Kulonga 4:1-31
4 Pesi Mozesi wakasandula kuti: “Ani kuti baleka kundisyoma akuswiilila jwi lyangu nkaambo bayoowamba kuti: ‘Jehova taakalibonia pe kulinduwe.’”
2 Jehova wakati kulinguwe: “Niinzi chili mukuboko kwako?” Wakasandula kuti: “Mufunko.”
3 Wakati: “Uwaale aansi.” Wakawuwaala aansi mpawo wakaba nzoka alubo Mozesi wakayichija.
4 Mpawo Jehova wakati kuli Mozesi: “Tandabika kuboko kwako wiijate kumuchila.” Nkinkaako, wakatandabika kuboko wiijata mpawo yakaba mufunko mukuboko kwakwe.
5 Leza wakati: “Eezi ziyoopa kuti basyome kuti Jehova Leza wamasianyinakulu, Leza wa-Abbrahamu, Leza wa-Izakka aLeza waJakkobo wakalibonia kulinduwe.”
6 Jehova wakaambuula lubo anguwe kati: “Njizya kuboko kwako muchigogo chako mpuchili aakaango.” Mozesi wakakunjizya muchigogo alubo naakakugwisya, kwakali kwaba aachipele chituba buu mbuli chaanda.
7 Mpawo wakati: “Njizya lubo kuboko kwako muchigogo mpuchili aakaango.” Wakakunjizya lubo. Naakakugwisya, kwakali kwaba kabotu mbuli mbukwakabede.
8 Wakati: “Kuti bakaleke kukusyoma naakuti kukuswiilila waakuchita chitondeezyo chakusaanguna, kwaamba choonzyo, bayookuswiilila waakuchita chitondeezyo chitobela.
9 Kuti baleka kusyoma zitondeezyo eezi zibili, akukaka kuswiilila jwi lyako, ukateke maanzi muMulonga waNayile mpawo waatile aansi aanyika njumu. Maanzi ngutakateke muli Nayile azooba ganzi aanyika njumu.”
10 Mozesi wakati kuli Jehova: “Ikaka Jehova, tandinaba aabuzuba ndaambuula kabotu pe kuzwa chiindi naakuti kuzwa nwaakasaanguna kwaambuula aandime ndimubelesi wako, nkaambo lulimi lwangu ndulemu.”
11 Jehova wakati kulinguwe: “Ngwani wakapanga mulomo wamuntu naakuti kupa kuti abe chimuumu, atamvwi kumatwi, abone naakuti kupa kuti abe moofu? Teendime na ndiJehova?
12 Lino yinka, ndizooba aanduwe wanoowambuula* alubo ndizookuyiisya nzweelede kwaamba.”
13 Pesi wakati: “Ikaka Jehova, ndikumbila kuti utume umwi muntu nguyanda kutuma.”
14 Jehova wakamunyemena loko Mozesi mpawo wakati: “Mukulanaako Aroni muLevi mpali. Ndilizi kuti ulakonzya kwaambuula kabotu. Uli munzila kuzookuswaana. Aakubona, moyo wakwe ulabotelwa.
15 Weelede kwaambuulaawe alubo ubikke majwi mumulomo wakwe. Ndiyooba aandinywe nimutanoowambuule alubo ndiyoomuyiisya nzimweelede kuchita.
16 Uzookwaambwiida aabantu alubo uzooba sikukwaambwiida, iwe uzooba mbuli Leza kulinguwe.*
17 Weelede kwiinka aamufunko ooyu uuli mukuboko kwako, ukachite zitondeezyo anguwo.”
18 Nkinkaako, Mozesi wakabweeda kuli Jeturo wisizyala, mpawo wakati kulinguwe: “Ndikumbila kubweeda kubabbululu bangu ku-Ijipita kuti ndikabone kuti bachipona na.” Mpawo Jeturo wakasandula Mozesi kuti: “Yinka muluumuno.”
19 Mpawo kuMidiyani Jehova wakati kuli Mozesi: “Yinka, bweeda ku-Ijipita nkaambo bantu boonse bakali kuyanda kukujaya bakafwa.”
20 Mozesi wakabweza mwanakazi wakwe abana bakwe balombe akubatansika aadonki. Wakanjila nzila, wabweeda ku-Ijipita. Kuyungizya waawo, Mozesi wakabweza mufunko waLeza wakasimpe mukuboko kwakwe.
21 Mpawo Jehova wakati kuli Mozesi: “Waakusika ku-Ijipita ukabe aachoonzyo chakuti wayinka kuli Faro akuchita zigambyo zyoonse nzindakupa manguzu aakuti uchite. Pesi ndilamuleka kuti ayumye moyo wakwe alubo takabaleki pe bantu kuti beende.
22 Weelede kubuzya Faro kuti, ‘Nzezi nzyaamba Jehova: “Israyeli, mwanaangu mulombe alubo mwanaangu wakusaanguna.
23 Ndikubuzya kuti, leka mwanaangu ayinke akandibelekele, kuti ukake ndilajaya mwanaako mulombe wakusaanguna.”’”
24 Nibakali munzila aandawu yakupumwida, Jehova wakamuswaana alubo wakali kuyanda kumujaya.
25 Mpawo Zipora wakabweza bbwe libosya* akupalula mwanaakwe alubo wakagumya ndomo yakwe kumawulu aakwe* mpawo wakati: “Uli sikukwata waganzi kulindime.”
26 Nkinkaako, Leza wakamuleka kuti ayinke.* Aachiindi eecho, Zipora wakati, “sikukwata waganzi” akaambo kakupalula.
27 Mpawo Jehova wakati kuli Aroni: “Yinka munkanda ukaswaanane aaMozesi.” Nkinkaako, wakayinka waakuswaananaawe kuchilundu chaLeza wakasimpe alubo wakamujuzya kwiinda mukumumyonta.
28 Alubo Mozesi wakabuzya Aroni majwi woonse aaJehova ooyo wakamutuma, azitondeezyo zyoonse nzyaakamulayilila kuti achite.
29 Mpawo Mozesi a-Aroni bakayinka akuyoobunganizya baalu boonse bama-Israyeli.
30 Aroni wakababuzya majwi woonse Jehova ngaakabuzya Mozesi alubo wakachita zitondeezyo kunembo lyabantu.
31 Mpawo bantu bakasyoma. Nibakamvwa kuti Jehova wakali wabayeeya ma-Israyeli akuti wakali waabona mapenzi aabo, bakakotama akuvuntama aansi.
Makani Aamunsi
^ MuchiHebberu, “aamulomo wako.”
^ Naakuti, “uzooyiminina Leza kulinguwe.”
^ Naakuti, “kafulo kapangidwe aabbwe libosya.”
^ Zilakonzya kwaamba mawulu aangilozi.
^ Zilakonzya kwaamba mwana waMozesi.
