Ezra 3:1-13
3 Mumweezi wamusanu ayibili, ma-Israyeli kabakkede mumyuunzi yabo, bakabunganaamwi muJerusalema kabali aamuzeezo uumwi.
2 Jeshuwa mwana waJehozadakki abapayizinyina bamwi aZerubbabbeli mwana waShelatiyeli abeenzinyina bakanyampuka mpawo bakayaka chipayililo chaLeza wa-Israyeli kuchitila kuti kabapa zipayizyo zitentwa aali nchicho mbuli mbukulembedwe muMulawu waMozesi muntu waLeza wakasimpe.
3 Nkinkaako, bakayaka chipayililo aandawu yacho yachiindi nikuba kuti bakali kuyoowa bantu bamuzisi zyakabazyungulukide mpawo bakasaanguna kupa zipayizyo zitentwa kuli Jehova aali nchicho, zipayizyo zitentwa kuseeni agoko.
4 Mpawo bakachita Pobwe lyaZivututu kweendelana azilembedwe alubo buzuba abuzuba bakali kupa mweelwe uubikkidwe wazipayizyo zitentwa wakali kuyandikana abuzuba.
5 Kuzwa kuchiindi eecho kaziya kunembo, bakapa chipo chachiindi choonse azipo zyakukkala kwamweezi azipo zyoonse zyamapobwe aasalala aaJehova, kuswaanizya azeezyo zyakali kuzwa kubantu boonse bakaliyandila kupa zipo zyakuliyandila kuli Jehova.
6 Kuzwa mubuzuba bwakusaanguna mumweezi wamusanu ayibili, bakasaanguna kupa zipayizyo zitentwa kuli Jehova nikuba kuti ntalisyo yatempele lyaJehova teeyakalinayakwa pe.
7 Bakapa mali kuli basikunenga mabwe akubantu bali aaluzibo lwakupanga zintu, alubo bakapa bantu bakuSidoni abakuTire chakulya azyakunywa amafuta kuti beete zisamu zyamukkedari kabazyiinzya mulwizi kuzwa kuLebbanoni kusika kuJopa, kweendelana ambaakali wabazumizya Mwaami Kkoreshi waPesiya.
8 Mumunyaka wachibili mumweezi wachibili kuzwa nibakasika kung’anda yaLeza wakasimpe kuJerusalema, Zerubbabbeli mwana waShelatiyeli, Jeshuwa mwana waJehozadakki abeenzinyina boonse, bapayizi amaLevi, abantu boonse bakaza kuJerusalema kabazwa mubuzike bakasaanguna mulimu; bakasala maLevi bali aaminyaka iili 20 kaziya kunembo kuti babe basikweendelezya mulimu waang’anda yaJehova.
9 Nkinkaako, Jeshuwa, bana bakwe abeenzinyina, Kkadimiyeli abana bakwe, bana baJuda, bakajatana kuti balange-lange aabo bakali kubeleka mulimu mung’anda yaLeza wakasimpe kuswaanizya bana baHenadadi, abana babo abeenzinyina, maLevi.
10 Basikuyaka nibakamaninsya kuyaka ntalisyo yatempele lyaJehova, bapayizi bakanyampuka kabazweete zigogo zyamulimu wabo kabajisi myeembo, ambabo maLevi bana ba-Asafu, bakanyampuka kabajisi nsimbi zyuumanisigwaamwi kuti batembawule Jehova kweendelana ambaakalayilila Mwaami Davida wa-Israyeli.
11 Mpawo bakasaanguna kwiimba kabalikuvwiilana kabatembawula akulumba Jehova “nkaambo mubotu; luyando lwakwe lutamani kuma-Israyeli mpululi chiindi choonse kukabe kutamani.” Mpawo bantu boonse bakoompolola loompololo lupati lwakutembawula Jehova nkaambo ntalisyo yang’anda yaJehova yakali yayakwa.
12 Bapayizi biingi, maLevi abasilutwe bamaanda aamawisi—madaala bakayibona ng’anda yakusaanguna—bakabobola nibakabona ntalisyo yang’anda eeyi kayili yayakwa mpawo bamwi bakali koompolola chakukondwa amajwi aali aajulu.
13 Nkinkaako, bantu teebakali kukonzya pe kusiyanisya koompolola kwakukondwa akoompolola kwakulila, nkaambo bantu bakali koompololesya zyakuti koompolola ooko kwakali kumvwikka kule loko.
