe,
31 kuti abe aachoonzyo atala akubambwa kwamazuba aaPurimu aachiindi chawo chibikkidwe mbuli mbubakali balayililwa aaModekkayi muJuda aNamalelo Esita, alubo mbuli mbubakali balisalila kuti bazoochita oobo abana babo, akuti bakali kuzoolyiimya kulya akukomba nkombyo zyakukombelezya.
32 Alubo mulawu wa-Esita wakasimya kaambo kali atala aPurimu mpawo wakalembwa mubbuku.
Makani Aamunsi
^ Langa Makani Aakuyungizya B15.
^ Naakuti, “muSusa.”
^ Naakuti, “muunzi wamwaami.”
^ Naakuti, “muSusa.”
^ Naakuti, “muunzi wamwaami.”
^ Naakuti, “muSusa.”
^ Naakuti, “muunzi wamwaami.”
^ Naakuti, “muSusa.”
^ Naakuti, “muSusa.”
^ Naakuti, “muSusa.”
^ Naakuti, “muSusa.”
^ Bbala lyakuti “Puri” lyaamba “Chisale.” Mpawo lyakuti “Purimu” lili mubwiingi lyakabelesegwa kwaamba pobwe lyamaJuda lyakali kuchitwa mumweezi wachi 12 mukkalenda lisalala. Langa Makani Aakuyungizya B15.
