Makani Aakalembwa aaJohane 2:1-25
2 Mubuzuba bwachitatu, kwakachitwa pobwe lyamuchado kuKkana iili muGalili alubo banyina aaJesu bakali nkukooko.
2 Naaba Jesu abasikwiiya bakwe ambabo bakalitambidwe kumuchado ooyo.
3 Wayini niyakaba aafwiifwi kumana, banyina aaJesu bakamubuzya kuti: “Tabachikwe wayini pe.”
4 Pesi Jesu wakati kuli banyina: “Yoomwanakazi, ime anduwe tunjilaali kuzintu eezi?* Chiindi changu tachinasika pe.”
5 Mpawo banyina bakabuzya bantu bakali kupa bantu chakulya kuti: “Kufumbwa nzyatamubuzye, amuzichite.”
6 Aandawu njiyeeyo, kwakali nongo zyamabwe zyakubikkila maanzi zili musanu ayimwi, zyakali kuyandikana kweendelana amilawu yamaJuda yakulisalazya. Nongo iimwi yakali kuzuzya migomo* iibili naakuti iitatu.
7 Jesu wakababuzya kuti: “Amuzizuzye maanzi nongo eezi.” Mpawo bakazizuzya pamu zyoonse.
8 Mpawo wakati kulimbabo: “Amuteke mukape mweendelezi wapobwe.” Mpawo bakachita oobo.
9 Mweendelezi wapobwe naakalabila maanzi aakali achinchwa kuba wayini, katazi pe kuti yazwa kuli (nikuba kuti babelesi bakeeta maanzi bakalizi) wakayita sikukwata,
10 mpawo wakamubuzya kuti: “Bantu boonse basaanguna kugwisya wayini iinona mpawo bantu nibakolwa, nga beeta mbi. Pesi iwe wabambide wayini iinona kusika lino.”
11 Jesu wakachita zintu eezi, kachili chitondeezyo chakwe chakusaanguna kuKkana iili muGalili alubo wakapa kuti bulemu bwakwe buzibwe mpawo basikwiiya bakwe bakaba aalusyomo mulinguwe.
12 Nizyakayinda zintu eezi, Jesu, banyina, banike bakwe abasikwiiya bakwe, bakakunuka baya kuKkapenawume pesi teebakaakukkala mazuba miingi pe.
13 Pasika yamaJuda niyakaba aafwiifwi, Jesu wakatanta kaya kuJerusalema.
14 Mutempele wakajana bantu bakali kuuzya ng’ombe, mbelele, nziba, abantu bakali kuchincha mali kabakkede aazyuuno zyabo.
15 Naakoosa chimboko kabelesya ntambo, wakabatandilaanze aatempele bantu boonse bakali aambelele ang’ombe alubo wakatila mali yabasikuchincha mali akupindimuna matebbulu aabo.
16 Mpawo wakabuzya aabo bakali kuuzya nziba kuti: “Amuzigwisye zintu eezi aawa! Amuleke kuchita ng’anda yaTaata kuba ng’anda yakuuzizyania!”*
17 Mpawo basikwiiya bakwe bakayeeya kuti kulilembedwe kuti: “Busungu bwang’anda yako buzoondilya.”
18 Nkinkaako, maJuda nibakabona zintu eezi bakamubuzya kuti: “Nchiichili chitondeezyo nchutatuchitile, mbukunga ulikuchita zintu eezi?”
19 Mpawo Jesu wakabasandula kuti: “Amudilisye tempele eeli mpawo ndilalyiimikizya mumazuba aatatu.”
20 MaJuda bakati kulinguwe: “Tempele eeli lyakayakwa muminyaka iili 46, kujana walyiimikizya biyeni mumazuba aatatu?”
21 Pesi tempele ndyaakali kwaamba, mubili wakwe.
22 Nikuba oobo, naakabusigwa kuzwa kubafu, basikwiiya bakwe bakayeeya kuti wakali kukkala kaamba zintu eezi mpawo bakasyoma lugwalo anzyaakaambide Jesu.
23 Nikuba oobo, naakali kuJerusalema kupobwe lyaPasika, bantu biingi bakasyoma muzina lyakwe nibakabona zitondeezyo nzyaakali kuchita.
24 Pesi Jesu taakali kubasyoma pe nkaambo wakalibazi boonse
25 alubo taakwe muntu ngwaakali kuyanda kuti amubuzye atala amuntu nkaambo wakalizizi zyakali mumoyo wamuntu.
Makani Aamunsi
^ MuchiGrikki, “Zileenzi andime anduwe eezi yoomwanakazi?” Majwi aaya atondeezya kukaka zyaambwa. Kubelesegwa kwabbala lyakuti “yoomwanakazi,” takutondeezyi kutalemeka pe.
^ Kulakonzeka kuti mugomo wakeelene aabbati. Alubo bbati eelyo lyakeelene aamalita aali 22.
^ Naakuti, “musika.”
