Kulonga 5:1-23
5 Nizyakayinda zintu eezi, Mozesi a-Aroni bakanjila mpawo bakati kuli Faro: “Jehova Leza wa-Israyeli waamba kuti, ‘Leka bantu bangu beende, kuchitila kuti bakandichitile pobwe munkanda.’”
2 Pesi Faro wakati: “Ani Jehova ngwani biya kuti ndiswiilile jwi lyakwe akuleka ma-Israyeli kuti beende? Tandimuzi pe Jehova. Tandikoobaleka pe ma-Israyeli kuti beende.”
3 Pesi bakati: “Leza wamaHebberu wakaambuula aandiswe, tukumbila kubweza lweendo lwamazuba aatatu tuye munkanda tukape zipayizyo kuli Jehova Leza wesu, kuti teetwachita oobo, uzootujaya achilwazi naakuti apanga.”
4 Mwaami wa-Ijipita wakabasandula kuti: “Mozesi a-Aroni, nkamboonzi nimulikugwisya bantu kumilimu yabo? Mubweede kumilimu yanu.”
5 Faro wakayinkilila kunembo kubabuzya kuti: “Amubone mbubali biingi bantu munyika eeyi, inywe muyanda kuti bapumune kumilimu yabo.”
6 Mubuzuba oobo, Faro wakalayilila basikubelesya bantu abasikulangania babelesi kuti:
7 “Tamucheelede kubapa bwizu basikuuma zitina, abayinke bakaliyandwiide bwizu.
8 Mweelede kupa kuti bawume namba yazitina nzibakali kuuma kale, mutayichesyi pe, nkaambo balikusaana.* Nchibali kulila-lila kabati, ‘Tuyanda kweenda, tuyanda kuyoopa zipayizyo kuli Leza wesu.’
9 Amubabelesye loko, batajani chiindi chakupumuna kuchitila kuti bataswiilili makani aakubeja.”
10 Nkinkaako, basikubelesya bantu abasikulanga babelesi bakazwa baakubuzya bantu kuti: “Faro waamba kuti, ‘Tandichimupi lubo pe bwizu.
11 Amwiinke mukaliyandwiide bwizu kufumbwa nkumukonzya kubujana, pesi mulimu wanu tuukachesegwi pe.’”
12 Mpawo bantu bakazula munyika yoonse ya-Ijipita kabali kuyanduula makuba muchindawu chabwizu.
13 Alubo basikubelesya bantu bakaliswini kubabuzya kuti: “Umwi awumwi wanu weelede kumaninsya mulimu ngwapedwe buzuba abuzuba, mbuli mbumwakali kuchita nimwakachili kupegwa bwizu.”
14 Basikulanga babelesi bama-Israyeli ibakasalwa aabasikubelesya bantu baFaro bakawumwa. Bakabuzigwa kuti: “Nkamboonzi nimwatasisya namba yazitina nzimwakali kusisya chiindi? Nzimwakachita jilo, asunu mwazichita lubo.”
15 Basikulanga babelesi bama-Israyeli bakanjila baakulila-lila kuli Faro kabati: “Nkamboonzi babelesi bako nulikubajata munzila iili boobu?
16 Babelesi bako tabali kupegwa bwizu pe pesi balikutubuzya kuti, ‘Amuume zitina!’ Iswe tubabelesi bako tulikuumwa kakuli bantu bako mbabo bali aamulandu.”
17 Pesi wakati: “Mulikusaana,* mulikusaana* biya! Nchimulikwaamba kuti, ‘Tuyanda kweenda, tuyanda kuyoopa zipayizyo kuli Jehova.’
18 Amuzwe mubweede kumulimu, taakwe bwizu mbumutapegwe pe, pesi mweelede kuuma namba yazitina nzimwakali kuuma chiindi.”
19 Mpawo basikulanga babelesi bama-Israyeli bakabona kuti bakali mupenzi pati nkaambo bakali balayililwa kuti: “Tamweelede kuchesya namba yazitina nzimweelede kuuma buzuba abuzuba.”
20 Nibakali kuzwa kuli Faro, bakaswaanana aaMozesi a-Aroni kabayimvwi mpawaawo kabali kubalinda.
21 Nibakababona, bakati kulimbabo: “Jehova abone nzimwachita amubeteke nkaambo mwapa kuti tube chisesemyo* kuli Faro akubabelesi bakwe alubo mwabikka panga mukuboko kwabo kuti batujaye.”
22 Mpawo Mozesi wakakomba kuli Jehova kati: “Jehova, nkamboonzi nulikupenzya bantu aaba? Wakandituminaanzi?
23 Kuzwa nindakaya kuli Faro kuti ndikaambuule muzina lyako, Faro wakayungizya kubapenzya bantu bako alubo teewabafutula pe.”
Makani Aamunsi
^ Naakuti, “mbakandu.” Bamwi bati mbatolo.
^ Naakuti, “mbakandu.” Bamwi bati mbatolo.
^ Naakuti, “mbakandu.” Bamwi bati mbatolo.
^ Naakuti, “tununke nsu.”
