Kulonga 32:1-35
32 Aachiindi eecho, bantu bakabona kuti Mozesi wanonoka kuseluka muchilundu, nkinkaako, bakabunganina Aroni mpawo bakati kulinguwe: “Nyampuka, utupangile leza uutatuzulwide nkaambo tatuzi pe kuti niinzi chachitika kuli Mozesi ooyu, wakatuzulwida kuzwa munyika ya-Ijipita.”
2 Mpawo Aroni wakati kulimbabo: “Amubweze malangu-langu* aangolida aali kumatwi aabanakazi banu, bana banu balombe abasimbi mpawo mwaayete kulindime.”
3 Nkinkaako, bantu boonse bakasaanguna kugwisya malangu-langu aangolida aakali kumatwi aabo mpawo bakaatola kuli Aroni.
4 Aroni wakabweza ngolida yakazwa kuli mbabo mpawo wakafula chibumbwa chamwana wang’ombe kabelesya chakufokolesya. Bantu bakasaanguna kwaamba kuti: “O Israyeli, ooyu nguLeza wako wakakugwisya munyika ya-Ijipita.”
5 Aroni naakabona zintu eezi, wakayaka chipayililo kunembo lyacho. Mpawo wakoompolola kati: “Kunooli pobwe lyaJehova juunza.”
6 Mpawo mubuzuba bwakatobela, bakabuka kuseeni akusaanguna kupa zipo zitentwa azipayizyo zyalumvwanano. Nibakamaninsya, bantu bakakkala aansi kuti balye akunywa. Mpawo bakanyampuka kuti babotelwe.
7 Jehova wakati kuli Mozesi: “Yinka, seluka nkaambo bantu bako mbuwakagwisya munyika ya-Ijipita babisya.
8 Bafwambaana kuzwa munzila njindakabalayilila kuti beende mulinjiyo. Balipangila chibumbwa chamwana wang’ombe alubo bali kuchifugamina, bali kupa zipayizyo kulinchicho alubo balikwaamba kuti, ‘O Israyeli, ooyu nguLeza wako wakakugwisya munyika ya-Ijipita.”
9 Mpawo Jehova wakabuzya Mozesi kuti: “Ndabona kuti bantu aaba bali aamitwe miyumu.
10 Leka ndibanyonyoone nkaambo ndanyema loko mpawo ndilapa kuti ube chisi chipati.”
11 Mpawo Mozesi wakakombelezya Jehova Leza wakwe kati: “O Jehova, nkamboonzi bukali bwako nibwabukila bantu bako mbwaakagwisya munyika ya-Ijipita anguzu mpati akuboko kuli aamanguzu?
12 Nkamboonzi ma-Ijipita nibeelede kwaamba kuti, ‘Wakali aamakanze mabi naakabagwisya. Wakali kuyanda kubajaya muzilundu akubalobya aanyika’? Utabanyemeni kaka bantu bako, chincha muzeezo* atala apenzi ndwaasala kubeetela.
13 Yeeya babelesi bako Abbrahamu, Izakka a-Israyeli mbuwakakonkezya lwako nwaakati: ‘Ndizoovuzya bana banu mbuli nyenyeezi zyakujulu alubo ndizoobapa nyika eeyi yoonse njindakabasalila kuchitila kuti bayibweze ibe lukono lwabo kukabe kutamani.’”
14 Nkinkaako, Jehova wakachincha muzeezo* atala apenzi ndyaakaambide kuti wakali kuzooyetela bantu bakwe.
15 Mpawo Mozesi wakabweeda, waseluka muchilundu kajisi mabwe aabili aapapalete aaBukamboni. Mabwe aayo aakalilembedwe kumabazu woonse aabili, akalembedwe ooku akooku.
16 Mabwe aayo aapapalete akapangidwe aaLeza alubo majwi aakalembedwe aalingawo akalembedwe aaLeza.
17 Joshuwa naakamvwa musindo wabantu bakali koompolola, wakati kuli Mozesi: “Kuli musindo wankondo mukkeempu.”
18 Pesi Mozesi wakati:
“Teemusindo wakwiimba akaambo kakuzunda kunkondo pe,Alubo teemusindo wakulila akaambo kakuzundwa;Ndilikumvwa musindo wakwiimba kwawumwi musyobo.”
