Hagayi 1:1-15
1 Mumunyaka wachibili wabweendelezi bwaMwaami Dariyasi mumweezi wamusanu awumwi mubuzuba bwakusaanguna bwamweezi ooyo, ijwi lyaJehova lyakasika kwiinda muli Hagayi* mupolofita kaliya kuli Zerubbabbeli mwana waShelatiyeli, mweendelezi waJuda, akumupayizi mupati Joshuwa mwana waJehozadakki, kaliti:
2 “Nzezi nzyaamba Jehova wamakamu, ‘Bantu aaba balikwaamba kuti, “Chiindi tachinasika pe chakuti ng’anda* yaJehova iyakwe.”’”*
3 Jwi lyaJehova lyakasika lubo kwiinda mumupolofita Hagayi, kaliti:
4 “Eechino nchiindi chakuti mukkale mumaanda aali aazisamu zibotu na, kakuli ng’anda eeyi nditongo?
5 Nzezi nzyaamba Jehova wamakamu, ‘Amubikkile maanu kuchiimo* chanu.
6 Mubyala mbuto nyingi pesi mutebula ziche. Mulalya pesi tamukkuti pe. Mulanywa pesi tamugondwi* pe. Mulazwaata zigogo pesi taakwe uukasaalilwa pe. Muntu uubeleka ubikka nzyaafola muchikwama chidonkokede.’”
7 “Nzezi nzyaamba Jehova wamakamu, ‘Amubikkile maanu kuchiimo* chanu.’
8 “‘Amutante chilundu muze aazisamu. Mpawo muyake ng’anda kuchitila kuti ndibotelwe akaambo kanjiyo akuti ndilemekwe,’ mbaamba Jehova.”
9 “‘Mwakali kulangilila zyiingi pesi mwakajana ziche; alubo chiindi nimwakazyeeta mung’anda ndakazifulida mpawo zyamwayika. Akaambo kanzi? mbaamba Jehova wamakamu. ‘Akaambo kakuti ng’anda yangu nditongo kakuli umwi awumwi wanu ulikuchijaana-chijaana kulangania ng’anda yakwe.
10 Nkinkaako, julu lyamwiima lume* lwalyo anyika yamwiima butebuzi bwayo.
11 Ndakapa kuti nyika yanu azilundu ziyume, zyakapa kuti kutabi zilyo zyiingi, wayini, mafuta, aminsamu, inywe azivuubwa muli mumapenzi, alubo milimu yoonse njimuli kuchita njabuyo.’”
12 Zerubbabbeli mwana waShelatiyeli aJoshuwa wamwana waJehozadakki mupayizi mupati abantu boonse bakaswiilila jwi lyaJehova Leza wabo amajwi aamupolofita Hagayi nkaambo Jehova Leza wabo wakali wamutuma, alubo bantu bakasaanguna kuyoowa akaambo kaJehova.
13 Mpawo Hagayi mutumwa waJehova wakabuzya bantu mulumbe kweendelana ambaakali watumwa aaJehova, wakati: “‘Ndili aandinywe,’ mbaamba Jehova.”
14 Nkinkaako, Jehova wakasungwaazya moyo waZerubbabbeli mwana waShelatiyeli mweendelezi waJuda, awaJoshuwa mwana waJehozadakki mupayizi mupati, amyoyo yabantu boonse kuti babeleke mulimu; mpawo bakasika basaanguna kubeleka aang’anda yaJehova wamakamu, Leza wabo.
15 Mwakali mubuzuba bwachi 24 mumweezi wamusanu awumwi mumunyaka wachibili wabweendelezi bwaMwaami Dariyasi.
Makani Aamunsi
^ Nkukwaamba kuti, “Kuzyalwa Mubuzuba bwaPobwe.”
^ Naakuti, “tempele.”
^ Naakuti, “iyakululwe.”
^ Naakuti, “Amuyeeyesesye atala achiimo.”
^ Bamwi bati “tamulumbili.”
^ Naakuti, “Amuyeeyesesye atala achiimo.”
^ Bamwi bati “gweeda.”