19 Mozesi naakasika aafwiifwi akkeempu akubona mwana wang’ombe abantu kabali kuzyana, wakanyema loko alubo mabwe aapapalete ngaakajisi wakaawaalila aansi akwaapwaya munsi aachilundu.
20 Wakabweza mwana wang’ombe ooyo ngubakali bapanga wamutenta mumulilo mpawo wamuziya waba busu. Wakamwaya busu oobo mumaanzi mpawo waapa ma-Israyeli kuti banywe.
21 Mozesi wakati kuli Aroni: “Bantu aaba bakuchitaanzi loko chapa kuti ubazulwide kukuchita chibi chipati oobu?”
22 Aroni wakasandula kuti: “Utanyemi kaka mwaami wangu. Uzizi loko kuti bantu aaba bayandisya kubisya.
23 Nkinkaako, bakati kulindime, ‘Tupangile leza uutatuzulwide nkaambo tatuzi pe kuti niinzi chachitika kuli Mozesi ooyu, wakatuzulwida kuzwa munyika ya-Ijipita.’
24 Nkinkaako, ndakati kulimbabo, ‘Kufumbwa muntu uuli aangolida ayigwisye andipe. Ndakayiwaala mumulilo mpawo kwakazwa mwana wang’ombe ooyu.”
25 Mozesi wakabona kuti bantu teebakachili kunyoneka pe nkaambo Aroni wakali waleka kubanyona, nkinkaako, bakachita zintu zifwisya bweeme kunembo lyabasinkondonyina.
26 Mpawo Mozesi wakayimikila kumanjililo aakkeempu wati: “Ngwani uuli kubbazu lyaJehova? Aze kulindime!” MaLevi boonse bakabungana kulinguwe.
27 Wakababuzya kuti: “Nzezi nzyaamba Jehova Leza wa-Israyeli, ‘Umwi awumwi abweze panga lyakwe ayinde mukkeempu, kazwa kuli limwi geedi kaya kuli limwi geedi kali kujaya bbululu wakwe, simayakilane wakwe amweenzinyina.’”
28 MaLevi bakachita nzibakabuzigwa aaMozesi. Mubuzuba oobo, kwakajayigwa baalumi basika ku 3 000.
29 Mpawo Mozesi wakati: “Amulisalazye sunu kuti muchite mulimu waJehova, nkaambo umwi awumwi wanu wabukila mwanaakwe abbululu wakwe; sunu ulamulongezya.”*
30 Mubuzuba bwakatobela, Mozesi wakabuzya bantu kuti: “Mwakachita chibi chipati loko, lino ndilatanta chilundu ndiye kuli Jehova ndikamukombelezezye akaambo kachibi chanu.”
31 Mozesi wakabweeda kuli Jehova waakumubuzya kuti: “Bantu aaba bachita chibi chipati loko! Balipangila leza wangolida!
32 Pesi kuti kuyanda, balekelele chibi chabo, kuti kutayandi, ndizime biyo mubbuku lyako ndwaakalemba.”
33 Nikuba oobo, Jehova wakati kuli Mozesi: “Ooyo uundibisizya nguwe ngunditazime mubbuku lyangu.
34 Lino yinka, uzulwide bantu kundawu njindakakubuzya. Ngilozi yangu inooli kunembo lyako alubo mubuzuba mbunditazoobeteke bantu, ndizoobasubula akaambo kachibi chabo.”
35 Mpawo Jehova wakasaanguna kupenzya bantu nkaambo bakali bapanga mwana wang’ombe, ooyo Aroni ngwaakapanga.
Makani Aamunsi
^ Bamwi bati madikezi.
^ Naakuti, “lisole.”
^ Naakuti, “wakalisola.”
^ Bamwi bati ulamukombweda.
